قۇربان ايت – مۇسىلمانداردىڭ جىل سايىن اتاپ وتەتىن قاسيەتتى ءدىني مەرەكەسى. ءۇش كۇنگە سوزىلادى. حيجرا – مۇسىلمان كۇنتىزبەسى بويىنشا ءزۇلحيجا ايىنىڭ ونىنشى جۇلدىزىندا (ارافا كۇنىنەن كەيىن) جانە ورازا ايت مەيرامىنان 70 كۇن وتكەننەن سوڭ باستالادى، دەپ حابارلايدى Almaty-akshamy.kz Almaty.tv-گە سىلتەمە جاساپ.
قۇربان ايت كەزىندە مۇسىلمانداردىڭ شاماسى كەلگەنى قاجىعا بارادى. ايتتىڭ ءۇش كۇنىندە جاسالاتىن عيبادات كەزىندە ولار ساۋد-ارابيا ەلىندەگى مەككە، مەدينە قالالارىن ارالاپ، پايعامبارىمىز مۇحاممەدتىڭ جۇرگەن جەرلەرىن كورەدى جانە ىزگى ىستەرىمەن تانىسادى. قۇرباندىق شالادى.
قۇرباندىققا قانداي مال شالىنادى؟
قۇرباندىق ءۇشىن مالدىڭ ءۇش ءتۇرىن: تۇيە، سيىر، قوي نە بولماسا ەشكىنى سويۋعا بولادى. قۇستى سويۋعا بولمايدى، ال جىلقى مالى يمام اعزام جولى بويىنشا سوعىس كولىگى سانالاتىندىقتان، قۇرباندىققا جاتپايدى. قۇرباندىققا قوي مەن ەشكىنىڭ ءبىر جاسقا تولعانى، تۇيەنىڭ بەس، سيىر مەن وگىزدىڭ ەكى جاسقا تولعانى سويىلادى. بۇلاردىڭ دەنە مۇشەلەرى تۇگەل ءارى ساۋ بولۋى شارت.
قۇرباندى نە ءۇشىن شالادى؟
قۇرباندىق – مۇسىلمان تانىمى بويىنشا قۇدايدىڭ رازىلىعى ءۇشىن بەرىلەتىن ساداقا، ءدىني امال. مۇسىلمان عالىمدارى قۇربان شالۋدى ءۋاجىپ ەتىلگەن امال سانايدى. ياعني، جاعدايى بار ادامدار شالسا بولادى. ول ءۇشىن ەڭ الدىمەن نيەتتەنەدى. سوسىن جارامدى سانالعان مالدى قۇرباندىققا شالادى. بۇل – يبراھيم پايعامباردان كەلە جاتقان ءراسىم.
مەككەنىڭ جانىندا يبراhيم ءوزىنىڭ ۇلىن قۇرباندىققا شالماق بولادى. ءبىراق قۇران كارىمدە ۇلىنىڭ اتى اتالمايدى، اڭىزداردا يسمايل دەلىنەدى. اللا يبراhءيمنىڭ نيەتىنە ريزا بولىپ، ۇلىنىڭ ورنىنا قۇرباندىققا شالۋعا كوكتەن توقتى تۇسىرەدى. سودان بەرى اللا جولىنا قۇرباندىققا قوي شالۋ ءداستۇرى جالعاسىپ كەلەدى. قۇراندا باياندالاتىن بۇل وقيعالار (14-سۇرە، 41-ايات؛ 37-سۇرە، 41-ايات) تاۋراتتا دا كەزدەسەدى (بىت: 1-12، 22:2-12).
قۇربان شالۋدىڭ ءمانى
ءپىتىر – جان ساداقاسى. زەكەت – مال ساداقاسى. قۇرباندىق – ءار پەندەنىڭ بۇكىل ادامزات الەمى الدىندا وتەيتىن پارىزىن كورسەتەتىن، ءدىني نانىم بويىنشا قۇداي الدىندا ءوز ميسسياسىن اقتاۋعا دايىن ەكەندىگىن بىلدىرەتىن ساداقا.
قۇرباندىقتىڭ ەتىن كىمگە بەرگەن دۇرىس؟
جان سانى كوپ نەمەسە قيىنشىلىعى بار وتباسىلار قۇرباندىق ەتىن تولىقتاي وزدەرىنە قالدىرادى. ال سيىر نە تۇيە سويعاندار مۇقتاج جاندارعا تاراتىپ بەرەدى. وندا تەك ءۇش بولەككە ءبولىپ تاراتۋ دەگەن شەك جوق. ەڭ ماڭىزدىسى، مۇقتاجداردىڭ نە نيەتى ءتۇزۋ ادامداردىڭ پايداسىنا جاراپ، قارنىن تويدىرسا جەتىپ جاتىر.