قىستا نەلىكتەن تەرىگە ەرەكشە كۇتىم قاجەت؟

سۋىق مەزگىلدە تەرى ەرەكشە كۇيزەلىسكە ۇشىرايدى. تەرى ءۇشىن دالاداعى اياز دا، ءۇي ىشىندەگى قۇرعاق جىلى اۋا دا قولايسىز. سول سەبەپتى قىستا تەرىگە مۇقيات كۇتىم جاساۋ اسا ماڭىزدى. Aqshamnews.kz ءتىلشىسى وقىرمان نازارىنا تەرى كۇتىمىنە قاجەت كەڭەستەردى ۇسىنادى.

قىس كەزىندە، ەڭ الدىمەن، تەرىنى مايلى كرەممەن قورعاۋ قاجەت. سەبەبى تومەن تەمپەراتۋرادا اعزا جىلۋدى ساقتاۋ ءۇشىن قان تامىرلارىن تارىلتادى. ناتيجەسىندە تەرىگە كەلەتىن قان مولشەرى ازايىپ، ال 8°C-تان تومەن تەمپەراتۋرادا تەرى مايىنىڭ ءبولىنۋى ازايادى. سالدارىنان تەرى وتتەگى مەن قورەكتىك زاتتاردى از الادى، تەرىدەگى زات الماسۋ باياۋلايدى. قىستا بەتتىڭ سولعىن، سۇرعىلت كورىنۋى وسىدان.

قىستا تەرى نەگە قورعانسىز بولادى؟

قالىپتى جاعدايدا ماي بەزدەرى تەرى بەتىندە تابيعي مايلى قابىقشا تۇزەدى. بۇل قابىقشا:

• سىرتقى ورتا اسەرىنەن قورعايدى؛
• ىلعالدىڭ بۋلانۋىنا جول بەرمەيدى؛
• تەرىنىڭ سۋسىزدانۋىن تەجەيدى.

كۇنىنە ماي بەزدەرى ورتا ەسەپپەن 1-2 گرامم تەرى مايىن بولەدى. ەگەر ول كوپ بولسا - تەرى مايلى كورىنەدى، ال از بولىنسە - تەرى قۇرعاق بولادى.

قىستا سۋىقتىڭ اسەرىنەن ماي بەزدەرىنىڭ بەلسەندىلىگى تومەندەپ، مايلى قابىقشا جۇقارادى. سونىڭ ناتيجەسىندە تەرى ىلعالدى تەز جوعالتادى.

ال ءۇي ىشىندەگى قۇرعاق جىلى اۋا تەرىدەگى ىلعالدى ودان ءارى ازايتادى. بۇل تەرىنىڭ شامادان تىس قۇرعاۋىنا، ۇساق جارىقتاردىڭ پايدا بولۋىنا، تىتىركەنۋ، تارتىلۋ جانە قىشىنۋ سەزىمىنە اكەلۋى مۇمكىن. سونىمەن قاتار قالىڭ شارفتار مەن بيىك جاعالى كيىمدەر دە تەرىنى قوسىمشا تىتىركەندىرەدى.

سوندىقتان، قىستا تەرى كۇتىمى ەرەكشە نازاردى قاجەت ەتەدى.

قىستا تەرى كۇتىمىنىڭ قاراپايىم ەرەجەلەرى

وسى كەڭەستەردى ۇستانۋ سۋىق مەزگىلدە تەرىنىڭ ساۋلىعىن ساقتاۋعا كومەكتەسەدى:

• دۋشتى نەمەسە ۆاننانى تىم ءجيى ءارى ۇزاق قابىلداماڭىز؛
• سۋ تەمپەراتۋراسى 35°C-تان اسپاۋى ءتيىس، سەبەبى ىستىق سۋ تەرىدەگى پايدالى مايلاردى شايىپ جىبەرەدى؛
• سابىن مەن دۋش گەلىن مۇمكىندىگىنشە از قولدانىڭىز.

ەگەر كۇندەلىكتى دۋش قابىلدايتىن بولساڭىز، كوپ جاعدايدا تازا سۋدىڭ ءوزى جەتكىلىكتى.

ۆاننانى اپتاسىنا ەكى رەتتەن ارتىق قابىلداماعان ءجون. قۇرعاق تەرى ءۇشىن كوبىك ۆاننالارىنا قاراعاندا مايلى ۆاننالار جۇمساعىراق. دۋشقا ارنالعان قۇرالدار pH-بەيتاراپ، ىلعالداندىراتىن بولعانى ءجون.

دۋشتان نەمەسە ۆاننادان كەيىن مىندەتتى تۇردە دەنەگە ىلعالداندىراتىن لوسون جاعىڭىز.

