ايت قارساڭىندا الەۋمەتتىك جەلىنىڭ ءبارى حابارلاندىرۋعا تولىپ كەتتى.
قۇربان ايتتا شالىناتىن قويدى حابارلاندىرۋ سايتتارىنان ساتىپ الۋعا نەمەسە مامانداندىرىلعان سايتتار ارقىلى تاپسىرىس بەرۋگە دە بولادى، دەپ حابارلايدى Almaty-akshamy.kz
ءبىراق قويدىڭ باعاسى سان الۋان: ەڭ ارزانى 35 مىڭنان باستالىپ 150 مىڭعا دەيىن وسە بەرەدى. كەي ساۋداگەر سەمىز قويعا 120 مىڭ تەڭگە سۇرايدى.
الماتى مەن الماتى وبلىسىندا ورتاشا باعا – 60 مىڭ تەڭگە، ەلوردادا مال باسىنا 40-50 مىڭ تەڭگە ارالىعىندا سۇرايدى. پەتروپاۆل مەن سولتۇستىك قازاقستان وبلىسىندا دا وسىنداي باعا. پاۆلودار قالاسى مەن پاۆلودار وبلىسىندا - 40 مىڭنان 60 مىڭ تەڭگە ارالىعىن قامتيدى. شقو، قاراعاندى وبلىسى، شىمكەنتتەگى باعا - 35-تەن 45 مىڭ تەڭگەگە دەيىن. تۇركىستان وبلىسىندا، تارازدا دا وسىنداي باعا. الايدا مۇندا اراكىدىك قىمبات باعا دا كەزدەسەدى: 65-70 مىڭ تەڭگە. باتىس قازاقستان وبلىسىندا قوي باعاسى قىمبات، مىسالى اقتاۋدا قۇرباندىق مالىنىڭ باعاسى 60 مىڭ تەڭگەدەن باستالادى. ايتا كەتۋ كەرەك، بارلىق دەرلىك قالا مەن وبلىستاردا ءتىرى قويدى ارزانىراق ساتىپ الا الاسىز، حابارلاندىرۋ سايتتارىندا كورسەتىلگەن ەڭ تومەنگى باعا – 35 مىڭ تەڭگە. جالپى، باعا مالدىڭ تۇقىمىنا، جاعدايىنا جانە جاسىنا بايلانىستى بولىپ كەلەدى.
ءبىر قىزىعى، كەيبىر شارۋاشىلىقتار بۇل ماسەلەدە قىزمەتتىڭ تولىق سپەكترىن ۇسىنادى. مىسالى، سايتتان جەتكىزۋ نەمەسە "ءوزىم الىپ كەتەمىن" دەگەن فۋنكسيانى تاڭداي الاسىز، قاجەتتى كۇندى بەلگىلەي الاسىز، ءتىپتى مولانىڭ قۇرباندىق مالىن شالۋ كەزىندە قۇران وقىعانىن كورسەتەتىن ۆيدەو مەن سۋرەتتەر ەسەپتەر دە ۇسىنىلادى. سونىمەن قاتار، ساتۋشىلار تۇتىنۋشىنىڭ قالاۋى بويىنشا قوي ەتىن جىلىكتەپ بەرە الادى.
قازاقستان مۇسىلماندارى ءدىني باسقارماسىنىڭ مالىمەتىنشە، شاريعاتتا قۇرباندىققا ءتورت تۇلىك (قوي، ەشكى، سيىر، تۇيە) مالدى شالادى. ەشكىنىڭ جانە قويدىڭ جاسى ءبىر جىلدان اسقانى، سونداي-اق التى ايدان اسقان توقتى (قوي سەكىلدى) ءىرى، قوڭدى بولسا قۇرباندىققا جارامدى.
سيىردىڭ ەكى جاستان اسقانى، ال تۇيەنىڭ جاسى بەس جىلدان اسقانى قۇرباندىققا شالىنادى. سونىمەن قاتار سويىلاتىن مالدىڭ كەمشىلىك، كىناراتى بولماۋى كەرەك.