قازاق كينوسىنىڭ كۇنىنە وراي ەلىمىزدە بۇرىن-سوڭدى بولماعان اۋقىمدى جوبا – «JARQYRA» رەسپۋبليكالىق كاستينگى باستالادى. بۇل تۋرالى ۇلتتىق كينونى قولداۋ مەملەكەتتىك ورتالىعىنىڭ باسقارما ءتوراعاسى قۇرمانبەك جۇماعالي مالىمدەدى.
كاستينگ 15 قىركۇيەك كۇنى، ساعات 11:00-19:00 ارالىعىندا، ەلىمىزدىڭ 19 قالاسىنداعى مادەنيەت وشاقتارىندا ءبىر مەزەتتە وتەدى. كاستينگكە 18 جاستان باستاپ قاتىسۋ مۇمكىندىگى بار. جوبا وڭىرلىك تالانتتاردى انىقتاۋعا جانە ولاردىڭ وتاندىق كينويندۋسترياعا جول تابۋىنا باعىتتالعان.
«بۇل – جاي كاستينگ ەمەس. بۇل – ارمانعا اپارار ناقتى مۇمكىندىك. وعان بۇگىندە تانىمال اكتەرلەر دالەل: گۋزەل جان – «يگرومانكا» فيلمىندەگى باستى ءرولدى سومداعان اكتريسا، سامال ەسلياموۆا – «ايكا» ءفيلمى ارقىلى كانن فەستيۆالىندە جۇلدە العان اكتريسا، مارات ابىشيەۆ – «ادام جانە الما» ءفيلمىنىڭ باستى كەيىپكەرى.
ولاردىڭ جولى – وسىنداي كاستينگتەردەن باستالىپ، ۇلكەن ەكرانعا دەيىن جەتكەن ءساتتى ۇلگى. الداعى ۋاقىتتا كاستينگتەن وتكەن قاتىسۋشىلار ورتالىقتىڭ اكتەرلىك بازاسىنا ەنگىزىلىپ، بولاشاقتا وتاندىق كينوجوبالارعا قاتىسۋعا مۇمكىندىك الادى»، – دەدى قۇرمانبەك جۇماعالي.
ىرىكتەۋدەن وتكەن ۇمىتكەرلەردىڭ دەرەكتەرى www.kazakhcinema.kz سايتىنداعى اكتەرلىك ونلاين-بازاعا ورنالاستىرىلادى. بۇل بازا – كينوكومپانيالار مەن پروديۋسەرلەر ءۇشىن جاڭا ەسىمدەردى تابۋعا مۇمكىندىك بەرەتىن اشىق ءارى قولجەتىمدى الاڭ بولماق.
بۇعان دەيىن دە ۇلتتىق كينونى قولداۋ مەملەكەتتىك ورتالىعىنىڭ باستاماسىمەن جانە قولداۋىمەن وتاندىق كينو سالاسىندا ءبىرقاتار جاڭا ەسىمدەر تانىلىپ، ەلىمىزدىڭ مادەني الەۋەتىن نىعايتۋعا سۇبەلى ۇلەس قوسىپ كەلەدى. اتالعان جۇمىستار مەملەكەت باسشىسىنىڭ مادەني ساياساتتى جاڭعىرتۋ جونىندەگى تاپسىرمالارىن ىسكە اسىرۋ اياسىندا، مادەنيەت جانە اقپارات ءمينيسترى ايدا بالايەۆانىڭ جەتەكشىلىگىمەن جۇيەلى تۇردە جالعاسىپ كەلەدى.
«سوڭعى جىلدارى 34 دەبيۋتتىك فيلمگە قولداۋ كورسەتىلىپ، جاڭا بۋىن رەجيسسەرلەر مەن اكتەرلەردىڭ قالىپتاسۋىنا ناقتى جاعداي جاسالدى. جاقىندا عانا جارىققا شىققان، اپات تاقىرىبىن قوزعايتىن «QAITADAN» دەبيۋتتىك ءفيلمى 1 اپتا ىشىندە 500 ميلليون تەڭگەگە جۋىق كاسسالىق تابىس جيناپ، كورەرمەننىڭ ىقىلاسىنا بولەندى. سونىمەن قاتار، وتاندىق كينولار حالىقارالىق فەستيۆالدەردە دە مويىندالىپ، ەلىمىزدىڭ مادەني برەندىنە اينالىپ كەلەدى»، – دەپ اتاپ ءوتتى قۇرمانبەك جۇماعالي.