الماتى قالاسىندا ورنالاسقان، 80 جىلدىق تاريحى بار 7552 اسكەري بولىمىندە جاس ساربازداردىڭ اسكەري انت قابىلداۋ سالتاناتتى ءراسىمى ءوتتى.
اسكەري انت قابىلداۋ ءراسىمىنىڭ الدىندا «جاس سارباز» سىنىبىنىڭ وقۋشىلارى جەتەكشىلەرى – زاپاستاعى پولكوۆنيكتەر نيازتاي الكەشيەۆ پەن ەلدوس شالابايەۆتارمەن بىرگە اسكەري ءبولىم اۋماعىمەن تانىستى. ولار ساربازداردىڭ جاتىن ءۇي-جايىن ارالاپ، تۇرمىس-تىرشىلىگىمەن تانىسىپ، اسحانانى كورىپ، اسكەري تاعامنان ءدام تاتتى. جاس ورەندەردىڭ اسكەري بولىمگە جاساعان بۇل ساپارى ولاردىڭ جادىندا ۇزاق ساقتالارى ءسوزسىز. بۇل – ءىس-شارانىڭ اسكەري-پاتريوتتىق باعىتتاعى ماڭىزدى ماقساتتارىنىڭ ءبىرى.
ساپتىق الاڭداعى سالتاناتتى ءراسىم قازاقستان رەسپۋبليكاسىنىڭ مەملەكەتتىك گيمنىمەن اشىلىپ، ەلىمىزدىڭ كوك بايراعى سالتاناتتى تۇردە كوتەرىلدى. مەملەكەتتىك تۋدى كوتەرۋ قۇرمەتى وقۋ پۋنكتىنىڭ ۇزدىك ساربازى، قاتارداعى داۋرەن سۇلەيمەنوۆكە بەرىلدى.
سالتاناتتى جيىندا ءسوز سويلەگەن قازاقستان رەسپۋبليكاسى ۇلتتىق ۇلانى «وڭتۇستىك» وڭىرلىك قولباسشىلىعى قولباسشىسىنىڭ تەحنيكا جانە قارۋ-جاراق جونىندەگى ورىنباسارى پولكوۆنيك ماقسات كەنجەبەكوۆ جاس ساربازداردى ومىرلەرىندەگى ماڭىزدى كەزەڭمەن قۇتتىقتاپ، الداعى اسكەري قىزمەتتەرىنە تابىس تىلەدى:
-بۇگىن سىزدەر وتان الدىنداعى قاسيەتتى بورىشتى ادال اتقارۋعا سەرت بەرىپ وتىرسىزدار. اسكەري انت – بۇل ۇلكەن جاۋاپكەرشىلىك پەن جوعارى سەنىمنىڭ بەلگىسى. سىزدەرگە تارتىپكە بەرىك بولىپ، ەل قاۋىپسىزدىگىن قامتاماسىز ەتۋ جولىندا ادال ەڭبەك ەتۋلەرىڭىزگە تىلەكتەسپىن، – دەدى ول.
سونىمەن قاتار مىنبەرگە ساربازدىڭ اناسى رابيعا ءامانالى قىزى كوتەرىلىپ، جاس جاۋىنگەرلەرگە جۇرەكجاردى تىلەگىن ارنادى:
- بۇگىن ۇلدارىمىزدىڭ ەل قورعاۋ جولىنا نىق قادام باسقانىن كورىپ، اتا-انا رەتىندە ەرەكشە ماقتانىش سەزىمىن سەزىنىپ وتىرمىز. بارشا ساربازدارعا اماندىق، توزىمدىلىك پەن تاباندىلىق تىلەيمىن. ەل سەنىمىن اقتاپ، ابىرويمەن قىزمەت اتقارادى دەپ سەنەمىز، – دەدى ول.
وسىلايشا، جاس جاۋىنگەر كۋرسىنان ءوتىپ، اسكەري انت قابىلداعان ساربازدار الداعى ءبىر جىل بويى قۇقىق قورعاۋ اسكەرىنىڭ قاتارىندا قىزمەت اتقاراتىن بولادى.
ايتا كەتەيىك، وسى كۇنى «وڭتۇستىك» وڭىرلىك قولباسشىلىقتىڭ شىمكەنت قالاسىنداعى 6698، جەتىسۋ وبلىسىنداعى 5514 جانە الماتى وبلىسىنداعى 3660 اسكەري بولىمدەرىندە دە اسكەري انت قابىلداۋ ءراسىمى ءوتىپ، جالپى سانى 600-گە جۋىق جاس سارباز وتان الدىنداعى قاسيەتتى بورىشىنا ادال بولۋعا انت بەردى.