"بۋراباي" مەملەكەتتىك ۇلتتىق تابيعي پاركى تۋريستىك جانە رەكرەاسيالىق جوبالاردى ىسكە اسىرۋ ءۇشىن جەر ۋچاسكەلەرىن ۇزاق مەرزىمگە جالعا بەرەتىنىن مالىمدەدى، دەپ حابارلايدى Aqshamnews.kz ءتىلشىسى.
ۇلتتىق پاركتىڭ حابارلاۋىنشا، بۇل قادام بۋراباي كۋرورتتىق ايماعىندا قوناق ۇيلەر، ەتنواۋىلدار جانە دەمالىسقا ارنالعان وزگە دە تۋريستىك نىساندار سالۋعا مۇمكىندىك بەرەدى.
باستاما قاسىم-جومارت توقايەۆتىڭ جاڭا تۋريستىك اۋماقتاردى دامىتۋ جونىندەگى تاپسىرماسىنا سايكەس قولعا الىنعان. جوبالار اياسىندا «اقبۋرا»، جۇكەي كولى، قاتاركول جانە تەكەكول اۋماقتارىن دامىتۋ كوزدەلىپ وتىر. وسى ماقساتتا ۇلتتىق پارك تۋريستەر سيرەك باراتىن، ءبىراق الەۋەتى جوعارى ورىنداردى ىرىكتەپ، ينۆەستورلارعا ارنالعان جەر تەلىمدەرىن دايىنداۋدا.
ۇلتتىق پارك جەر ۋچاسكەلەرى قولدانىستاعى زاڭناماعا ساي، ەكولوگيالىق تالاپتار مەن ەرەكشە قورعالاتىن تابيعي اۋماقتاردىڭ قورعاۋ رەجيمدەرىن ساقتاي وتىرىپ بەرىلەتىنىن اتاپ ءوتتى. جەردى بەرۋ ءتارتىبى مەن جالعا الۋ شارتتارى تۋرالى تولىق مالىمەت پاركتىڭ رەسمي سايتىندا جاريالاناتىنى ايتىلدى.