2013 جىلدان بەرى 10 جىل ىشىندە الاشانكوۋ (جۇڭگو) – دوستىق (قازاقستان) شەكارالىق وتكەلى ارقىلى 36 600-دەن استام پويىز، ال 2016 جىلدان بەرى قورعاس قۇرعاق پورتى ارقىلى ەۋروپا ەلدەرىنە جانە قاراما-قارسى باعىتتا جۇكتەرى بار 33 400-دەن استام پويىز ءوتتى
بۇگىنگى تاڭدا ەكى شەكارالىق وتكەل دە 200 ساناتتاعى جۇكتەرى بار قىتاي-ەۋروپا جانە ەۋروپا-قىتاي پويىزدارىنىڭ جالپى سانىنىڭ جارتىسىنان كوبى وتەدى، دەپ حابارلايدى Almaty-akshamy.kz Rail-news.kz-كە سىلتەمە جاساپ.
قىتايدىڭ ونەركاسىپ ورتالىقتارىن ەۋروپانىڭ 25 جانە 18 ەلىندەگى ساۋدا سەرىكتەستەرىمەن بايلانىستىراتىن «الاشانكوۋ-دوستىق» شەكارا وتكەلى ارقىلى 115 باعىت، ال قورعاس-التىنكول ارقىلى 80 باعىت بار.
ترانسشەكارالىق تاسىمالداۋدىڭ تيىمدىلىگىن ارتتىرۋ ماقساتىندا جۇڭگو شەكارالىق ستانسيالاردىڭ وتكىزۋ قابىلەتىن ارتتىرۋ شارالارىمەن قاتار تەحنولوگيالىق پروسەستەردى وڭتايلاندىرۋدا. ناتيجەسىندە 2023 جىلعا قاراي وسى شەكارا وتكەلدەرىندە ءبىر پويىزدى وڭدەۋ ۋاقىتى 12 ساعاتتان 6–8 ساعاتقا دەيىن قىسقارتىلدى. سونىمەن قاتار قازاقستان ءوزىنىڭ ترانزيتتىك الەۋەتىن ارتتىرۋعا باعىتتالعان ءبىرقاتار جوبالاردى جۇزەگە اسىرۋدا، ونىڭ ىشىندە قىتايمەن وتكەلدەگى شەكارالىق وتكىزۋ قابىلەتىن دە ارتتىرۋدا. ءۇشىنشى باقتى-چۋگۋچاك تەمىرجول وتكەلى سالىنۋدا، ول قىتاي-قازاقستان شەكاراسىنداعى پويىز وتكىزۋ پۋنكتتەرىنىڭ جالپى وڭدەۋ قۋاتىن جىلىنا 28-دەن 48 ميلليون تونناعا دەيىن ۇلعايتۋعا مۇمكىندىك بەرەدى.
ايتا كەتسەك، مەملەكەت باسشىسى قاسىم-جومارت توقايەۆ كولىك-لوگيستيكالىق الەۋەتتى دامىتۋدى ۇكىمەت جۇمىسىنىڭ نەگىزگى باسىمدىقتارىنىڭ ءبىرى رەتىندە بەلگىلەگەن بولاتىن.
«ءقازىر الەمدە جاڭا ەكونوميكالىق كەڭىستىك قالىپتاسىپ جاتىر. قىتايدان ەۋروپاعا، رەسەيگە، ورتالىق ازياعا جانە وسى ايماقتاردان قىتايعا جىبەرىلەتىن تاۋار كولەمى ايتارلىقتاي كوبەيەدى دەگەن بولجام بار. قازاقستان سولتۇستىك پەن وڭتۇستىكتى، باتىس پەن شىعىستى بايلانىستىراتىن جاھاندىق جولايرىقتا ورنالاسقان. بۇل ءبىزدىڭ ەلىمىزگە زور مۇمكىندىك بەرىپ وتىر. سوندىقتان كولىك-لوگيستيكا سالاسى ەكونوميكامىزدى العا باستايتىن باستى كۇشتىڭ بىرىنە اينالۋعا ءتيىس»، — دەدى ەل پرەزيدەنتى حالىققا جولداۋىندا.
ەلىمىز قىتايدان ەۋروپاعا بەت العان جۇك تاسقىنىن ارتتىرۋ باعىتىندا ينفراقۇرىلىمدى جاقسارتۋعا باسىمدىق بەرىپ وتىر. اتاپ ايتقاندا، 2023 جىلدىڭ قاراشا ايىندا الماتى تورابىن اينالىپ وتەتىن (74 كم) جانە داربازا – ماقتاارال (152 كم) تەمىرجول جەلىلەرىنىڭ قۇرىلىسى باستالدى. ءبىرىنشىسى جۇكتەردى جەتكىزۋ مەرزىمىن 24 ساعاتقا قىسقارتىپ، الماتى تەمىرجول تورابىن 40%-عا جەڭىلدەتسە، ەكىنشىسى ورتالىق ازيا باعىتىندا وتكىزۋ قابىلەتىن 10 ملن تونناعا ارتتىرادى.
بۇدان بولەك، جەلتوقساندا ۇزىندىعى 272 شاقىرىم بولاتىن باقتى – اياگوز تەمىرجول جەلىسىنىڭ قۇرىلىسى باستالدى. بۇل جوبانى جۇزەگە اسىرۋ قازاقستان مەن جۇڭگو اراسىنداعى جۇك اينالىمىن قوسىمشا 20 ملن تونناعا ارتتىرۋعا مۇمكىندىك بەرەدى.
جالپى الداعى ءۇش جىلدا رەسپۋبليكادا 1 300 شاقىرىمنان استام جاڭا تەمىرجول سالىنادى دەپ جوسپارلانىپ وتىر.