زاڭداعى جاڭا وزگەرىستەرگە سايكەس قىسىم كورسەتۋ ارقىلى نەكەگە ماجبۇرلەۋ ءۇشىن 2 جىلعا دەيىن، اۋىر زارداپتار بولسا، 10 جىلعا دەيىن باس بوستاندىعىنان ايىرۋ جازاسى كوزدەلەدى، دەپ حابارلايدى aqshamnews.kz
قىلمىستىق كودەكسكە نەكەگە تۇرۋعا ماجبۇرلەۋ ءۇشىن قىلمىستىق جاۋاپتىلىق كوزدەلگەن جاڭا 125-1-بابى ەنگىزىلدى، دەپ حابارلادى باس پروكۋراتۋرا.
اتالعان زاڭعا مەملەكەت باسشىسى 2025 جىلدىڭ 16 شىلدەسىندە قول قويدى.
ماجبۇرلەۋ، اسىرەسە قىسىم، قورقىتۋ، پسيحولوگيالىق نەمەسە فيزيكالىق زورلىق كورسەتۋ – بۇل ادامنىڭ نەگىزگى قۇقىقتارىن بۇزۋ بولىپ تابىلادى.
باس پروكۋراتۋرانىڭ حابارلاۋىنشا، كوپتەگەن ەلدە مۇنداي ارەكەت اۋىر قىلمىس رەتىندە قاراستىرىلادى، سەبەبى ءماجبۇرلى نەكە وقشاۋلاۋ، ەركىندىكتى شەكتەۋ، زورلىق-زومبىلىق جانە كەيبىر جاعدايلاردا قۇربانداردىڭ وز-وزىنە قول جۇمساۋ ارەكەتتەرىمەن قاتار ءجۇرۋى مۇمكىن. ءتىپتى ءبىرقاتار ەلدە مۇنداي نەكە ادام ساۋداسىنىڭ ءبىر ءتۇرى رەتىندە تانىلادى.
"سوڭعى 5 جىلدا قازاقستاندا وسىنداي 257 قىلمىستىق ءىس تىركەلدى، ولاردىڭ 95%-ى توقتاتىلدى. جاڭا زاڭناماعا سايكەس، قورقىتۋ، بوپسالاۋ، كۇش قولدانۋ نەمەسە باسقا دا قىسىم كورسەتۋ ارقىلى نەكەگە ماجبۇرلەۋ ءۇشىن 2 جىلعا دەيىن، ال ەگەر اۋىر زارداپتار بولسا – 10 جىلعا دەيىن باس بوستاندىعىنان ايىرۋ جازاسى كوزدەلەدى"، - دەپ جازىلعان حابارلامادا.
سونداي-اق قىلمىستىق كودەكستىڭ 125-بابىنا وزگەرىستەر ەنگىزىلىپ، جابىرلەنۋشىنى ەرىكتى تۇردە بوساتسا دا، ءىستى توقتاتۋعا جول بەرىلمەيدى. ەندى ءماجبۇرلى نەكەگە تۇرۋ ماقساتىندا ايەلدى ۇرلاۋ قىلمىستىق كودەكستىڭ 125 جانە 125-1-باپتارىنىڭ جيىنتىعى بويىنشا سارالانادى.