الماتى قالالىق قوعامدىق دەنساۋلىق ساقتاۋ باسقارماسىنىڭ مالىمەتىنشە، بۇگىنگى كۇنى 136 ناۋقاس ستاسيونارلىق ەم الىپ جاتىر، ونىڭ 108ء-ى قالالىق بالالار كلينيكالىق جۇقپالى اۋرۋلار اۋرۋحاناسىندا جاتىر.
«ناۋقاستار اراسىندا قىزىلشادان قايتىس بولعاندار تىركەلگەن جوق. ستاسيونارلىق ەم قابىلداپ جاتقان ناۋقاستاردىڭ جاعدايى ورتاشا اۋىر»، - دەلىنەدى ۆەدومستۆونىڭ حابارلاماسىندا.
№36 قالالىق ەمحانانىڭ ينفەكسيونيست دارىگەرى بوپەش ءامىرحانوۆا قىزىلشانىڭ وتە جۇقپالى ءجىتى ۆيرۋستىق ينفەكسيا ەكەنىن جانە اۋرۋدى بىردەن انىقتاۋعا بولمايتىنىن ايتتى.
"سوندىقتان ەگەر ساۋ ادام قىزىلشامەن اۋىرعان اداممەن بايلانىستا بولسا، وندا بۇعان ەرەكشە ءمان بەرۋ كەرەك. ادەتتە قىزىلشا اۋا تامشىلارى ارقىلى جۇعادى. بۇل رەتتە پاتولوگيانىڭ ءوزى عانا ەمەس، ينفەكسيانىڭ سالدارى دا ءقاۋىپتى. اۋرۋ كاتارالدى بەلگىلەردەن باستالادى. ياعني، جوعارى تەمپەراتۋرا، جالپى ينتوكسيكاسيا بەلگىلەرى، جۇتقىنشاقتىڭ، كونيۋنكتيۆا مەن تىنىس الۋ مۇشەلەرىنىڭ شىرىشتى قابىعىنىڭ قابىنىپ زاقىمدالۋى بولادى"، - دەدى ول.
دارىگەردىڭ سوزىنشە، اۋرۋدىڭ نەگىزگى تارالۋ كوزى – اۋرۋ ادام بولىپ تابىلادى. سونداي-اق قىزىلشامەن كوبىنەسە 5 جاسقا دەيىنگى بالالار اۋىرادى. اۋرۋدىڭ العاشقى بەلگىلەرى جرۆي بەلگىلەرىنە وتە ۇقساس. قىزىلشا بورتپەسى اۋرۋ باستالعان سوڭ 3-4 كۇننەن كەيىن پايدا بولادى.
"داقتار ادەتتە بەت پەن مويىندا شىعا باستايدى، كەيىن دەنەگە، اياق-قولعا تارالادى. بۇل قىزىلشا اۋرۋىنا ءتان بەلگىلەردىڭ كەزەڭى. ەكپە الماعان جانە قىزىلشامەن اۋىرماعان ادامداردىڭ 90%-ى قىزىلشامەن اۋىراتىن اداممەن بايلانىسقا تۇسسە، اۋرۋدى جۇقتىرادى. ەگەر ادام قىزىلشانى جۇقتىرعانىنا كۇدىگى بولسا ءارى اۋرۋ اداممەن بايلانىستا بولعانىن ناقتى بىلسە، ەڭ الدىمەن جۇقپالى اۋرۋ دارىگەرىنە كورىنۋ كەرەك. ءوزىن-وزى ەمدەۋگە قاتاڭ تىيىم سالىنادى. تەك دارىگەر عانا دۇرىس تەراپيانى تاعايىنداي الادى»، - دەيدى بوپەش ءامىرحانوۆا.
قىزىلشا اۋىر اسقىنۋدى تۋدىرۋى مۇمكىن ەكەنىن ەسكەرۋ كەرەك، سوندىقتان دەرەۋ دارىگەرگە قارالعان دۇرىس. كەي جاعدايدا اسقىنۋدى ەمدەۋ ءۇشىن اۋرۋحاناعا جاتقىزۋ قاجەت بولۋى مۇمكىن.
قىزىلشانىڭ الدىن الۋدىڭ ەڭ جاقسى جولى - ەكپە الۋ. بالالار قىزىلشاعا، قىزامىققا جانە ەپيدەميالىق پاروتيتكە قارسى ۆاكسينانىڭ ەكى دوزاسىن الۋى كەرەك، ءبىرىنشى دوزانى 12-15 ايدا، ەكىنشى دوزانى 6 جاستا الادى.
«ستاتيستيكاعا سۇيەنسەك، بۇل اۋرۋعا بالالار كوبىرەك بەيىم بولادى. سوندىقتان ەكپە ءسىزدىڭ بالاڭىزدىڭ قىزىلشامەن اۋىرۋى نەمەسە اۋىرماۋىندا ۇلكەن ءرول اتقارادى. بالاڭىزدىڭ ەكپە العانىنا سەنىمدى بولماساڭىز، دارىگەرگە حابارلاسىپ، بالانىڭ مەديسينالىق قۇجاتتارىن تەكسەرىپ، دارىگەرمەن ەكپە الۋ مۇمكىندىگى تۋرالى سويلەسىڭىز"، - دەدى بوپەش ءامىرحانوۆا.