جۇڭگو ولكەلەرىنىڭ سۋ قويمالارىنان بالىقتىڭ ەكزوتيكالىق ءتۇرى – تاس قابىقتى شورتان اۋلاندى. وسىعان وراي جۇڭگو ەكولوگتارى دابىل قاعىپ، بالىقتىڭ جات جەرلىك ءتۇرى جەرگىلىكتى ەكوجۇيە ءۇشىن ناعىز اپات بولۋى مۇمكىن ەكەندىگىن ەسكەرتۋدە، دەپ حابارلايدى Almaty-akshamy.kz Inform.kz-كە سىلتەمە جاساپ.
تاس قابىقتى شورتان بالىعى سولتۇستىك امەريكادا كەڭىنەن تارالعان. ال بيىل قىتايدىڭ حەنان، حۋنان، شاندۋن، يۋننان ولكەلەرىندەگى، گۋانسي-چجۋان اۆتونومدى اۋدانىنداعى، سونىمەن قاتار جۇڭگو استاناسى – بەيجىڭدەگى سۋ قويمالارىنان تابىلعان.
ءبىر تاس قابىقتى شورتاندى اۋلاۋ ءۇشىن حەنان (ورتالىق جۇڭگو) ولكەسىنە قاراستى جۋچجوۋ قالاسى ساياباقتارىنىڭ بىرىندەگى سۋ قويماسىنان 200 مىڭ تەكشە مەتر سۋدى اعىزۋعا تۋرا كەلگەن.
سوڭعى بىرنەشە جىلدىڭ ىشىندە تاس قابىقتى شورتان بالىعى گۋاندۋن، فۋسزيان، سىچۋان مەن سزيانسۋ ولكەلەرىندەگى جابايى تابيعاتتا كوزگە تۇسكەن.
باسىلىمنىڭ جازۋىنشا، تاس قابىقتى شورتان جۇڭگو ءۇشىن بالىقتىڭ ەكزوتيكالىق ءتۇرى سانالادى. ونىڭ تابيعي سۋ قويمالارىندا جاپپاي تارالۋى جەرگىلىكتى سۋ ەكوجۇيەسىنە ايتارلىقتاي ءقاۋىپ ءتوندىرۋى مۇمكىن. قىتايدا تاس قابىقتى شورتاننىڭ كەڭىنەن تارالۋى بالىقتىڭ بۇل ءتۇرىن ەل نارىعىندا ساتۋ ءۇشىن ءوسىرۋ بولۋى ىقتيمال. بالىقتىڭ بۇل ءتۇرى وتە جىلدام كوبەيەدى.
جۇڭگو بۇقارالىق اقپارات قۇرالدارىنىڭ اقپاراتىنا قاراعاندا، سوڭعى جىلدارى قىتايدا بالىقتىڭ 600-دەن ءتۇرى انىقتالسا، ونىڭ 71ء-ى ەلدىڭ تابيعي ەكوجۇيەسىنە قاتەر توندىرەتىندىگى انىقتالعان.