ەڭبەك ادامى
الماتى – قازاقستاننىڭ ەڭ ءىرى جانە حالىق تىعىز ورنالاسقان قالالارىنىڭ ءبىرى. مۇندا كۇندەلىكتى تىرشىلىك قاربالاس، ال توتەنشە جاعدايلار قىزمەتى ءاردايىم ساقاداي ساي بولۋى ءتيىس. وسى مىندەتتى ابىرويمەن اتقارىپ جۇرگەن الماتى قالاسى توتەنشە جاعدايلار دەپارتامەنتىنىڭ قىزمەتكەرلەرى اراسىندا ەرەكشە ەڭبەكقورلىق پەن كاسىبيلىكتى بويىنا سىڭىرگەن نۇرلان اتىعايەۆ سىندى ەرلەر بار.
الماتىداعى ءاربىر ءورت پەن توتەنشە جاعدايدىڭ الدىن الۋ، قاۋىپسىزدىكتى قامتاماسىز ەتۋ – نۇرلان اتىعايەۆ پەن ونىڭ ارىپتەستەرىنىڭ باستى ماقساتى. جىل سايىن قالادا شامامەن 600 ءورت تىركەلەدى. دەپارتامەنتتىڭ 19 ءورت ءسوندىرۋ بولىمشەسى جانە 1،5 مىڭنان استام قۇتقارۋشى بۇل جاعدايلاردى تەز ءارى ءتيىمدى جويۋ ءۇشىن ۇزدىكسىز ەڭبەك ەتەدى.
قازىرگى زاماندا تەحنيكالىق جابدىقتالۋ قىزمەتتىڭ تيىمدىلىگىن ارتتىرۋدا. الماتىنىڭ ورتكە قارسى قىزمەتى 95%-عا قاجەتتى تەحنيكالارمەن جاراقتانعان. سوڭعى جىلدارى قالادا ءورت ءسوندىرۋ دەپولارى سالىنىپ، اۆتوپاركتەر جاڭارتىلدى. جوعارى قاباتتى عيماراتتارعا ارنالعان ارنايى كوتەرگىشتەر مەن مەتروداعى ورتتەردى سوندىرۋگە ارنالعان زاماناۋي قۇرالدار الىنىپ، قولدانىسقا ەنگىزىلدى.
سونىمەن قاتار، 1100-دەن استام بەينەكامەرالار ارقىلى قالا اۋماعىندا باقىلاۋ جۇرگىزىلەدى. بۇل جۇيە توتەنشە جاعدايلاردى ەرتە انىقتاپ، جىلدام ارەكەت ەتۋگە مۇمكىندىك بەرەدى. ال دروندار تەك تاۋداعى قاۋىپسىزدىكتى باقىلاپ قويماي، ىزدەۋ-قۇتقارۋ جۇمىستارىندا دا تاپتىرماس قۇرالعا اينالعان.
نۇرلان اتىعايەۆتىڭ ايتۋىنشا، توتەنشە جاعدايلاردىڭ الدىن الۋ – تەك تەحنيكالىق جابدىقتار مەن قۇتقارۋشىلاردىڭ جۇمىسى عانا ەمەس، حالىقتىڭ دا جاۋاپكەرشىلىگىن تالاپ ەتەدى. وسى ماقساتتا جەكە تۇرعىن ۇيلەرگە رەيدتەر ۇيىمداستىرىلىپ، ءورت قاۋىپسىزدىگى ەرەجەلەرى تۋرالى ءتۇسىندىرۋ جۇمىستارى جۇرگىزىلەدى. مىسالى، «قاۋىپسىزدىك ءۇشىن – بىرگە» اكسياسى اياسىندا مۇقتاج وتباسىلارعا پەش تازالاۋ، ءتۇتىن مۇرجالارىن جوندەۋ سياقتى ناقتى كومەك كورسەتىلىپ، ۋلى گازدان قورعاۋ ءۇشىن ارنايى قۇرىلعىلار ورناتىلدى.
نۇرلان اتىعايەۆتىڭ باسشىلىعىمەن جۇزەگە اسىرىلىپ جاتقان جۇمىستاردىڭ ناتيجەسىندە الماتىدا توتەنشە جاعدايلاردىڭ دەڭگەيى ازايىپ، قاۋىپسىزدىك مادەنيەتى جاقسارىپ كەلەدى. ول ءوز سالاسىنا بارىنشا ادال قىزمەت ەتۋمەن قاتار، ۇجىمىنا ۇلگى بولىپ، جاس مامانداردى تاربيەلەۋدە ۇلكەن ەڭبەك سىڭىرۋدە.
الماتىنىڭ ءاربىر تۇرعىنى مەن قوناعىنىڭ قاۋىپسىزدىگى ءۇشىن كۇندىز-تۇنى ايانباي قىزمەت ەتىپ جۇرگەن نۇرلان اتىعايەۆ پەن ونىڭ ارىپتەستەرىنە العىسىمىز شەكسىز. وسىنداي ەڭبەك ادامدارىنىڭ ارقاسىندا الىپ شاھاردىڭ تىنىشتىعى مەن قاۋىپسىزدىگى قامتاماسىز ەتىلۋدە.