الماتىدا ناۋرىز ايىنان باستاپ قىزىلشانىڭ 1097 زەرتحانالىق راستالعان جاعدايى تىركەلدى
الماتى قالاسىنىڭ سانيتاريالىق-ەپيدەميولوگيالىق باقىلاۋ دەپارتامەنتى ءمالىم ەتكەندەي، مەگاپوليستە قىزىلشامەن سىرقاتتانۋشىلىق بويىنشا تۇراقسىز ەپيدەميولوگيالىق جاعداي بايقالادى.
«وسى جىلدىڭ ناۋرىز ايىنان باستاپ قىزىلشانىڭ 1097 زەرتحانالىق راستالعان جاعدايى تىركەلدى، ونىڭ ىشىندە 14 جاسقا دەيىنگى بالالار اراسىندا 966 جاعداي (88،05%). بىلتىر قالادا قىزىلشا مەن قىزامىقتىڭ زەرتحانالىق راستالعان جاعدايلارى تىركەلمەگەن»، - دەپ اتاپ ءوتتى دەپارتامەنتەن.
قىزمەت ماماندارى مەديسينالىق ۇيىمدارمەن بىرلەسىپ بارلىق وشاقتا ەپيدەمياعا قارسى ءىس-شارالار جۇرگىزدى. ناتيجيەسىندە ناۋقاسپەن بايلانىسقا تۇسكەن بارلىعى 14 893 ادام انىقتالىپ، ەپيدەميولوگيالىق كورسەتكىش بويىنشا قىزىلشاعا قارسى شۇعىل يممۋنداۋعا جاتاتىن 277 ادام ەگىلدى. بارلىق بايلانىسقا تۇسكەندەر مەديسينالىق باقىلاۋعا الىنىپ، قىزىلشانىڭ الدىن الۋ شارالارى تۋرالى ءتۇسىندىرۋ جۇمىستارى جۇرگىزىلدى.
الماتى قالاسىنىڭ سانيتاريالىق-ەپيدەميولوگيالىق باقىلاۋ دەپارتامەنتى قىزىلشانى جۇقتىرۋدان، سونداي-اق ولاردىڭ اسقىنۋىنان الدىن الاتىن جالعىز ءتيىمدى قۇرال تەك ۆاكسيناسيا ەكەنىن ەسكە سالادى. قىزىلشاعا قارسى ۆاكسيناسيا 1 جاستا جانە 6 جاستا 2 رەت جاسالادى. بۇل ۆاكسيناسيالانعان ادامداردا ءومىر بويى بولاتىن ۆاكسيناسيادان كەيىنگى يممۋنيتەتتى دامىتۋعا مۇمكىندىك بەرەدى. قىزىلشاعا قارسى ۆاكسينانىڭ ءاربىر الىنعان دوزاسى بالانىڭ يممۋنيتەتىن كۇشەيتەدى.
ەكپەلەردى جۇرگىزۋ ءۇشىن ددۇ سەرتيفيكاتتاعان جانە قازاقستان رەسپۋبليكاسىندا تىركەلگەن قىزىلشاعا، قىزامىققا، ەپيدەميالىق پاروتيتكە قارسى ارالاس ۆاكسينا قولدانىلادى. ۆاكسيناسيا تۇرعىلىقتى جەرى بويىنشا قالانىڭ ەمحانالارىنىڭ بارلىق ەگۋ كابينەتتەرىندە تەگىن جۇرگىزىلەدى. ماسەلەن، وسى جىلدىڭ 8 ماۋسىمىندا الماتى قالاسى قوعامدىق دەنساۋلىق ساقتاۋ باسقارماسىنىڭ ۆاكسينا قويماسىنا ددۇ سەرتيفيكاتتاعان جانە ەلدە تىركەلگەن 37200 دوزا قىزىلشاعا، قىزامىققا، ەپيدەميالىق پاروتيتكە (قكپ) قارسى بىرىكتىرىلگەن ۆاكسينا كەلدى.
ايتا كەتەيىك، قىزىلشا – اۋا تامشىلى ينفەكسيالار توبىنا جاتاتىن جەدەل جۇقپالى ۆيرۋستىق اۋرۋ. اۋرۋ ادامنان ادامعا اۋا ارقىلى، تىنىس الۋ جولدارىنىڭ تامشىلارىمەن نەمەسە اۋرۋ جۇقتىرعان ادامنىڭ مۇرنى نەمەسە تاماق بولىنىسىنەن جۇعادى.
قىزىلشا – ەڭ جۇقپالى ينفەكسيانىڭ ءبىرى، سەبەبى اۋىراتىن اداممەن بايلانىسقا تۇسكەن سوڭ ەكپە الماعان ادامداردىڭ 90%-دان استامى اۋىرادى. قالاداعى تۇراقسىز ەپيدەميولوگيالىق جاعدايعا بايلانىستى وڭتۇستىك مەگاپوليستىڭ ەپيدەميولوگتارى اۋرۋدىڭ بەلگىلەرى پايدا بولعان كەزدە كەلەسى ەرەجەلەردى قاتاڭ تۇردە ۇسىنادى:
- ءوزىن-وزى ەمدەۋمەن اينالىسپاۋ، دارىگەردى ۇيگە شاقىرىپ جانە دارىگەردىڭ نۇسقاۋىبويىنشا ەم الۋ؛
- ۇيدە بولۋ، جۇمىس ورىندارىنا، سونداي-اق قوعامدىق ورىندارعا بارماۋ. اسىرەسە، امبۋلاتوريالىق ەمدەلىپ جاتقان ناۋقاستار ۇيدە وقشاۋلاۋدى قاتاڭ ساقتاۋى كەرەك؛
- اۋىرىپ جاتقان بالالاردى جازعى ساۋىقتىرۋ لاگەرلەرىنە، ۇيىمداسقان ۇجىمدارعا جىبەرمەۋ.