قىتايداعى ەلەكتروندى ساۋدا الاڭىندا قازاقستاندىق ونىمدەرگە سۇرانىس ارتتى.
بيىل مامىر ايىندا پرەزيدەنت قاسىم-جومارت توقايەۆ كورشى ەلگە ساپارى كەزىندە ۇلتتىق پاۆيلونىمىزدى اشقان ەدى. ساپالى ونىمدەرىمىز دۇكەن سورەلەرىندە كوپ تۇرمايدى. جۇرت جاپپاي الىپ كەتەتىن كورىنەدى، دەپ حابارلايدى Almaty -akshamy. kz.
24.kz اقپاراتىنا ساي، ونلاين ۇلتتىق پاۆيلونىمىزدا ۇن، وسىمدىك مايى، تۇيە ءسۇتى، شاي سياقتى 20 شاقتى ءونىم ساتىلادى. جەرگىلىكتى تۇرعىنداردىڭ قازاقستاندىق تاۋارلارعا دەگەن ىقىلاسى ەرەكشە. JD ەلەكتروندىق ساۋدا الاڭىندا قازاقستاندىق پاۆيلوننىڭ اشىلعانىنا 1،5 ايداي بولدى. ونى قۇرعان قىتايلىق بىرلەستىك الەمدەگى 500 ءىرى كومپانيانىڭ ىشىندە 46-شى ورىندا تۇر. ونلاين دۇكەننىڭ تۇتىنۋشىلارى 600 ميلليوننان اسادى.
«قازاقستاندىق پاۆيلون اشىلا سالىسىمەن تاۋاردىڭ 80 پايىزى 1 ساعاتتىڭ ىشىندە ساتىلىپ كەتتى. ءقازىر قازاق ونىمدەرى بولىمىنە جازىلۋشىلار سانى 110 مىڭعا جۋىقتادى. ءبىز كەلەشەكتە ول ونىمدەردى وسى پاۆيلوندا عانا ەمەس كومپانيامىزدىڭ وزگە دۇكەندەرىنە ساتا الامىز»، - دەيدى كومپانيا باسقارماسىنىڭ ءتوراعاسى چجان سزيان
بىرلەستىكتىڭ ەلەكتروندىق ساۋدا الاڭىندا 50-دەن استام ەلدىڭ پاۆيلونى بار. كومپانيا وكىلدەرى يمپورتتىق تاۋارلاردى ساتىپ العىسى كەلەتىن تۇرعىندار قاراسى ارتىپ كەلە جاتقانىن ايتادى. بۇل تاۋرلاردىڭ تابيعي تازا بولۋىنان دەيدى ماماندار.
«ءبىزدىڭ الاڭىمىزدا ساتىلاتىن قازاقستاندىق ونىمدەردىڭ اراسىنان قۇرعاق تۇيە ءسۇتى مەن ۇندى ەرەكشە اتاپ وتكىم كەلەدى. قىتايدا تۇيە ءسۇتى نارىعى تەز دامىپ كەلەدى. 9 جىل بۇرىن ونىڭ كولەمى 9 ميلليارد يۋان ەدى. بيىل 20 ميللياردتان استى. ءبىراق ءونىم تاپشى. قازاقستاننان كەلەتىن تۇيە ءسۇتى وسى سۇرانىستى تولتىرىپ جاتىر. ال قازاقستاندىق ۇن ءدامدى ءارى ەكولوگيالىق تازا دەپ سانالادى»،- دەيدى JD Group كومپانياسىنىڭ ۆيسە-پرەزيدەنتى ە. ۆەي.
قىتايدا ەلەكتروندى ساۋدا نارىعى 31 تريلليون يۋانننان اسادى. بۇل سالاداعى ىنتىماقتاستىقتى كەڭەيتۋ ەكى ەل اراسىنداعى تاۋار اينالىمىن ۇلعايتۋعا مۇمكىندىك بەرەدى.