الماتى وبلىسى قاراساي اۋدانى قىرعاۋىلدى اۋىلىنىڭ تۇرعىندارى اۋىز سۋعا جارىماي وتىرعانىن ايتىپ، جانايقايىن جەتكىزدى، دەپ حابارلايدى Almaty-akshamy.kz.
قىرعاۋىلدى اۋىلى الماتىنىڭ ءدال ىرگەسىندە ورنالاسقان. تاۋ ەتەگى بولعاندىقتان وسى ەلدى مەكەنگە كەلىپ، ءۇي سالىپ العىسى كەلەتىندەر كوپ. ءبىراق مۇنداعى حالىقتىڭ بۇگىندە مازاسى قاشقان. ويتكەنى سۋارمالى سۋ تۇرماق، 5-6 جىلدان بەرى اۋىز سۋ دا جوق، دەپ جازدى Sputnik قازاقستان
«اۋىل اكىمدىگىنە ءوز باسىم 5-6 رەت باردىم. ول ەشنارسە ايتپايدى. "سۋ بولادى" دەپ الداپ شىعارىپ سالادى. وسىدان ءبىر جەتى بۇرىن بۇكىل ەل، اۋىل بولىپ اۋداندىق اكىمدىككە حات جازدىق. بۇگىن بارىپ بىلسەك، سول حات اكىمنىڭ قولىنا ءالى تيمەگەن. اكىمدىكتە سۋدىڭ ماسەلەسىن شەشەتىن ادامدار "پروبلەما جوق، سۋ بولادى" دەپ شىعارىپ سالادى. مال ۇستايىق دەسەك جەر جوق. ءبارىن ساتىپ جىبەرگەن. بەس قيار، بەس اعاشتى دا سۋعارا الماي وتىرمىز»، - دەيدى قىرعاۋىلدى اۋىلىنىڭ تۇرعىنى احات ورىنبايەۆ.
نە كەرەك، مۇندا سۋ تاسيتىن كولىگى باردىڭ ءداۋىرى ءجۇرىپ تۇر. ولار قىرعاۋىلدىنىڭ تۇرعىندارىنا ءبىر سيستەرنانى 17 000 مىڭعا ساتادى.
«سۋسىز وتىرامىز با، ساتىپ الىپ جاتىرمىز. سۋدىڭ جوق ەكەنىن بىلەدى، سۋ تاسىعىشتار كەلىپ ءبىر سيستەرنا سۋدى 17 مىڭعا ساتادى. جۋىنامىز، ازداپ ەسىك الدىندا ءوسىرىپ جاتقان قىزاناعىمىزعا قۇيامىز، سونىمەن-اق 2-3 كۇندە ول سۋ ءبىتىپ قالادى. 5-6 جىل بۇرىن ءبىر سيستەرنا سۋ 4000 تەڭگە ەدى، بىزدە سۋ جوعىن بىلەتىندەر باعانى كوتەرىپ جىبەردى»، - دەيدى قىرعاۋىلدى اۋىلىنىڭ تۇرعىنى تۇياقباي كەنجەبايەۆ.
نەگىزى بۇل جەردىڭ ماسەلەسى تىم ارىدە جاتىر. الماتىنىڭ ىرگەسىنەن بالەنباي گەكتار جەردى بىرنەشە جىل بۇرىن ساتىپ العان كاسىپكەر ۋاقىت وتە كەلە، ونى تۇرعىندارعا ساتا باستايدى. جەكەمەنشىك ساتقان جەردە ينفراقۇرىلىمعا جاعداي قاراستىرىلماعان. قوڭدى جەر دەپ قونىس تەۋىپ، بوركىن اسپانعا اتقاندار ارادا 3-4 جىل وتكەن سوڭ اۋىز سۋدىڭ ازابىن تارتا باستايدى. ول ول ما، ءتىپتى ەلەكتر باعانالارى مەن جولدى دا تۇرعىندار قالتاسىنان قوماقتى قارجى شىعارىپ جاسايدى.
سۋدى ايتىپ حالىقتىڭ شۋلاعانىن ەستىپ، اۋداندىق اكىمدىكتىڭ ماماندارى تايلى-تۇياعى قالماي جينالدى.
«بۇل جەر جەكەمەنشىكتىكى بولعان، جاقىندا عانا اۋدان اكىمدىگىنىڭ بالانسىنا ءوتتى. ءيا، اۋىز سۋ ماسەلەسى بارى راس. بۇل جەردە ءبىر عانا سۋ تارتقىش قوندىرعى بار. اۋىل كولەمى ۇلعايعاندىقتان ونىڭ شاماسى اۋىز سۋمەن تولىق قامتۋعا جەتپەيدى. ءبىز ەكىنشى سۋ تارتقىش قوندىرعى ورناتامىز. جاقىندا عانا سول قوندىرعىنى ورناتۋ ءۇشىن بايقاۋ جاريالادىق. 15 شىلدەدەن باستاپ قۇرىلىس مونتاج جۇمىستارىن باستايمىز. بۇيىرسا قازان ايىنا دەيىن ەكىنشى سۋ تارتقىش قوندىرعى ورناتىلىپ بىتەدى دەپ جوسپارلاپ وتىرمىز»، - دەيدى قاراساي اۋدانى اكىمىنىڭ ورىنباسارى مارلەن قاسەنوۆ.
قاراساي اۋدانى اكىمىنىڭ ورىنباسارى مارلەن قاسەنوۆ © Sputnik/ەرتاي سارباسوۆ
الايدا قىرعاۋىلدىلىقتارعا الايقايلاپ قۋانۋعا ەرتە. ويتكەنى ەكى بىردەي سۋ تارتقىش قۇرال ورناتقاننىڭ وزىندە بۇكىل اۋىلدى سۋمەن قامتي المايدى، تەك اۋىز سۋعا جەتۋى مۇمكىن. ال سۋارمالى سۋ ءالى دە تۇرعىنداردى تىعىرىققا تىرەمەك. ويتكەنى قىرعاۋىلدىدا ارىق قازاتىن دا جەر جوق. سالدارىنان حالىق اعاشىن سۋعارا الماي وتىر.
«كەزىندە جەكەمەنشىك ادام ساتقاندىقتان ينفراقۇرىلىم ەش ويلاستىرىلماعان. بۇل جەردە حالىقتىڭ دا كىناسى بار. جەردى الار بۇرىن ءبارىن زەرتتەۋ كەرەك ەدى. ەندى اكىمدىككە دە، حالىققا دا بۇل پروبلەما تۋدىرىپ وتىر. ارىق قازۋ بويىنشا دا قوسىمشا جۇمىستار جاسالادى. ونى حالىقپەن بىرگە ءجۇرىپ، اۋىلدى ارالاپ، شەشەمىز»، - دەيدى اۋدان اكىمىنىڭ ورىنباسارى.
ايتپاقشى، قىرعاۋىلدى اۋىلىنىڭ تۇرعىندارى ماسەلە 2-3 كۇندە شەشىلمەسە، الماتى ماڭىندا جاڭادان اشىلاتىن باكاد جولىن جابامىز دەپ دۇرلىككەن بولاتىن. الايدا بيلىكتىڭ ءۋاجىن تىڭداعاننان كەيىن تاعى دا سابىر ساقتاۋدى ءجون كورىپ وتىر.