بۇل باستاما رەسپۋبليكالىق ونوماستيكا كوميسسياسىنىڭ قاراۋىنا ۇسىنىلادى.
17 جەلتوقساندا قىزىلودا وبلىستىق ءماسليحات سەسسياسىندا رەسپۋبليكالىق ونوماستيكا كوميسسياسىنىڭ قاراۋىنا قىزىلوردا وبلىسىنىڭ ءبىلىم بەرۋ جانە مادەنيەت ۇيىمدارىنا اتاۋ بەرۋ جونىندەگى ۇسىنىستار قارالدى، دەپ حابارلايدى Almaty-akshamy.kz.
وبلىستىق قوعامدىق دامۋ باسقارماسىنىڭ باسشىسى ميرا قازبەكوۆا ءماسليحات دەپۋتاتتارىنا وسى كۇنگە دەيىن وڭىرلىك ونوماستيكا كوميسسياسىنىڭ وتىرىستارىندا قولداۋ تاپقان ءتيىستى باسقارمالاردىڭ ۇسىنىستارىن جەتكىزدى.
اتاپ ايتقاندا، قىزىلوردا وبلىستىق فيلارمونياسىنا كومپوزيتور كەڭەس دۇيسەكەيەۆتىڭ، ال سىرداريا اگرارلى-تەحنيكالىق كوللەدجىنە بالدىرعان مۇستاپايەۆانىڭ ەسىمىن بەرۋ ۇسىنىلدى. اتالعان باستامالار سەسسيا وتىرىسىندا قولداۋ تاۋىپ، الداعى ۋاقىتتا رەسپۋبليكالىق ونوماستيكا كوميسسياسىنىڭ قاراۋىنا ۇسىنىلادى. بۇل تۋرالى قىزىلوردا وبلىسى اكىمدىگىنىڭ باسپا ءسوز قىزمەتى حابارلادى.
كەڭەس دۇيسەكەيەۆ – قازاقستاننىڭ ەڭبەك سىڭىرگەن ونەر قايراتكەرى. 200-دەن استام شىعارمانىڭ، ونىڭ ىشىندە "تولعاۋ" سيمفونياسىنىڭ، "ءجالاڭتوس باتىر" سيمفونيا پوەما-كارتيناسىنىڭ، "و، دۇنيە" كانتاتاسىنىڭ، "جىل مەزگىلدەرى" رومانستار سيكلىنىڭ اۆتورى. ونىڭ اندەرىن روزا رىمبايەۆا، ناعيما ەسقالييەۆا، ماقپال ءجۇنىسوۆا سياقتى انشىلەر ورىنداپ ءجۇر.
"گۇلدەر" ءانسامبلىنىڭ، "قازاقكونسەرت" گاسترولدىك-كونسەرت بىرلەستىگىنىڭ مۋزىكا جەتەكشىسى، "قازاق تەلەديدارى" مۋزىكا رەداكسياسىنىڭ باس رەداكتورى، قازاقستان مەملەكەتتىك تەلەراديو كوميتەتى ەسترادالىق-سيمفونيا وركەسترىنىڭ كوركەمدىك جەتەكشىسى جانە باس ديريجەرى، "قازاقكونسەرت" گاسترولدىك-كونسەرت بىرلەستىگىنىڭ كوركەمدىك جەتەكشىسى قىزمەتتەرىن اتقارعان.
ەڭبەكتەگى تابىستارى ءۇشىن "قۇرمەت"، "پاراسات" وردەندەرىمەن، "قازاقستان رەسپۋبليكاسىنىڭ ەڭبەك سىڭىرگەن ونەر قايراتكەرى" توسبەلگىسىمەن ماراپاتتالعان.
كەڭەس دۇيسەكەيەۆ 2020 جىلعى 9 شىلدەدە ومىردەن ءوتتى.