ىلعالداندىراتىن قۇرالداردى قولدانىڭىز

قىسقى كۇتىمنىڭ نەگىزى - تەرىنى جەتكىلىكتى دەڭگەيدە ىلعالمەن قامتاماسىز ەتۋ. كوپتەگەن تەرى تيپتەرى ءۇشىن قىستا كرەمنىڭ قۇرامىندا ماي مولشەرى جازعا قاراعاندا كوبىرەك بولۋى كەرەك.

وسىمدىك مايلارى بار كرەمدەر ۇسىنىلادى:

• ارگان مايى
• لينول قىشقىلى
• شي مايى

بۇل كومپونەنتتەر ايازدا تەرىنى جاقسى قورعايدى.

لوسوندى بۇكىل دەنەگە جاعۋ كەرەك: اسىرەسە، قۇرعاقتىققا بەيىم ايماقتارعا: اياق، تابان، شىنتاق. ال بەت پەن قول سۋىققا ەڭ كوپ ۇشىرايتىندىقتان، ولارعا ەرەكشە كۇتىم قاجەت. قولدى مىندەتتى تۇردە كرەمدەپ، قولعاپ كيۋ ۇسىنىلادى.

قىستا ەرىن دە ءجيى كەبەدى جانە جارىلىپ كەتەدى. سوندىقتان، قۇرامىندا ليپيدتەر، ارا بالاۋىزى بار كۇتىم بالزامداردى تاڭەرتەڭ جانە كەشكە جاققان ءجون.

شاش پەن باس تەرىسىنە كۇتىم

قىستا جۇمساق، نازىك شامپۋندار (مىسالى، بالالارعا ارنالعان) قولايلى. شاشتى تەك جىلى اۋادا كەپتىرىڭىز، ىستىق فەننەن اۋلاق بولىڭىز.

قىستا تەرىگە قوسىمشا سترەسس تۇسىرمەڭىز

كوكتەمگە دەيىن:

• سپيرت قوسىلعان تونيكتەردى

• گيدروگەلدەردى

• ءۇي جاعدايىنداعى پيلينگتەردى
  قولدانباعان ءجون.

بۇل شەكتەۋدىڭ دارىگەر باقىلاۋىمەن جاسالاتىن مەديسينالىق قىشقىلدى پيلينگتەرگە قاتىستى جوق.

قىستا پروبلەمالى تەرىگە كۇتىم

مايلى جانە بەزەۋگە بەيىم تەرى

مايلى تەرىگە قىستا دا وتە قويۋ كرەمدەرگە كوشۋدىڭ قاجەتى جوق. كەرىسىنشە، ىلعالداندىراتىن جەڭىل قۇرالداردى جيىرەك قولدانۋ ءتيىمدى. ايتپەسە تەرى تەسىكتەرى بىتەلىپ، جاعدايى ناشارلاۋى مۇمكىن.

وتە قۇرعاق جانە سەزىمتال تەرى

ەگەر تەرىڭىز وتە قۇرعاق بولسا، ەكزەما، اتوپيالىق دەرماتيت، اللەرگيا بايقالسا، قىستا ەرەكشە كۇتىم قاجەت. جاس ۇلعايعان سايىن دا تەرى قۇرعاپ، سەزىمتال بولا تۇسەدى.

مۇنداي جاعدايدا:

• ۇزاق اسەر ەتەتىن ىلعالداندىرۋ

• تەرىنىڭ قورعانىش قاباتىن كۇشەيتۋ
  ماڭىزدى.

قىستا كۇننەن قورعانۋ دا ماڭىزدى

قىسقى ۋلتراكۇلگىن ساۋلەلەر ءجيى ەسكەرۋسىز قالادى. تاۋدا، قار ۇستىندە كۇن ساۋلەسى قاردان شاعىلىسىپ، اسەرى كۇشەيەدى. سوندىقتان شاڭعى نەمەسە سنوۋبوردپەن اينالىساتىندار ءۇشىن SPF 30-دان تومەن ەمەس قورعانىس قاجەت.

قىسقى كۇننەن قورعايتىن كرەمدەر سۋىق جەلدەن دە قورعايتىن كومپونەنتتەردى قامتيدى.
ەرىندەر دە ۋلتراكۇلگىن ساۋلەگە سەزىمتال بولعاندىقتان، كۇننەن قورعايتىن بالزامدى ۇمىتپاڭىز.

ەگەر تەرى قاتتى قابىنىپ، قابىرشاقتانىپ، جارالار پايدا بولسا، مىندەتتى تۇردە دارىگەر-كوسمەتولوگقا جۇگىنۋ كەرەك. مامانى تەرىنىڭ قۇرعاۋ سەبەبىن انىقتاپ، دۇرىس ەم مەن ءۇي كۇتىمىن تاعايىندايدى.