قۇراننىڭ قۇدىرەتى، جىر جولبارىسى، يزرايل اتىسپايدى، جەتىمنىڭ اقىسىن جەگەن، ەردەن كەتسەڭ دە، ەلدەن كەتپە!

Almaty-akshamy.kz سايتىندا بۇگىن جارىق كورگەن جاڭالىقتارعا شولۋ – كۇن كەرۋەنى

پرەزيدەنت دارحان جازىقبايدى قابىلدادى

مەملەكەت باسشىسى مەملەكەتتىك قىزمەت ىستەرى اگەنتتىگىنىڭ ءتوراعاسىن قابىلدادى. دارحان جازىقباي اگەنتتىكتىڭ بىلتىرعى اتقارعان جۇمىسىنىڭ ەسەبى مەن الداعى كەزەڭگە ارنالعان جوسپارىن تانىستىردى. پرەزيدەنت سەرۆيستىك جانە ادامدارعا بەيىمدەلگەن مەملەكەتتىك اپپاراتتى قالىپتاستىرۋ، مەملەكەتتىك قىزمەتشىلەردىڭ كاسىبي بىلىكتىلىگىن ارتتىرۋ جانە مەملەكەتتىك قىزمەت جۇيەسىنە زاماناۋي تەحنولوگيالاردى ەنگىزۋ ءىسىن جالعاستىرۋدى تاپسىردى.

الماتىلىق وقۋشىلار شەتەلگە  جولداما الدى

جارىس قورىتىندىسى بويىنشا №124 مەكتەپتىڭ «Team 124» كومانداسى «Winning Alliance 2nd pick» جانە «THINK AWARD 2st place» نوميناسياسىن جانە لوندوندا وتەتىن حالىقارالىق «UK first championship 2024» جارىسىنا قاتىسۋعا جولداما، ال №206 مەكتەپ-گيمنازياسىنىڭ وقۋشىسى وڭعاربەك توميريس  اقش-تىڭ حيۋستون قالاسىندا وتەتىن «2024 FIRST Championship، Houston» جارىسىنا قاتىسۋعا سەرتيفيكات جەڭىپ الدى. الماتى قالاسىنىڭ نامىسىن قورعاعان وقۋشىلار بىرنەشە جۇلدەلى ورىندارعا يە بولدى.

الماتىداعى ايرىقشا كورمە

كورمەنىڭ ءبىر بولىگىندە جاساندى ينتەللەكت كوزىمەن بەينەلەنگەن قازاقستان سۋرەتتەلەدى. الماتى ورتالىق كورمە زالى جانە Plan ۆ گالەرەياسىنىڭ قىزمەتكەرلەرى ۇيىمداستىرىپ جاتقان كورمەدە نەيروجەلى ارقىلى جاسالعان 120 جۇمىس ءتۇرى كورسەتىلەدى. جوبا قوناقتارى ەلىمىزدىڭ تابيعاتىن، ساۋلەتى مەن ۇلتتىق اسحاناسىنىڭ بالاما كورىنىستەرىن تاماشالاي الادى.

يزرايل اتىسپايدى

يزرايل رامازان ايىندا گازا سەكتورىنا شابۋىل جاساۋدى توقتاتۋعا كەلىستى. اقش پرەزيدەنتى دجو بايدەن امەريكانىڭ "ەن-بي-سي" تەلەارناسىنا بەرگەن سۇحباتىندا مالىمدەدى. جانە دە ول ىمىرانىڭ كەلەسى اپتادا كۇشىنە ەنەتىنىنە ءۇمىت ءبىلدىردى. ۋاقىتشا ءبىتىم قابىلداناتىن بولسا، تاراپتار ەڭ الدىمەن تۇتقىن الماسۋى مۇمكىن. سونىمەن قاتار، حاماستىقتار اتىستى دوعارۋ جايلى ءپاتۋاعا گازاعا گۋمانيتارلىق كومەك كىرگىزۋ ماسەلەسىن قوسۋدى تالاپ ەتىپ وتىر.

قۇراننىڭ قۇدىرەتى

گروزنىي سوتى 2023 جىلى 4 مامىردا قۇران كىتابىن ورتەگەن ۆولگوگراد تۇرعىنى نيكيتا جۋراۆەلگە ۇكىم شىعاردى. ول ەندى جازاسىن جالپى رەجيمدەگى تۇرمەدە وتەيتىن بولادى. تاسس اگەنتتىگىنىڭ مالىمەتىنە سۇيەنسەك، ول سوت ۇكىمىن تىڭداعاننان كەيىن بارشا مۇسىلماننان كەشىرىم سۇراپ، سوت ۇكىمىن ءادىل دەپ سانايتىنىن مالىمدەگەن. بۇعان دەيىن ول يسلام ءدىنىن قابىلداعىسى كەلەتىنىن ايتقان. ءتىپتى، قۇران وقىپ العاشقى قادامدارىن جاساپ جۇرگەنىن جەتكىزىپتى.

جەتىمنىڭ اقىسىن جەگەن

سوت ورىنداۋشىسىنا قاتىستى ق ر قك 251-بابى (جەكە سوت ورىنداۋشىسىنىڭ وكىلەتتىكتەرىن تەرىس پايدالانۋ) بويىنشا قىلمىستىق ءىس قوزعالدى. الماتى وبلىسىندا جەكە سوت ورىنداۋشىسى ءبىر جارىم جىل بويى اليمەنت جىمقىرعان. باسپا ءسوز قىزمەتىنىڭ مالىمەتتەرىنە قاراعاندا، ءبىر جارىم ايدا بورىشكەردىڭ جالاقىسىنان سوت ورىنداۋشىسىنىڭ ارنايى شوتىنا بالانى اسىراۋعا دەپ 816 مىڭ تەڭگە اۋدارىلعان. سوت ورىنداۋشىسى بۇل اقشانى بالانىڭ اناسىنىڭ شوتىنا ءارى قاراي اۋدارماعان.

