ماماندار قىمىزدى الكوگولدىك سۋسىنعا جاتقىزۋعا بولادى دەيدى.
قىمىزدىڭ ءدامىن سەزىنۋ ءۇشىن ونى بىرنەشە رەت جانە ىستىق كۇندە ءىشىپ كورۋ كەرەك. سالقىن سۋسىن تەك سەرگىتىپ قانا قويماي، سونىمەن قاتار شيراتىپ الادى. Tengri Life بىرنەشە توستاعان قىمىزدان كەيىن كولىكپەن جۇرۋگە بولا ما، انىقتاپ كوردى، دەپ حابارلايدى Almaty-akshamy.kz
ءداستۇرلى قىمىزدىڭ نەگىزگى ينگرەديەنتى – بيە ءسۇتى. ءارتۇرلى ادىسپەن اشىتىلعاننان كەيىن (ءار ايماقتا ەرەكشەلەنەدى) كوپتەگەن قازاقستاندىق جاقسى كورەتىن سۋسىنعا اينالادى. ناعىز قىمىز پايدالى زاتتارعا باي - بۇل بەلوكتار (2-2،5 پايىز)، مايلار (1-2 پايىز)، ۆيتاميندەر (ۆ1 جانە ۆ2، س، بيوتين، پانتوتەن جانە فوليي قىشقىلدارى)، ءسۇت قىشقىلى (0،6 -1،2 پايىز)، كالسيي، فوسفور جانە ت.ب. قىمىزدىڭ قۇرامىنداعى ميكروەلەمەنتتەر ءشولدى باسۋعا جانە اسقازان-ىشەك جولدارىنىڭ بۇزىلعان ميكروفلوراسىن قالپىنا كەلتىرۋگە قابىلەتتى.
ايتا كەتەتىن جايت، قىمىزدى الكوگولدىك سۋسىنعا جاتقىزۋعا بولادى، ويتكەنى ءارتۇرلى جاعدايدا سپيرت مولشەرى 4 پايىزعا دەيىن جەتۋى مۇمكىن. مۇنىڭ ءبارى ونىڭ قانشا ۋاقىت ساقتالعانىنا، ءتىپتى جىلقىنىڭ جەمى مەن تۇقىمىنا دا بايلانىستى.
اشىتىلعان ءسۇت سۋسىنى الكوتەست قۇرىلعىسىنا اسەر ەتە مە جانە ونى ىشكەننەن كەيىن كولىك جۇرگىزۋگە بولا ما؟ بۇل ساۋالدارعا الماتىنىڭ پسيحيكالىق دەنساۋلىق ورتالىعى ماماندارى جاۋاپ بەردى.
«قىمىزدىڭ قۇرامىنداعى الكوگول مولشەرى ادەتتە ىشىمدىكتەگىدەي جوعارى بولماسا دا، ول الكوتەست ناتيجەسىنە اسەر ەتۋى مۇمكىن. بۇل اسىرەسە قىسقا ۋاقىت ىشىندە كوپ مولشەردە قىمىز ىشكەن جاعدايدا بولادى. ەگەر كولىك جۇرگىزەتىن بولساڭىز نەمەسە بايسالدى بولۋدى قاجەت ەتەتىن جۇمىستاردى ورىندايتىن بولساڭىز، جالپى الكوگولدىك سۋسىنداردى، سونىڭ ىشىندە قىمىزدى دا ىشۋدەن باس تارتقان ءجون. جولدا ءوزىڭىزدىڭ جانە باسقالاردىڭ قاۋىپسىزدىگىن قامتاماسىز ەتۋ ءۇشىن ەرەجەلەردى ساقتاۋ ماڭىزدى»، - دەدى پسيحيكالىق دەنساۋلىق ورتالىعىنىڭ باسپا ءسوز قىزمەتى وكىلدەرى.