قىتايدا حالىق وكىلدەرى جيىنى جانە حالىقتىق ساياسي كونسۋلتاتيۆتىك كەڭەسىنىڭ سەسسيالارى باستالدى. بۇل جينالىستىڭ رەسمي بەيجىڭ ءۇشىن ماڭىزى زور. الەمدىك گەوساياسي جاعداي كۇردەلەنگەن تۇستا كورشى مەملەكەت قاۋىپسىزدىك شاراسىن كۇشەيتۋگە مۇددەلى، -دەپ حابارلايدى اlmaty-akshamy.kz «حابار 24» سىلتەمە جاساپ.
بەيجىڭدە سوڭعى كۇندەرى قاۋىپسىزدىك سالاسىنا ەرەكشە ءمان بەرىلدى. ونىڭ باستى سەبەبى – جۇڭگو استاناسىنىڭ نازارىن اۋدارعان جىلدىڭ باستى ىشكى ساياسي وقيعاسى – «ەكى سەسسيا». بۇل – بيلىك جۇمىسىن قورىتىندىلاۋ جانە بولاشاققا ارنالعان مىندەتتەردى انىقتاۋ. ماسەلەن، ءجىو وسىمدىك كورسەتكىشى 5% دەپ جاريالاندى.
لي كەسيان، قحر ۇكىمەتىنىڭ باسشىسى: - تۇتىنۋدى قالپىنا كەلتىرۋ جانە كەڭەيتۋ اسا ماڭىزدى. قالا جانە اۋىل حالقىنىڭ تابىسىن ارتتىرۋ، ينۆەستيسيالار مەن ىنتالاندىرۋ شارالارى بۇكىل قوعامدى وڭ وزگەرىستەرگە الىپ كەلۋى ءتيىس.
وتكەن جىلى جۇڭگو ەكونوميكاسى 5،5%-كە ءوسۋى ءتيىس ەدى. الايدا كورسەتكىش 3%-تەن اسپادى. ساراپشىلار بۇل ماقساتقا بيىل جەتەتىنە سەنىمدى. الەم جۇرتشىلىعىن تولعاندىراتىن تاعى ءبىر ماسەلە – اسكەري شىعىندار. بيىل بۇل ماقساتتارعا 225 ملرد دوللار جۇمسالدى. جەرگىلىكتى قورعانىس مينيسترلىگى قاراجات تەك ۇلتتىق ەگەمەندىك پەن قاۋىپسىزدىكتى قورعاۋعا باعىتتالالى دەيدى. ۇكىمەت سونىمەن قاتار شەتەلدىك ينۆەستيسيالاردى قارقىندى تۇردە تارتۋعا جانە يۋاننىڭ باعامىن ساقتاۋعا نيەتتى. 12 ملن-عا جۋىق جاڭا جۇمىس ورنى اشىلادى، - دەپ ۋادە ەتتى.
لي كەسيان، قحر ۇكىمەتىنىڭ باسشىسى: - قورشاعان ورتا لاستانۋىنىڭ الدىن الۋ قاجەت. قالادا جانە اۋىلدا ەكولوگيالىق ينفراقۇرىلىم قۇرىلىسىن كۇشەيتۋ، اسا ماڭىزدى ەكوجۇيەلەردى قورعاۋ جانە قالپىنا كەلتىرۋ بويىنشا ءىرى جوبالاردى دايەكتى تۇردە جۇزەگە اسىرۋ ماقساتى تۇر. كومىردى ەكولوگيالىق تازا پايدالانۋ بويىنشا جۇمىستى كۇشەيتۋ، جاڭا ەنەرگيا كوزدەرىنىڭ جۇيەسىن قالىپتاستىرۋ قاجەت.
سونىمەن بيىلعى «ەكى سەسسيانىڭ» دەگەن قىزىعۋشىلىق ەرەكشە. سەبەبى ول جۇڭگو كومپارتياسىنىڭ XX سەزىنەن كەيىن ءوتىپ جاتىر. سونداي اق قحر ءتوراعاسى سي سزينپين ءۇشىنشى مەرزىمگە قايتا سايلانادى دەپ كۇتىلىپ وتىر. 5 جىل بۇرىن كونستيتۋسياعا ەنگەن وزگەرىستى ەسكەرسەك، بۇل بولجامنىڭ جۇزەگە اسۋى ابدەن مۇمكىن.