قىرعىزستاننان كەلگەن باقىلاۋشى: قازاقستاندىقتاردىڭ رەفەرەندۋمداعى بەلسەندىلىگى جوعارى

ءوز بولاشاعىن ايقىنداۋدا حالىق بەلسەندىلىگى جوعارى، دەدى بريفينگ بارىسىندا قىرعىزستان ورتالىق سايلاۋ كوميسسياسىنىڭ مۇشەسى ءابدىجاپار بەكماتوۆ.

«قازاقستان ازاماتتارى مەن ەل ءۇشىن بۇگىنگى سايلاۋ – وتە ماڭىزدى وقيعا. سايلاۋ كوميسسيالارى، مەملەكەتتىك ورگاندار رەفەرەندۋمعا دايىندىق بويىنشا، ەل حالقىن اقپاراتتاندىرۋ بويىنشا ۇلكەن جۇمىس اتقاردى»، – دەپ اتاپ ءوتتى قىرعىزستان وسك مۇشەسى ءابدىجاپار بەكماتوۆ.

ونىڭ ايتۋىنشا، كوميسسيا ءقازىردىڭ وزىندە نۇر-سۇلتانداعى بىرنەشە ۋچاسكەگە بارىپ، بارلىعىنا داۋىس بەرۋ ءۇشىن قاجەتتى جاعدايلار جاسالعانىنا، قاتىسۋشىلاردىڭ بەلسەندىلىگى جوعارى ەكەندىگىنە كوز جەتكىزدى. حالىق بۇگىنگى كۇننىڭ جاۋاپكەرشىلىگىن جاقسى سەزىنۋدە.

ەلىمىزدىڭ نەگىزگى زاڭىنا تۇزەتۋلەر ەنگىزۋ بويىنشا رەفەرەندۋم وتكىزۋ تۋرالى جارلىققا پرەزيدەنت قاسىم-جومارت توقايەۆ 5 مامىردا قول قويدى. قازاقستاندىقتار تۇزەتۋلەرگە «قولداپ» نەمەسە «قارسى» داۋىس بەرەتىن بولادى. رەفەرەندۋمدا قازاقستاننىڭ 11،7 ملن-نان استام ازاماتى داۋىس بەرە الادى.

قازاقستاندا داۋىس بەرۋگە ارنالعان 10 مىڭنان استام ۋچاسكە قۇرىلعان. شەتەلدە داۋىس بەرۋ ۋچاسكەلەرى الەمنىڭ 52 ەلىندە اشىق.