قىتايدىڭ ەڭ ۇلكەن تاكلاماكان شولىندە كولدەر پايدا بولدى

بيىل جازدا قىتايدا بولعان اپتاپ ىستىق شىڭجاڭ مۇزدىقتارىنىڭ ەرىپ، سۋ تاسقىنىنا اينالۋىنا سەبەپ بولعان

قىتايدىڭ شىڭجاڭ ۇيعىر اۆتونوميالىق اۋدانىندا (ش ۇ ا ر) ورنالاسقان تاكلاماكان شولىندە كوپتەگەن كولدەر پايدا بولدى، دەپ حابارلايدى Almaty-akshamy.kz قازاقپاراتقا سىلتەمە جاساپ. 

CCTV تەلەارناسىنىڭ حابارلاۋىنشا، قىتايدىڭ ەڭ ۇلكەن شولىندەگى كولدەر تارىم وزەنىندە سوڭعى 10 جىلداعى ەڭ ۇلكەن سۋ كولەمى تىركەلگەننەن كەيىن پايدا بولدى، ناتيجەسىندە سۋ توبەلەرگە اعىپ كەتتى.

شىڭجاڭ سۋ شارۋاشىلىعى باسقارماسىنىڭ مالىمەتىنشە، مامىر ايىنىڭ اياعىنان قىركۇيەك ايىنىڭ سوڭىنا دەيىن تارىم وزەنىنىڭ باستاۋىنداعى اعىن سۋ بۇرىنعى جىلدارداعى وسى كەزەڭمەن سالىستىرعاندا 1،5 ەسە ارتقان.

بۇل 1957 جىلى ولشەۋ جۇرگىزىلگەننەن بەرگى ەڭ قۋاتتى اعىن بولدى.

قحر رەسۋرستارى مينيسترلىگىنىڭ مالىمدەمەسىنە سايكەس، بيىل جازدا قىتايدا بولعان اپتاپ ىستىق شىڭجاڭ مۇزدىقتارىنىڭ ەرىپ، سۋ تاسقىنىنا اينالۋىنا سەبەپ بولدى.

بيىل تارىم وزەنىنىڭ نەگىزگى اعىسىنداعى سۋ تاسقىنى مامىر ايىنان باستاپ قاتارىنان 80 كۇنگە جالعاستى.

تاكلاماكان ءشولى 337 مىڭ شارشى كم اۋماقتى الىپ جاتىر. جاۋىن-شاشىننىڭ جىلدىق ورتاشا مولشەرى ادەتتە 100 ميلليمەتردەن اسپايدى.

تارىم - تاكلاماكان ءشولىنىڭ سولتۇستىك شەكاراسىمەن اعىپ وتەتىن قىتايداعى ەڭ ۇزىن ىشكى وزەن.