قاراعاندى وبلىسىندا كارانتين كەزىندە توي وتكىزۋگە تىيىم سالۋدى ەلەمەگەن شەنەۋنىك جۇمىستان بوساتىلدى. بۇل تۋرالى ءوڭىر باسشىسى جەڭىس قاسىمبەك ونلاين رەجيمىندە وتكەن اپپاراتتىق كەڭەستە مالىمدەدى.
«بۇگىننەن باستاپ جەر قاتىناستارى باسقارماسىنىڭ باسشىسى ماقسۇتوۆ قالەل مۇقاتاي ۇلى كارانتيندى ورەسكەل بۇزۋى، ياعني، پاندەميا كەزىندە توي شارالارىن ۇيىمداستىرۋىنا بايلانىستى قىزمەتىنەن بوساتىلدى. تاعى دا ەسكەرتەمىن: مۇنداي زاڭسىزدىقتار ءۇشىن جازا وتە قاتال بولادى. مۇندا مەملەكەتتىك قىزمەتشىنىڭ قىزمەتتىك ەتيكاسىنىڭ بارلىق نورمالارى بۇزىلعان. وبلىستا كوروناۆيرۋس ينفەكسياسىنا قارسى ءىس-قيمىل بويىنشا جۇرگىزىلىپ جاتقان ۇلكەن جۇمىستى قۇنسىزداندىرماڭىزدار. تۇرعىنداردىڭ كوڭىلىن قالدىرماڭىزدار. مارتەبەلەرىڭىز نەمەسە جۇمىس ورنىنا قاراماستان ارەكەتتەرىڭىزگە جاۋاپ بەرەسىزدەر!»، – دەدى وبلىس اكىمى.
سونداي-اق، جەڭىس قاسىمبەك مونيتورينگ توبىنىڭ مۇشەلەرىن پرينسيپتىلىككە شاقىردى.
«سىزدەر بىرەۋدىڭ مۇددەسى ءۇشىن جۇمىس ىستەۋ ءۇشىن ەمەس، ازاماتتاردىڭ دەنساۋلىعىن قورعاۋ ءۇشىن قۇرىلعانسىزدار! وسىنداي ءىس-شارالاردى توقتاتىپ، جاريا ەتىڭىزدەر. سىزدەر وزدەرىڭىز باقىلاۋ كامەرالارىنا قاراي وتىرىپ جۇمىس ىستەيتىندەرىڭىزدى ايتقان بولاتىنسىزدار. سوندىقتان مۇقيات قاراڭىزدار. سالىنعان تىيىم بارلىعىنا بىردەي»، – دەپ اتاپ ءوتتى وبلىس اكىمى.
وقيعا 7 تامىزدا بولعان. «109» نومىرىنە «اريستا» مەيرامحاناسىندا جاپپاي ءىس-شارا وتكىزىلىپ جاتقانى تۋرالى حابارلاما كەلىپ ءتۇستى. وقيعا ورنىنا قاراعاندى قالاسىنىڭ پوليسيا، سانەپيدباقىلاۋ جانە اكىمدىك قىزمەتكەرلەرىنەن تۇراتىن ءموبيلدى توپ شىقتى. مەكەمەنىڭ جانىندا كوپتەگەن كولىكتەر بولعاندىقتان جانە مەيرامحانانىڭ وزىندە 400-گە جۋىق ادام بولعاندىقتان، اۋماقتى قورشاۋ ءۇشىن پوليسيانىڭ قوسىمشا ناريادى شاقىرىلدى.
كارانتين رەجيمىن بۇزۋ فاكتىسى بويىنشا سەق قىزمەتكەرلەرى اكت راسىمدەدى. مەكەمە يەسىنە جانە ءىس-شارالاردى ۇيىمداستىرۋشىلارعا ايىپپۇل سالىنادى.
وتكەن دەمالىس كۇندەرى وبلىس ورتالىعى مەن تەمىرتاۋ قالاسىنىڭ باسقا دا مەكەمەلەرىندە كارانتين رەجيمىنىڭ ورەسكەل بۇزۋشىلىقتارى انىقتالدى.
ەستەرىڭىزگە سالا كەتەيىك، قاراعاندى وبلىسى «قويۋ قىزىل» ايماقتا ورنالاسقان. وڭىردە كۇن سايىن Covid-19 جۇقتىرۋدىڭ مىڭعا جۋىق جاڭا جاعدايى تىركەلەدى. وبلىستىڭ باس سانيتار دارىگەرىنىڭ قاۋلىسىمەن شەكتەۋلەر كۇشەيتىلدى.