قىرعىزستان پرەزيدەنتى سادىر جاپاروۆ ەلدە بالالارعا، قىزدارعا جانە ايەلدەرگە قارسى اسا اۋىر قىلمىستار ءۇشىن ەڭ قاتاڭ جازا قاراستىراتىن زاڭنامالىق وزگەرىستەر ازىرلەۋدى تاپسىردى، - دەپ حابارلايدى Aqshamnews.kz ءتىلشىسى. بۇل تۋرالى مەملەكەت باسشىسىنىڭ باسپا ءسوز حاتشىسى اسكات الاگوزوۆ Facebook پاراقشاسىندا حابارلادى.
ول اسا اۋىر قىلمىستارعا ءولىم جازاسىن ەنگىزۋدى تاپسىردى.
"پرەزيدەنت زاڭنامانى قايتا قاراپ، بالالارعا، قىزدارعا جانە ايەلدەرگە قارسى قىلمىستار ءۇشىن ەڭ اۋىر جاۋاپكەرشىلىكتى ەنگىزۋدى تاپسىردى. اسىرەسە بالالاردى زورلاعانى جانە ايەلدەردى زورلاپ ولتىرگەنى ءۇشىن ءولىم جازاسىن قاراستىرۋدى جۇكتەدى"، - دەدى الاگوزوۆ.
بۇل شەشىم قىرعىزستاندى ءدۇر سىلكىندىرگەن 17 جاستاعى ايسۇلۋدىڭ اسا قاتىگەزدىكپەن ولتىرىلۋىنە بايلانىستى قابىلداندى. سادىر جاپاروۆ قىلمىستىق ءىستىڭ تەرگەۋىن جەكە باقىلاۋىنا العانى ايتىلدى.
ايسۇلۋدىڭ ءولىمى
27 قىركۇيەكتە ىستىقكول وڭىرىندە 17 جاستاعى ايسۇلۋ جوعالىپ كەتكەن. ول قۇربىسىنا قوناققا بارا جاتقان، ءبىراق بايلانىسقا شىقپاي قالعان. 29 قىركۇيەكتە ونىڭ دەنەسى بووم شاتقالىنان تابىلدى.
وقيعاعا بايلانىستى 41 جاستاعى بىشكەك تۇرعىنى كۇدىكپەن ۇستالدى. تەرگەۋ دەرەكتەرىنە ساي، ول بويجەتكەندى ۇرلاپ، زورلاپ، ولتىرگەنىن مويىنداعان. الدىمەن دەنەسىن ىستىقكول جاعاسىنا كومىپ، كەيىن قايتا قازىپ الىپ، بووم شاتقالىنا تاستاعانى انىقتالدى. كۇدىكتى بۇعان دەيىن دە جىنىستىق سيپاتتاعى قىلمىسى ءۇشىن جاۋاپقا تارتىلعانىمەن، جازادان قۇتىلىپ كەتكەن.
ءولىم جازاسى تۋرالى تاريحي دەرەك
قىرعىزستاندا سوڭعى رەت ءولىم جازاسى 1998 جىلى ورىندالعان. 2007 جىلى ءولىم جازاسى زاڭ جۇزىندە جويىلىپ، 2010 جىلى ەل بۇۇ-نىڭ ءولىم جازاسىن جويۋعا باعىتتالعان حالىقارالىق پاكتىنىڭ ەكىنشى فاكۋلتاتيۆتى حاتتاماسىن راتيفيكاسيالاعان بولاتىن.