قىرعىز رەسپۋبليكاسى مينيسترلەر كابينەتى ءتوراعاسىنىڭ ورىنباسارى ەديل بايسالوۆ الماتىعا مەگاپوليستە جۇزەگە اسىرىلىپ جاتقان ۇلتتىق جوبالارمەن تانىسۋ ءۇشىن جۇمىس ساپارىمەن كەلدى.
ەڭ الدىمەن «جايلى مەكتەپ» ۇلتتىق جوباسى اياسىندا سالىنعان №214 مەكتەپتە بولدى. قازاقستاننىڭ وقۋ-اعارتۋ ۆيسە-مينيسترى مايرا مەلدەبەكوۆا الماتىدا 34800 ورىندىق 21 جايلى مەكتەپ سالىنىپ جاتقانىن، ونىڭ ىشىندە سەگىز نىساننىڭ قۇرىلىسى اياقتالعانىن ايتتى.
بۇل جوبا اۋدانى شامامەن 14،6 مىڭ شارشى مەتردى قۇرايتىن كەڭ جانە زاماناۋي عيماراتتار سالۋدى كوزدەيدى جانە تيپتىك مەكتەپتەردىڭ ستاندارتتى پارامەترلەرىنەن 20% اسىپ تۇسەدى. عيماراتتاردىڭ ارحيتەكتۋراسى جان-جاقتى ويلاستىرىلعان: كورپۋستار ءار ءتۇرلى جاستاعى وقۋشىلار ءۇشىن ىڭعايلى جانە ءقاۋىپسىز ورتا قۇرۋعا مۇمكىندىك بەرەتىن ءبىلىم دەڭگەيلەرى بويىنشا بولىنگەن.
سونداي-اق، قىرعىزستاننان كەلگەن دەلەگاسيا الاتاۋ اۋدانىندا ورنالاسقان ۇلتتىق عىلىمي جۇقپالى اۋرۋلار ورتالىعىنا باردى. اۋماعى 12 گەكتاردى الىپ جاتقان عيمارات 350 ورىنعا ەسەپتەلگەن. ق ر دەنساۋلىق ساقتاۋ ءمينيسترى اقمارال ءالنازاروۆا اتالعان ورتالىق پاسيەنتتەردى وقشاۋلاۋدىڭ يننوۆاسيالىق ءادىسى قولدانىلاتىنىن، اتاپ ايتساق، قىسىم گراديەنتىن باقىلايتىن مامانداندىرىلعان جارتىلاي بوكستى-پالاتالار جابدىقتالعانىن اتاپ ءوتتى.
دەلەگاسيا اۋەزوۆ اۋدانىنىڭ كوميۋنيتي-ورتالىعىندا دا بولدى. مەيماندارعا ق ر مادەنيەت جانە اقپارات ۆيسە-مينيسترى قانات ىسقاقوۆ مادەنيەت جانە ءبىلىم سالاسىندا جۇزەگە اسىرىلىپ جاتقان تىڭ جوبالار تۋرالى ايتىپ بەردى. قىرعىز دەلەگاسياسى قازاقستاندىق جاستار ءۇشىن جاسالىپ جاتقان زاماناۋي قادامدارعا ۇلكەن باعاسىن بەردى.
– ءبىز بۇگىن مەكتەپتە بولدىق، اۋرۋحاناعا باردىق. جاستارعا ارنالعان ورتالىقتىڭ دا تىنىس-تىرشىلىگىمەن تانىستىق. اشىعىن ايتقاندا، سىزدەردە مەديسينا، ءبىلىم جانە الەۋمەتتىك سالا وتە جوعارى دەڭگەيدە دامىعان. قازاقستاننان كەلگەن ارىپتەستەرمەن ءبىز حالىقارالىق فورۋمدار مەن كونفەرەنسيالاردا ءجيى جۇزدەسەمىز. اركەز پىكىر الماسىپ وتىرامىز. ءبىز ەۋروپا، ورتالىق ازيا، اقش جانە افريكا تاجىريبەسىن زەرتتەۋگە تىرىسامىز. وتكەن جىلى قازاقستاننىڭ پرەمەر-مينيسترى ولجاس بەكتەنوۆ قىرعىزستانعا كەلدى. سول جۇزدەسۋدە كەرى بايلانىس ورناتۋ تۋرالى سۇرادىق. ءبىزدىڭ ەلگە ىرگەلەس جاتقان مەگاپوليس – الماتى، سوندىقتان وسى قالانى تاڭدادىق. مۇندا جۇزەگە اسىرىلىپ جاتقان جوبالاردى زەردەلەۋ ءبىز ءۇشىن ماڭىزدى. ەكى باۋىرلاس حالىقتىڭ دوستىعى بەرىك. كوپتەگەن ورتاق يدەيامىز بار. قازاقستان ءقازىر بەلسەندى دامىپ كەلەدى، ءاردايىم العا جىلجۋدا. ال قىرعىزستان سول كوشتەن قالماۋعا ۇمتىلىپ كەلەدى، – دەدى قىرعىز رەسپۋبليكاسى مينيسترلەر كابينەتى ءتوراعاسىنىڭ ورىنباسارى ەديل بايسالوۆ.
دەلەگاسيا الەۋمەتتىك قىزمەتتەر ءۇيىنىڭ جۇمىسىنا دا قىزىعۋشىلىق تانىتتى. بۇل – الماتىلىقتارعا «ءبىر تەرەزە» قاعيداتى بويىنشا مەملەكەتتىك جانە الەۋمەتتىك سيپاتتاعى قىزمەتتەردى جەدەل الۋعا مۇمكىندىك بەرەتىن بىرەگەي جوبا.
قىرعىز ەلىنەن كەلگەن ارىپتەستەر ساتبايەۆ ۋنيۆەرسيتەتىندە دە بولىپ، قازاقستاندىق جوعارى وقۋ ورىندارى بازاسىندا اشىلعان شەتەلدىك فيليالداردىڭ جۇمىسى، ينفراقۇرىلىمى، عىلىمى جانە قازاقستاننىڭ العاشقى تەحنيكالىق ۋنيۆەرسيتەتىنىڭ عىلىمي جوبالارىمەن تانىستى. مەيماندار ۋنيۆەرسيتەتتىڭ نەگىزگى عىلىمي جانە ءبىلىم بەرۋ بولىمشەلەرىن ارالاپ، Stroytech تەحنولوگيالىق پاركى، حالىقارالىق وزىق فۋنكسيونالدىق ماتەريالدار جانە ولاردىڭ كومپوزيتتەرى جونىندەگى R&D ورتالىعى، Porsche جانە Astana Motors اۋديتوريالارىندا بولدى. اسىرەسە City University of Hong Kong فيليالى مەن MIT FabLab وندىرىستىك زەرتحاناسىنا باسا نازار اۋدارىلدى.
بۇل ساپار قازاقستان مەن قىرعىزستان ەلدەرى اراسىندا ءبىلىم، عىلىم، دەنساۋلىق جانە الەۋمەتتىك سالالارداعى يننوۆاسيا بويىنشا ىنتىماقتاستىقتى نىعايتۋدا تاعى ءبىر ماڭىزدى قادام بولدى.