قازاق ۇلتتىق قىزدار پەداگوگيكالىق ۋنيۆەرسيتەتىندە پەداگوگيكا جانە پسيحولوگيا ينستيتۋتى، پسيحولوگيا كافەدراسىنىڭ باعدارلاما كوشباسشىسى توپانوۆا گۇلميرا تۋياق قىزى مەن پروفەسسورلىق-وقىتۋشىلىق قۇرامىنىڭ ۇيىمداستىرۋىمەن «PsyLab: كاسىبي داعدىلار مەن تاجىريبە الاڭى» اتتى بىرەگەي كوپفورماتتى سەمينار ءوتتى، دەپ حابارلايدى aqshamnews.kz
سەمينارعا پەداگوگيكا مەن پسيحولوگيا سالاسىنىڭ ماماندارى، جوعارى وقۋ ورىندارىنىڭ وقىتۋشىلارى، ءبىلىم بەرۋ ۇيىمدارىنىڭ جەتەكشىلەرى مەن پسيحولوگتارى، ستەيكحولدەرلەر، قۇقىق قورعاۋ ورگاندارىنىڭ وكىلدەرى، ستۋدەنتتەر مەن جاس ماماندار قاتىستى.
«PsyLab: كاسىبي داعدىلار مەن تاجىريبە الاڭى» شاراسىنىڭ ماقساتى – ستۋدەنتتەر مەن ماماندارعا كاسىبي تاجىريبە الماسۋ مۇمكىندىگىن ۇسىنۋ، پسيحولوگيا جانە پەداگوگيكا سالاسىنداعى سوڭعى جەتىستىكتەر مەن تاجىريبەلەرمەن تانىستىرۋ، بولاشاق مامانداردىڭ كاسىبي داعدىلارىن جەتىلدىرۋ جانە ولاردى سالاداعى جەتەكشى ماماندارمەن تانىستىرىپ، مانساپتىق باعىتتارىن ايقىنداۋعا كومەك كورسەتۋ.
«بۇگىنگى سەميناردىڭ نەگىزگى باعىتى – جۇمىس بەرۋشىلەر مەن ءارتۇرلى سالاداعى پسيحولوگ ماماندارمەن كاسىبي كەزدەسىپ، تىعىز بايلانىس ورناتۋ، ستۋدەنتتەرىمىزدىڭ وقۋىن ءتامامداعاننان كەيىن جۇمىسقا ورنالاسۋىنا جول كورسەتۋ. ياعني، بىلىكتى مامانداردىڭ كەڭەستەرىن تىڭداي وتىرىپ، ستۋدەنتتەر وزدەرىنىڭ بولاشاق باعدارلارىن ايقىنداي الادى. شاراعا كەلگەن بارلىق ستەيكحولدەرلەرگە ايتار العىسىمىز شەكسىز»،-دەدى QyzPU پەداگوگيكا جانە پسيحولوگيا ينستيتۋتى، پسيحولوگيا كافەدراسىنىڭ وقىتۋشىسى ىنكار كەڭەسبەكوۆا.
سەميناردا ءبىلىم بەرۋ ۇيىمدارىنداعى پەداگوگ-پسيحولوگتىڭ ءرولى، ءبىلىم بەرۋ جۇيەسىندەگى ماڭىزى، بالالارمەن جانە جاسوسپىرىمدەرمەن جۇمىس ىستەۋدىڭ ەرەكشەلىكتەرى تانىستىرىلدى. سونداي-اق جاس مامانعا قويىلاتىن تالاپتار، جۇمىس بەرۋشىلەردىڭ كۇتەتىن داعدىلارى جانە ءبىلىم بەرۋ سالاسىنداعى مانساپتىق مۇمكىندىكتەر تۋرالى ءسوز قوزعالدى. ينكليۋزيۆتى ءبىلىم بەرۋ مەن ەرەكشە ءبىلىم بەرۋدى قاجەت ەتەتىن بالالارمەن جۇمىس ىستەيتىن پسيحولوگتاردىڭ قازىرگى ۋاقىتتا سۇرانىسقا يە ماماندىقتاردىڭ ءبىرى ەكەندىگى ايتىلدى.
كەزدەسۋدە الماتى قالاسى بويىنشا قىلمىستىق-اتقارۋ جۇيەسى دەپارتامەنتىنىڭ سوتتالعاندار اراسىنداعى تاربيەلىك، الەۋمەتتىك-پسيحولوگيالىق جۇمىس ءبولىمىنىڭ باس مامانى، ق ر ءىىم قاجك ادىلەت پودپولكوۆنيگى شىنار حۋساينوۆا كاسىبي تاجىريبەسىمەن ءبولىسىپ، ءوز سالاسىنداعى كەزدەسەتىن قيىندىقتار مەن قىزىقتى ساتتەرى تۋرالى ايتىپ، ستۋدەنتتەردى وسى سالادا جۇمىس ىستەۋگە شاقىردى.
«بۇگىن قازاق ۇلتتىق قىزدار ۋنيۆەرسيتەتىنە كەلىپ، قىلمىستىق اتقارۋ جۇيەسىنىڭ ماڭىزدىلىعىن ءتۇسىندىردىم. قوعام بولعان سوڭ، ءارتۇرلى ادام بولادى. ءبىزدىڭ جۇمىسىمىزدىڭ ماڭىزدىلىعى – قىلمىس جاساپ، باس بوستاندىعىنان ايىرۋ ورىندارىنا تۇسكەن ازاماتتارعا تاربيەلىك جانە پسيحولوگيالىق كومەك كورسەتىپ، ولاردى بوستاندىققا شىعۋعا دايىنداۋ. بۇل ماماندىقتىڭ ماڭىزى وتە جوعارى. سول سەبەپتى، بولاشاق پسيحولوگ ماماندىعىندا ءبىلىم الىپ جۇرگەن ستۋدەنتتەردى وسى سالادا بىلىكتى مامان بولۋعا شاقىرامىن»،-دەدى شىنار حۋساينوۆا.
كەزدەسۋدە ستۋدەنتتەر كاسىبي ماماندارعا وزدەرىن تولعاندىرعان سۇراقتارىن قويىپ، تۇششىمدى جاۋاپتار الدى.
«بۇگىن پسيحولوگيا سالاسىنداعى كوپتەگەن ماماندارمەن تانىسىپ، قۇندى اقپارات الدىم. بۇل كەزدەسۋ مەنىڭ ماماندىعىما دەگەن قىزىعۋشىلىعىمدى ارتتىرا ءتۇستى. ماماندىعىمنىڭ قوعامداعى ماڭىزدىلىعىنا كوز جەتكىزدىم. ءبىز ءۇشىن وسىنداي كەزدەسۋ ۇيىمداستىرعان ۇيىمداستىرۋشىلارعا العىس ايتامىن»، – دەدى «پسيحولوگيا» ءبىلىم بەرۋ باعدارلاماسىنىڭ 1 كۋرس ستۋدەنتى اسەل ەلتايەۆا.
بۇل سەمينار ستۋدەنتتەر مەن جاس ماماندارعا پسيحولوگيا سالاسىنداعى كاسىبي تاجىريبە الماسۋعا، ءوز مانساپتارىن قالىپتاستىرۋعا مۇمكىندىك بەردى. شارانىڭ ناتيجەسىندە قاتىسۋشىلار وزدەرىنىڭ بولاشاق كاسىبي باعىتتارىن ايقىنداپ، پسيحولوگيا مەن پەداگوگيكا سالاسىنداعى سۇرانىسقا يە ماماندىقتار تۋرالى ماڭىزدى اقپارات الدى.