قوعامدىق ۇيىقتاۋ كۇنى

مۇنداي كۇندى ەستۋىڭىز بار ما؟ بۇگىن جۇمىس ورنىندا ۇيىقتاۋعا بولادى. قوعامدىق ۇيىقتاۋ كۇنى تۋرالى كوپشىلىك بىلە قويماس.  ويتكەنى بۇل ادامنىڭ ەرەكشە جاعدايدا ۇيىقتاۋعا بەيىمدىلىگىمەن بايلانىستى. بۇل مەرەكە قوعامدىق ۇيقى كۇنى نەمەسە قوعامدىق ۇيىقتاۋ كۇنى دەپ اتالادى (قوعامدىق ۇيىقتاۋ كۇنى). ول جىل سايىن 28 اقپاندا اتاپ وتىلەدى.

تابيعاتتى لاستاما!

ەۋروپارلامەنت دەپۋتاتتارى «تابيعاتتى قالپىنا كەلتىرۋ» تۋرالى جاڭا زاڭدى ماقۇلدادى. سوعان سايكەس كوك تۋنەستى زاڭسىز اۋلاعاندار، ۋلى قالدىقتاردى جەرسىندىرىپ، قورشاعان ورتانى لاستاعاندار، وزون قاباتىن بۇزاتىن زاتتاردى پايدالانعاندار قىلمىستىق جازاعا تارتىلادى. ەكوسيدكە جول بەرىپ، ادام ولىمىنە سەبەپكەر بولعان كاسىپورىن باسشىلارى 8-10 جىلعا دەيىن تۇرمەگە توعىتىلماق.

ەردەن كەتسەڭ دە، ەلدەن كەتپە!

قىرعىزستان مينيسترلەر كابينەتىنىڭ ءتوراعاسى اقىلبەك جاپاروۆ الەۋمەتتىك جەلىدە ءوز پىكىرىن بىلدىرەتىن ايەلدەرگە شەكتەۋلەر ەنگىزۋدى ۇسىندى. ول ءوزىنىڭ ورىنباسارى ەديل بايسالوۆقا الەۋمەتتىك جەلىلەردە پايدا بولاتىن جاريالانىمدارعا مونيتورينگ جۇرگىزۋدى تاپسىردى. مينيسترلەر كابينەتى باسشىسىنىڭ ايتۋىنشا، اجىراسقان ايەل كۇيەۋى مەن ونىڭ اتا-اناسى تۋرالى تەرىس پىكىر بىلدىرمەۋى ءتيىس.

«ءبىز داستۇرلەرىمىز بەن ادەت-عۇرىپتارىمىزعا قايشى كەلەتىن اقپاراتتىڭ تارالۋىن شەكتەۋىمىز قاجەت. كەيبىر كەلىندەر تۋعان اكەسىن ماقتاپ، قايىن اتاسى مەن قايىن ەنەسىن داتتايدى. ال اجىراسقان كەزدە ولار ءوز پىكىرلەرىن الەۋمەتتىك جەلىدە بىلدىرەدى. بۇل ۇلگى الار ءۇردىس ەمەس»، دەدى مينيسترلەر كابينەتىنىڭ ءتوراعاسى.

كەڭەستىڭ كوزى ەدى...

كسرو-نىڭ سوڭعى ۇكىمەت باسشىسى  نيكولاي رىجكوۆ 95 جاسىندا دۇنيەدەن وزدى. قوعام قايراتكەرىنىڭ اقتىق دەمى ماسكەۋ قالاسىندا شىقتى. 1980 جىلداردىڭ ورتاسىنداعى ەكونوميكالىق جاڭالىقتاردا جەتەكشى ءرول اتقارعان ول العاش شاعىن كاسىپكەرلىكتى قولداۋعا قاراي بەت بۇرعان.

نيكولاي رىجكوۆتى قىزمەتىنەن 1990 جىلدىڭ 25 جەلتوقسانىندا كسرو پرەزيدەنتى ميحايل گورباچيەۆ بوساتقان.

جىر جولبارىسى

«حح عاسىردىڭ  گومەرى» اتانعان  جامبىل جابايەۆتىڭ تۋعان كۇنى.

جامبىل جابايەۆ 1846 جىلدىڭ 28 اقپانىندا جامبىل وبلىسىنداعى جامبىل تاۋىنىڭ ەتەگىندە دۇنيەگە كەلگەن. ۇلى ءجۇزدىڭ شاپىراشتى تايپاسىنىڭ ەكەي رۋىنان شىققان. ارعى اتالارى داۋلەتتى بولعانىمەن، جامبىلدىڭ اكەسى جاپا شارۋا كىسى بولعان. كەي تاريحي دەرەكتە جىر الىبىنىڭ اكەسى تۋرالى شوقپىت شاپاندى كەدەي بولعان دەگەن دە سيپاتتاما كەزدەسەدى.

"قاقاعان قار ارالاس سوعىپ بوران،

ەل ۇرەي - كوك نايزالى جاۋ تورىعان.

بايعارا، جامبىل، حاندا مەن تۋىپپىن،

جامبىل دەپ قويىلىپتى اتىم سودان"، - دەيدى جامبىل اقىن.

جامبىل 1945 جىلى 22 ماۋسىمدا الماتى وبلىسىنىڭ ۇزىناعاش ەلدى مەكەنىندە 99 جاسىندا دۇنيەدەن وتكەن.