جۇڭگو حالىق رەسپۋبليكاسىنان قازاقستان استاناسىنا قاراي جاياۋ شىققان مارافونشى ەسبول اسقار ۇلى ەلورداعا جاقىنداپ قالدى. ول الداعى بىرەر كۇندە استانادا بولادى، دەپ حابارلايدى Almaty-akshamy.kz.
ەسبول اسقار ۇلى 2023 جىلدىڭ 1 مامىر كۇنى ءوزىنىڭ تۋعان جەرى، شىڭجاڭنىڭ ماناس اۋدانىنان اتاجۇرتتى بەتكە الىپ، استاناعا دەيىن جاياۋ مارافونىن باستاعان ەدى. مارافونشى ءقازىر 3 مىڭ شاقىرىمنان استام جولدى ارتتا قالدىرىپ، ارمانىن اقيقاتقا اينالدىرۋعا جاقىنداپ قالدى. باستى ماقساتى – ەكى ەلدىڭ دوستىعىن ناسيحاتتاپ، استاناعا الىستاعى قانداستاردىڭ اق سالەمىن جەتكىزۋ. سونىمەن بىرگە ەسبول قازاقستاننىڭ كەڭ بايتاق دالاسىن، كورىكتى جەرلەرىن ەلگە تانىستىرعىسى كەلەدى. تاريحي ورىنداردى ەستەلىككە سۋرەتكە ءتۇسىرىپ، الەۋمەتتىك جەلىلەردە جاريالاۋدى ءوز وقىرماندارىنا ۋادە ەتكەن،-دەپ جازدى قازاقپارات.
«مەن – الەمگە تارىداي شاشىلعان قاراكوز قازاقتىڭ ءبىر ۇلىمىن. 2019 جىلى قازاقستان پرەزيدەنتى قاسىم-جومارت كەمەل ۇلى قىتايعا بارعان ساپارىندا تەلەارنادان سۇحباتىن كوردىم. ول كىسىنىڭ قازاق تىلىندە ايتقان قانداستار تۋرالى ءسوزى مەنى قاتتى تەبىرەنتتى. سول كەزدە مەن وسى ساپاردى ارمانداعان ەدىم. 4 جىل دايىندىقتان كەيىن، مارافوندى باستاۋدىڭ ءساتى ءتۇستى. قازاق ەلىنە وتكەلى ەرەكشە اسەردەمىن. جولدا ادامدارىڭ ءبارى جاقسى قارسى الىپ، شىعارىپ سالىپ جاتىر. قازاقتىڭ داستۇرىمەن قىمىز، باۋىرساق الىپ شىعىپ، كۇتىپ الادى، شىعارىپ سالادى. ءبارى كومەكتەسكىسى كەلەدى. بۇل مەنىڭ جىگەرىمە جىگەر قوسىپ، ارمانىما قانات بىتىرگەندەي. كۇنىنە 30-40 شاقىرىم جول جۇرەمىن. ارقامداعى سومكەمدا وزىمە قاجەتتى زاتتاردىڭ ءبارى، كەيدە دەمالىپ، تىنىعاتىن كىشكەنە شاتىرىم دا بار»، - دەيدى ەسبول اسقار ۇلى.
ول ءقازىر قاراعاندى وبلىسىنىڭ اۋماعىندا.
ەسبول اسقار ۇلى 1997 جىلى 1 مامىر كۇنى جۇڭگو حالىق رەسپۋبليكاسىنىڭ شىڭجاڭ اۆتونومياسى سانجى ايماعى، ماناس اۋدانىندا تۋعان. اتا-اناسى ەرتە قايتىس بولىپ، ناعاشى جۇرتىنىڭ قولىندا ەرجەتىپتى.
