قىزىلوردادا حالىقارالىق ىزدەۋدە جۇرگەن كۇدىكتى ۇستالدى

سيفرلىق فورمات مۇمكىندىگى

قىزىلوردادا پاترۋلدىك پوليسيا قىزمەتكەرلەرى ماس ادامدى ۇستادى. پلانشەتتىڭ كومەگىمەن ونىڭ حالىقارالىق ىزدەۋدە ەكەنى انىقتالعان، دەپ Almaty-akshamy.kz حابارلايدى BAQ.KZ-كە سىلتەمە جاساپ.
پروفيلاكتيكالىق ءىس-شارالار بارىسىندا قىزىلوردا قالاسى پب پاترۋلدىك پوليسيا باتالونىنىڭ قىزمەتكەرلەرى №2 اكىمشىلىك ايماقتاعى توقماعامبەتوۆ كوشەسى بويىندا 32 جاستاعى ماس ادامدى ۇستادى. مەديسينالىق تەكسەرۋدەن ءوتۋ ءۇشىن ول ناركولوگيالىق ديسپانسەرگە جەتكىزىلگەن. دەرەكتەردى انىقتاۋ كەزىندە ەلەكتروندىق پلانشەت ارقىلى قۇقىق بۇزۋشى وسى جىلدىڭ مامىر ايىندا ۇرلىق جاساعانى ءۇشىن حالىقارالىق ىزدەۋگە جاريالانعانى جانە ءتورت اي بويى پوليسيادان قاشىپ جۇرگەنى بەلگىلى بولدى. 
الايدا سۇراق قويۋ بارىسىندا ءوزىنىڭ ىزدەۋدە جۇرگەنىن بىلە تۇرا، پوليسياعا ءوزى تۋرالى جالعان اقپارات بەرىپ، ءاتى-جونىن وزگەرتىپ ايتقان.

«جۇمىستىڭ سەرۆيستىك تاسىلدەرى ەنگىزىلگەننەن كەيىن قۇجات اينالىمىنىڭ باسىم بولىگى سيفرلىق فورماتقا كوشىرىلدى. بۇگىنگى تاڭدا پلانشەت قۇرىلعىلارىن پايدالانۋ جاقسى ناتيجە بەرۋدە. وندا بارلىق دەرەكتەر، كولىك قۇرالدارىنا قويىلاتىن شەكتەۋلەر، ىزدەۋدە جۇرگەن ازاماتتار تۋرالى اقپاراتتار بار. ال باعىت-باعدارلار پلانشەتتەرگە اۆتوماتتى تۇردە ءتۇسىپ، مالىمەتتەر ەلەكتروندى فورمات بازاسىندا بولادى. بىرىكتىرىلگەن دەرەكتەر بىردەن رەسپۋبليكالىق بازاعا تۇسەدى»، – دەپ اتاپ ءوتتى قىزىلوردا وبلىسى پد باستىعى مۇحتار قوجابايەۆ. 

قازىرگى ۋاقىتتا ۇستالعان كۇدىكتىگە قاتىستى كۇزەتپەن ۇستاۋ تۇرىندەگى بۇلتارتپاۋ شاراسى تاڭدالدى. ول ۋاقىتشا ۇستاۋ يزولياتورىنا قامالىپ، باسقا دا وسى تەكتەس قىلمىستارعا قاتىستىلىعى تەكسەرىلۋدە.