«وتباسى بانك» تۇرعىن ءۇي نارىعىندا باعانىڭ وسۋىنە جول بەرمەۋ ماقساتىندا تۇرعىن ءۇيدى تاڭداۋ جانە برونداۋ تەتىگىن ەنگىزدى
«وتباسى بانك» اق باسقارما ءتوراعاسى ءلاززات يبراگيموۆا 2024 جىلدىڭ 11 ايىندا قارجى ينستيتۋتى 32 895 قارىز بەرگەنىن باياندادى. جالپى، بەرىلگەن نەسيە سوماسى 571 ملرد تەڭگەنى قۇرادى. ونىڭ ىشىندە 7 861 قارىز تۇرعىن ءۇي كەزەگىندە تۇرعان قازاقستاندىقتارعا بەرىلدى. بانكتىڭ ءوز باعدارلامالارى بويىنشا – 25 034، - دەپ حابارلايدى aqshamnews.kz
قارىزداردىڭ 40%-ى «ناۋرىز» جانە «وتاۋ» باعدارلامالارىنا تيەسىلى، ونىڭ شەڭبەرىندە بانك جالپى سوماسى 240 ملرد تەڭگەگە 9 370 قارىز بەردى. باعدارلامالاردى يگەرۋ ماۋسىم ايىندا باستالدى، كەلەسى جىلدىڭ باسىندا جالعاسادى.
«بيىل ەكى مەملەكەتتىك باعدارلاما بويىنشا كەزەكتە تۇرعاندارعا باسپانا بەرۋ ءىسى جۇرگىزىلدى. ياعني، ءبىرىنشى باعدارلاما – “باقىتتى وتباسى” باسپاقى جارناسى 10%-دى قۇرايدى. وعان قاتىسۋشىلار – ەرەكشە قاجەتتىلىگى بالا تاربيەلەپ وتىرعان ازاماتتار، ءى جانە ءىى توپتاعى مۇگەدەكتىگى بار جاندار، كوپ بالالى وتباسىلار جانە جەتىم بالالار. رەسپۋبليكا بويىنشا 42 ملرد تەڭگەنى قۇرايتىن 3،5 مىڭ قارىز بەرىلدى. قالعان 4،5 مىڭ قارىز كەزەكتە باسقا ساناتتار بويىنشا تۇرعان ازاماتتارعا ەكىنشى باعدارلاما – “شاڭىراق” بويىنشا بەرىلدى»، — دەپ اتاپ ءوتتى ءلاززات يبراگيموۆا.
2024 جىلعى 1 جەلتوقسانداعى جاعداي بويىنشا تۇجىرىمداماعا قاتىسۋشىلارعا نەسيە بەرۋ ءۇشىن بيۋدجەت قاراجاتىنىڭ قالدىعى 45 ملرد تەڭگەنى قۇرايدى. قالعان قاراجات 2025 جىلدىڭ ءى توقسانىندا يگەرىلەدى. كەلەسى جىلعا بولجامدى قاجەتتىلىك 80 ملرد تەڭگەنى قۇرايدى.
«ناۋرىز» جانە «وتاۋ» ەكى ءىرى يپوتەكالىق باعدارلامالاردى ءبىر مەزگىلدە ىسكە قوسۋمەن بايلانىستى «وتباسى بانك» تۇرعىن ءۇي نارىعىندا باعانىڭ وسۋىنە جول بەرمەۋ ماقساتىندا «باسپانا ماركەت» جىلجىمايتىن مۇلىك پورتالى ارقىلى قاتىسۋشىلاردىڭ باستاپقى تۇرعىن ءۇيدى تاڭداۋ جانە برونداۋ تەتىگىن ەنگىزدى. وسى تەتىككە سايكەس قۇرىلىس سالۋشى 12 اي ىشىندە تۇرعىن ءۇي قۇنىن كوتەرمەۋى ءتيىس. قازىرگى ۋاقىتتا «باسپانا ماركەت» پورتالىندا «ناۋرىز» جانە «وتاۋ» باعدارلامالارى بويىنشا 921 تۇرعىن ءۇي وبەكتىسى، 18 940 پاتەر جاريالانعان. ولاردىڭ ىشىندە ۇزدىك 5 قۇرىلىس كومپانياسى بار.
«2024 جىلى بانك “ناۋرىز” جانە “وتاۋ” باعدارلامالارىنا بارلىعى 68،7 مىڭ ءوتىنىش قابىلدادى. بۇل ساتىپ الۋ بويىنشا ناقتى سۇرانىس كولەمى. باعدارلامالاردى ىسكە اسىرۋ بارىسىندا سولتۇستىك قازاقستان، قىزىلوردا، پاۆلودار جانە اتىراۋ وبلىستارىندا العاشقى نارىقتاعى تۇرعىن ءۇيدىڭ تاپشىلىعى بايقالدى، بۇل جاعداي 2025 جىلى دا قايتالانۋى مۇمكىن. 2025 جىلى “ناۋرىز” باعدارلاماسى بويىنشا شىعارۋدىڭ جوسپارلانعان كولەمى 300 ملرد تەڭگەنى قۇرايدى»، — دەدى سپيكەر.