بۇگىن قازاق ۇلتتىق قىزدار پەداگوگيكالىق ۋنيۆەرسيتەتى مەن قازاقستان شاحمات فەدەراسياسى اراسىندا سەرىكتەستىك تۋرالى كەلىسىمشارتقا قول قويىلدى، دەپ حابارلايدى aqshamnews.kz.
قۇجاتتى قازاق ۇلتتىق قىزدار پەداگوگيكالىق ۋنيۆەرسيتەتىنىڭ باسقارما توراعاسى-رەكتورى گۇلميرا قاناي مەن قازاقستان شاحمات فەدەراسياسىنىڭ ءبىرىنشى ۆيسە-پرەزيدەنتى دارمەن كاناتوۆيچ سادۆاكاسوۆ بەكىتتى.
كەلىسىمشارت اياسىندا قازاقستان شاحمات فەدەراسياسىنىڭ ادىسكەرلەرى مەن ۋنيۆەرسيتەت وقىتۋشىلارى بىرلەسىپ ازىرلەگەن «شاحمات بويىنشا پەداگوگ» Minor باعدارلاماسىن جۇزەگە اسىرۋ ماسەلەلەرى تالقىلاندى. بۇل بىرەگەي باعدارلاما بالالار مەن جاستاردى شاحماتقا ءتيىمدى ۇيرەتە الاتىن جوعارى بىلىكتى پەداگوگتەر دايارلاۋعا مۇمكىندىك بەرەدى.
شاحماتتىڭ باستاۋىش سىنىپتان باستاپ وقۋ ۇدەرىسىنە ەنگىزىلۋى ءبىلىم الۋشىلاردىڭ لوگيكالىق ويلاۋىن، ستراتەگيالىق جوسپارلاۋ داعدىلارىن، جاعدايدى تالداۋ جانە دۇرىس شەشىم قابىلداۋ قابىلەتتەرىن دامىتۋعا ىقپال ەتەدى.
«بۇگىن قازاق شاحمات فەدەراسياسى مەن QyzPU اراسىندا سەرىكتەستىك تۋرالى كەلىسىمشارتقا قول قويىلدى. كەلىسىمشارت اياسىندا ءبىرقاتار باعىتتار بويىنشا ىنتىماقتاستىق ورناتۋدى جوسپارلاپ وتىرمىز. ەڭ الدىمەن، وسى ۋنيۆەرسيتەت بازاسىندا ادىستەمەلىك ورتالىق اشۋدى قالايمىز. بۇل – ءبىزدىڭ فەدەراسيامىزعا شاحماتتىق ءبىلىم بەرۋ باعدارلاماسىن جۇزەگە اسىرۋعا كومەكتەسەدى. اتا-انالار مەن شاحماتتىڭ زياتكەرلىك قابىلەتتى دامىتاتىنىن تۇسىنەتىن جاندار تاراپىنان ۇلكەن سۇرانىس بار. سول سەبەپتى وسىنداي اۋقىمدى باعدارلاما جۇزەگە اسىرىلىپ جاتىر. وسىعان بايلانىستى مۇعالىمدەردى دايارلاۋ ماسەلەسى تۋىندايدى. ءبىز QyzPU-دىڭ قازاقستانداعى پەداگوگيكالىق ءبىلىم بەرۋ سالاسىنداعى فلاگمانعا اينالعانىن قالايمىز. مۇندا ادىستەمەلىك ورتالىق قۇرىپ، مەكتەپتەرىمىز ءۇشىن مۇعالىمدەر دايارلاۋدى بىرلەسىپ جۇزەگە اسىرۋدى جوسپارلاپ وتىرمىز. سونىمەن قاتار الداعى ۋاقىتتا پەداگوگيكالىق ۋنيۆەرسيتەتتەردىڭ تۇلەكتەرى باستاۋىش سىنىپ ءمۇعالىمى ديپلومىمەن قاتار «شاحمات پەداگوگى» سەرتيفيكاتىن دا الادى. بۇل سەرتيفيكات باستاۋىش ءبىلىم بەرۋ مۇعالىمدەرىنە مەكتەپتەردە «شاحمات» ءپانىن ۆارياتيۆتىك ءپان رەتىندە جۇرگىزۋگە مۇمكىندىك بەرەدى. تاعى ءبىر ماڭىزدى ماسەلە – ارنايى الاڭ قۇرۋ. ءبىز ۋنيۆەرسيتەت اۋماعىندا Kaz Chess Lab ورتالىعىن وسى جىلدىڭ كۇزىنە دەيىن اشۋ تۋرالى كەلىسىمگە كەلدىك. بۇل ورتالىقتا ماماندار جۇمىس ىستەپ، ستۋدەنتتەر شاحمات وينايدى، سونداي-اق ادىستەمەلىك ءبولىم بولادى – ياعني، ماماندار باعدارلامالاردى ازىرلەپ، ولاردى تۇزەتىپ، ورىندالۋىن قاداعالايدى. وسىلايشا، ءبىز بىرلەسكەن اۋقىمدى جوبانى جۇزەگە اسىرۋدى جوسپارلاپ وتىرمىز»، – دەدى قازاقستان شاحمات فەدەراسياسىنىڭ ءبىرىنشى ۆيسە-پرەزيدەنتى دارمەن كاناتوۆيچ سادۆاكاسوۆ.
قازاق ۇلتتىق قىزدار پەداگوگيكالىق ۋنيۆەرسيتەتى مەن قازاقستان شاحمات فەدەراسياسىنىڭ بىرلەسكەن جۇمىسى بالالار مەن جاستارعا شاحمات ۇيرەتۋدىڭ ساپاسىن ارتتىرۋعا باعىتتالعان. بۇل باستاما ءبىلىم بەرۋ جۇيەسىنىڭ جاڭا دەڭگەيگە كوتەرىلۋىنە جانە شاحماتتىڭ ەل ىشىندە كەڭىنەن تانىمال بولۋىنا ءوز سەپتىگىن تيگىزەرى ءسوزسىز.