كۇنى كەشە عانا مەكتەپ تابالدىرىعىن اتتاعان بۇلدىرشىندەر العاشقى وقۋلىعى – ءالىپپەمەن قوشتاسۋدا. العاشقى ۇستازى ۇستاتقان وقۋلىققا قيماستىق سەزىلەدى. دەسە دە 4 اي كولەمىندە ءارىپ تانىپ، قالام ۇستاپ ۇيرەنگەن بالدىرعاندارعا ول ەندى تەك ماڭگىلىك دوس بولىپ قالادى دا، ءوز ورنىن «انا ءتىلى» وقۋلىعىنا بەرەدى. ءسويتىپ، بۇلدىرشىندەردىڭ ءبىلىم ەلىنە باستاعان كەرۋەنى العا قاراي جىلجي بەرەدى.
الماتىنىڭ اۋەزوۆ اۋدانىنا قاراستى №202 مەكتەپ-گيمنازياسىنىڭ 1 «ءا» سىنىپ وقۋشىلارى كۇنى كەشە عانا «الىپپە» وقۋلىعىمەن قوشتاستى. سىنىپ جەتەكشىسى ارداق ايدار قىزىنىڭ شەبەر ۇيىمداستىرۋىمەن وتكەن كەشكە مەكتەپ باسشىلىعى، مۇعالىمدەر، اتا-انالار قاتىستى. تاۋەلسىزدىك تۋرالى پاتريوتتىق ءاندەرىمەن كورەرمەن قاۋىمدى ەرەكشە سەزىمگە بولەگەن 31 بالا، ەندى ءبىر مەزەتتە بالالىق جاققا جەتەلەپ، ءان ايتىپ، بي بيلەدى. ۇلدار جاعى سىنىپتاعى 21 قىزعا ارناپ ءان ايتسا، تاعى ءبىر توپ وقۋشى كىدىرمەستەن ءتۇرلى تاقپاقتار ايتىپ، ءتانتى ەتتى. «قارا جورعا»، «بيپىل»، «قارلىعاش» بيلەرىن تاماشالاعان كورەرمەن بالالاردىڭ ونەرىنە جوعارى باعا بەردى.
اسەرلى كەشتى وقۋشىلاردىڭ وزدەرى كەزەكتەسىپ جۇرگىزىپ وتىردى. سىنىپ جەتەكشىسى ارداق ايدار قىزىنىڭ سوزىنە سۇيەنسەك، مۇنداي فورمات بالالارعا جاۋاپكەرشىلىكتى، وزىنە دەگەن سەنىمدىلىكتى، ساحنا مادەنيەتىن ۇيرەتەدى، اۋديتوريامەن جۇمىس جاساۋعا باۋليدى.
كەش سوڭىندا ءسوز العان مەكتەپ ديرەكتورى بولات جانايحان بالالارعا اق جول تىلەپ، العىس حاتتار تابىستادى.