بۇگىن، 10 ناۋرىزدا، قازاق كينوسىنىڭ التىن قورىنا اينالعان «قىز جىبەك» ءفيلمىنىڭ رەجيسسەرى سۇلتان-احمەت قوجىقوۆتىڭ تۋعانىنا 100 جىل تولدى. ايتۋلى داتاعا وراي الماتىدا «قازاقفيلم» كينوستۋدياسىنىڭ جۇلدىزدار اللەياسىنداعى ەستەلىك-جۇلدىزىنا گۇل شوقتارى قويىلدى. قازاق كسر ەڭبەك سىڭىرگەن ونەر قايراتكەرىنىڭ قۇرمەتىنە تۋىستارى، تانىمال كينەماتوگرافتار جانە «قازاقفيلم» كينوستۋدياسىنىڭ ۇجىمى جينالدى.
كورنەكتى رەجيسسەردىڭ مەرەيتويىنا ارنالعان ءىس-شارا سۇلتان-احمەت قوجىقوۆ اتىنداعى №39 مامانداندىرىلعان ليسەيدىڭ قابىرعاسىندا جالعاستى. ليسەي وقۋشىلارى شىعارماشىلىق كەش ۇيىمداستىرىپ، قوناقتارعا مەرەيتوي يەسىنىڭ ءومىرى مەن شىعارماشىلىعىنان تەاترلاندىرىلعان قويىلىم ۇسىندى.
ءىس-شاراعا س.قوجىقوۆتىڭ جيەنى ساۋلە قوجىقوۆا، بەلگىلى كينو قايراتكەرلەرى: رەجيسسەر بولات ءشارىپ، اكتەر-پروديۋسەر ولجاباي مۇسابەكوۆ، س. قوجىقوۆ تۋرالى تۇسىرىلگەن «ۆوينا ي مير» دەرەكتى ءفيلمىنىڭ اۆتورى بولات نۇسىمبەكوۆ، رەجيسسەر-دوكۋمەنتاليست ساتىبالدى تەكەيەۆ، تانىمال اكتەر ەربولات توعىزاقوۆ جانە قالانىڭ ءبىلىم بەرۋ ۇيىمدارىنىڭ باسشىلارى قاتىستى.
«قىز-جىبەك» ءفيلمىنىڭ جاسالۋ تاريحى تۋرالى قازاقستان رەسپۋبليكاسىنىڭ ەڭبەك سىڭىرگەن قايراتكەرى، «قۇلاگەر» ۇلتتىق كينوسىيلىعىنىڭ لاۋرەاتى، وسى اڭىزعا اينالعان فيلمدە باس رەجيسسەردىڭ كومەكشىسى بولىپ جۇمىس ىستەگەن رەجيسسەر بولات ءشارىپ ايتىپ بەردى.
«مەملەكەتتىك كينوعا تاقىرىپتىق جوسپاردى بەكىتۋ ءۇشىن ماسكەۋگە بارعان كەزەكتى ساپارىندا بۇرىنعى كينوستۋديا باسشىسى كامال سمايىلوۆكە ۇسىنىلعان سەنارييلەردىڭ ءبىرىن بەكىتپەدى. سودان مەملەكەتتىك كوميتەتتىڭ باس رەداكتورىن كامال سەيتجان ۇلى وعان باسقا، نەعۇرلىم قولايلى سەنارييمەن الماستىرۋعا ۋاقىت بەرۋگە كوندىردى. الماتىعا ورالعان سوڭ، ول عابيت مۇسىرەپوۆكە قوڭىراۋ شالىپ، «قىز جىبەك» پەساسىن كينوسەنارييگە اينالدىرۋدى ءوتىندى. ع.مۇسىرەپوۆ ءبىر اي ىشىندە سمايىلوۆتىڭ تاپسىرماسىن ورىندادى. وسىلايشا سەناريي قۇتقارىلىپ، كەيىننەن ۇلتتىق كينوشەديەۆرگە اينالدى»، – دەپ بولات ءشارىپ ەستەلىكتەرمەن ءبولىستى.
ايتا كەتكەن ءجون، سۇلتان-احمەت قوجىقوۆ 1923 جىلى 10 ناۋرىزدا دۇنيەگە كەلگەن. ول ءوزىنىڭ ەڭبەك جولىن 1953 جىلى ينستيتۋت بىتىرگەننەن كەيىن كينوستۋديادا باستادى. قوجىقوۆتىڭ العاشقى تاۋەلسىز تۋىندىسى – «انا مەن بالا» بولدى، كەيىنىرەك «ءبىز جەتىسۋدانبىز» كارتيناسىن ءتۇسىردى. س.قوجىقوۆتىڭ قازاق كينو ونەرىنىڭ ءتولقۇجاتىنا اينالعان «قىز جىبەك» كينوتۋىندىسىنىڭ پرەمەراسىنا بيىل 50 جىل تولدى.