مەگاپوليستەگى №7 قالالىق كلينيكالىق اۋرۋحانانىڭ ورتوحيرۋرگيا بولىمشەسىندە زاماناۋي ارتروسكوپيا ادىسىمەن كۇردەلى وتا جاسالدى، دەپ حابارلايدى اۋرۋحانانىڭ باسپا ءسوز قىزمەتى.
بولىمشە مەڭگەرۋشىسى ارنات بايزاقوۆتىڭ ايتۋىنشا، ارتروسكوپيا كىشىگىرىم تىلىكتەر ارقىلى شاعىن ءينۆازيۆتى وتا جاساۋعا مۇمكىندىك بەرەدى. سونى تەحنولوگيا ارقاسىندا بۋىننىڭ بۇلىنگەن بولىكتەرىن قاتتى زاقىمداماي قالپىنا كەلتىرۋگە بولادى. ءارى مۇنداي ادىسپەن جاسالعان وتادان كەيىن ناۋقاس دەنساۋلىعىن قالپىنا كەلتىرۋ مەرزىمى دە قىسقارادى.
19 جاستاعى پاسيەنت ءبىر جارىم جىل بۇرىن قۇلاپ، يىعىن جاراقاتتاپ العان. كونسەرۆاتيۆتى ەمنەن ناتيجە بولماعان، ءبىراق جاس جىگىت ورتوحيرۋرگتەردىڭ كومەگىنە جۇگىنۋگە اسىقپاپتى. سالدارىنان جىگىتتىڭ يىعى وسى ۋاقىت ىشىندە 13 رەت شىعىپ ۇلگەرگەن.
«دياگنوستيكا بارىسىندا ناۋقاستىڭ يىعى شىعىپ، يىقتاعى سۇيەكتىڭ باسى سىنعانى، جاۋىرىن مەن بۋىن ەرنەۋى زاقىمدانعانى انىقتالدى. ادەتتە مۇنداي دياگنوز قويىلعان جاعدايدا وپەراسيا اشىق ادىسپەن جاسالادى. ءبىراق سىرقاتتىڭ انامنەزىن، جاسىن، سپورتپەن شۇعىلداناتىنىن ەسكەرە وتىرىپ، شاعىن ءينۆازيۆتى تەحنيكانى قولدانۋ تۋرالى شەشىم قابىلداندى»، – دەپ اتاپ ءوتتى ارنات بايزاقوۆ.
حيرۋرگتەر بىردەن ەكى وپەراسيا جاسادى. ءبىرىنشىسى: الدىڭعى ءسىڭىر ەرنەۋىن قالپىنا كەلتىرۋگە باعىتتالعان بانكارت وتاسى. ەكىنشىسى: يىق بۋىنىنىڭ ارتقى بولىگىن بەكىتۋگە ارنالعان رەمپليسساج دەپ اتالاتىن وپەراسيا. وپەراسيالار ءمامس قاراجاتى ەسەبىنەن جاسالدى. اۋرۋحانادان شىققان سوڭ پاسيەنت 6 ايعا دەيىن رەابيليتاسيادان ءوتۋى ءتيىس.
بۇرىن مۇنداي وتالار ۇلكەن تىلىك ارقىلى، اشىق ادىسپەن جاسالاتىن. سالدارىنان اسقىنۋ ءقاۋپى ارتىپ، قالپىنا كەلتىرۋ مەرزىمى دە ۇزاراتىن، بۇل جولعى وپەراسيانىڭ بىرەگەيلىگى دە وسىندا، دەيدى مامان.
قازىرگى زامانعى ارتروسكوپيا وتا بارىسىندا بولاتىن زاقىمدانۋ مەن ينفەكسيانىڭ الدىن الۋعا، وڭالتۋ پروسەسىن تەزدەتۋگە مۇمكىندىك بەرەدى. سەبەبى قولدانىلاتىن بەينەكامەرالار دالدىكتى ارتتىرادى، ال، وزدىگىنەن ىدىرايتىن بيويمپلانت ۋاقىت وتە كەلە سۇيەك تىنىمەن ارالاسىپ كەتەدى. ياعني، قايتا وتا جاساۋدى قاجەت ەتپەيدى.
«وتا كىشىگىرىم تەسىكتەر ارقىلى جاسالدى. ءبىراق ناتيجەسى اشىق وپەراسيادان كەم ەمەس جانە مۇندا ناۋقاس ومىرىنە، دەنساۋلىعىنا تونەتىن ءقاۋىپ ەداۋىر ازايادى. زاماناۋي بەكىتكىشتەر مەن يمپلانتتار وتانىڭ قاۋىپسىزدىگى مەن تيىمدىلىگىن ارتتىرادى»، – دەيدى ارنات بايزاقوۆ.