ۇلتتىق پالاتا تۇرىپ قالعان كونتەينەرلەردىڭ دەرەكتەرىن جيناپ جاتىر
لوگيستيكا ماسەلەلەرى ءالى دە نازاردا قالىپ وتىر. جۇڭگو حالىق رەسپۋبليكاسىنان جۇكتى تەمىرجول ارقىلى تاسىمالداۋدىڭ شەشىمى تابىلدى. بۇل تۋرالى Almaty-akshamy.kz «اتامەكەن» ۇلتتىق كاسىپكەرلەر پالاتاسىنىڭ باسپا ءسوز قىزمەتىنە سىلتەمە جاساپ حابارلايدى.
«اتامەكەن» ۇلتتىق كاسىپكەرلەر پالاتاسى جۇكتى كولىكپەن تاسىمالداۋ ماسەلەسىن شەشۋگە قاتىستى ۇسىنىستاردى پىسىقتاپ جاتىر.
ءقازىر قىتاي-قازاقستان شەكاراسىندا كولىك قۇرالدارىنىڭ كەپتەلىسى تىركەلمەگەن. الايدا، جۇكتى جەتكىزۋ مەرزىمى قىسقارمادى. جۇڭگو اۋماعىندا (پورتتار، ستانسيالار)، سونىڭ ىشىندە كورەيا، جاپونيا، وڭتۇستىك-شىعىس ازيا ەلدەرىنەن ترانزيتپەن كەلگەن ەكى مىڭنان اسا كونتەينەر تۇر.
ۇلتتىق پالاتا تۇرىپ قالعان كونتەينەرلەردىڭ دەرەكتەرىن جيناپ جاتىر. «قازاقستان تەمىر جولى» ۇك» اق جانە قحر تەمىرجول وكىلدەرىمەن كەلىسسوزدەر بارىسىندا جۇڭگو تاراپى قازاقستاندىق كونتەينەرلەردى جەدەل جونەلتۋگە جاردەمدەسەتىن ايتتى. قازاقستاننىڭ يندۋستريا جانە ينفراقۇرىلىمدىق دامۋ مينيسترلىگى مەن سىرتقى ىستەر مينيسترلىگى پروسەستى جەدەلدەتۋگە قوسىلدى.
بۇل رەتتە شەكارادا قالىپ قويعان جۇك كولىكتەرىنىڭ ەلەكترون كەزەگى ماسەلەسى ءالى شەشىلمەگەن.
«COVID-19 پاندەمياسى باستالعان كەزدە جۇڭگو بيلىگى شەكتەۋلەر ەنگىزدى. سونىڭ سالدارىنان وتكىزۋ بەكەتتەرىنىڭ جىلدامدىعى ايتارلىقتاي تومەندەپ كەتتى. ەگەر پاندەمياعا دەيىن «نۇر جولى» وتكىزۋ بەكەتى تاۋلىگىنە 200-گە دەيىن كولىك قۇرالىن وتكىزگەن بولسا، ءقازىر تاۋلىگىنە نەبارى 10-15 كولىك وتەدى»، – دەدى ۇكپ لوگيستيكا جانە تاسىمالداۋ دەپارتامەنتىنىڭ ديرەكتورى مۇرات امرين.
جۇكتى جەتكىزۋ مەرزىمى – كاسىپكەرلەر ءۇشىن وزەكتى ماسەلە. ويتكەنى بۇل بيزنەستىڭ قالىپتى جۇمىسىنا كەرى اسەر ەتەدى. مۇنىڭ ىشىندە شيكىزاتتىڭ كەشىگۋى، كەلىسىمشارت اياسىنداعى قاتىناستاردى بۇزۋ ءقاۋپى جانە باسقا ماسەلەلەر بار. ۇلتتىق پالاتا بەكەتتەردەن ءوتۋ پروسەدۋرالارىن قالاي وڭتايلاندىرىپ، جەڭىلدەتۋگە بولاتىنىن ءتۇسىنۋ ءۇشىن مەملەكەتتىك ورگاندارمەن بىرلەسىپ، تالداۋ جۇرگىزىپ جاتىر.
ۇلتتىق پالاتا ماماندارى شەشىم رەتىندە قحر ۇكىمەتىنە قولدانىستاعى شەكتەۋلەردى الىپ تاستاۋ جانە پاندەمياعا دەيىنگى شەكارادان ءوتۋ پروسەدۋراسىن قايتارۋدى سۇراپ، حات جولداۋدى ۇسىندى.
پروسەستەردى سيفرلاندىرۋ دا ماسەلەنى شەشۋى مۇمكىن. مىسالى حالىققا «ءبىر تەرەزە» قاعيداتى بويىنشا قىزمەت كورسەتۋگە مۇمكىندىك بەرەتىن حالىقارالىق ەلەكترون پلاتفورمانى ەنگىزۋ جوسپارلانعان.