رەسەيدەن قازاقستانعا اكەلىنگەن 500 كەلى قىزاناقتان ءقاۋىپتى ۆيرۋس تابىلدى، دەپ حابارلايدى almaty-akshamy.kz اۋىل شارۋاشىلىعى مينيسترلىگىنىڭ اگروونەركاسىپتىك كەشەندەگى مەملەكەتتىك ينسپەكسيا كوميتەتىنە سىلتەمە جاساپ.
اتالعان وقيعا باتىس قازاقستان وبلىسىنىڭ ورال اۋماقتىق ينسپەكسياسىنىڭ وسىمدىكتەر كارانتينى جونىندەگى مەملەكەتتىك ينسپەكتورلارىنىڭ مەجەلى ورنىندا ەكىنشى قايتارا تەكسەرىس جۇرگىزۋى بارىسىندا انىقتالعان. 0،5 توننا قىزاناق ونىمىنەن قىزاناق جەمىسىنىڭ قوڭىر قاتپارلى ۆيرۋسى (ToBRFV) تابىلدى.
«دەرەك بويىنشا اكىمشىلىك حاتتاما تولتىرىلىپ، تارتىبىمەن سوتقا جولداندى. اكىمشىلىك قۇقىق بۇزۋشىلىق كودەكسىنىڭ 400-بابى 2-بولىگىنىڭ 1) تارماعىنا سايكەس سوتپەن ايىپپۇل سالىندى. ساقتاۋدا تۇرعان كارانتيندىك قىزاناق ءونىمى سوت قاۋلىسىنا سايكەس جويۋعا جاتادى»، - دەلىنگەن حابارلامادا.
بۇل جاعداي كارانتيندىك نىسانداردىڭ تاسىمالداۋ كەزىندەگى قاۋىپسىزدىگىن قامتاماسىز ەتۋدىڭ ماڭىزدىلىعىن تاعى ءبىر رەت ەسكە سالدى. اۋىل شارۋاشىلىعى مينيسترلىگى الداعى ۋاقىتتا مۇنداي جاعدايلاردىڭ الدىن الۋ ءۇشىن باقىلاۋدى كۇشەيتۋگە نيەتتى.