«قۇقىقتىق ءدارىحانا» جوباسى الماتىلىقتارعا ءوز قۇقىقتارىن قورعاۋعا جانە قۇقىقتىق ساۋاتتىلىعىن ارتتىرۋعا كومەكتەسەدى

الماتى قالاسىنىڭ پروكۋراتۋراسى حالىقتىڭ قۇقىقتىق ساۋاتتىلىعىن ارتتىرۋعا باعىتتالعان «قۇقىقتىق ءدارىحانا» اتتى الەۋمەتتىك جوبانى جۇزەگە اسىرۋدى جالعاستىرىپ كەلەدى. بۇل باستاما 2025–2030 جىلدارعا ارنالعان «زاڭ جانە ءتارتىپ» يدەولوگياسىن ىلگەرىلەتۋ تۇجىرىمداماسى اياسىندا ىسكە اسىرىلۋدا جانە ءوز تيىمدىلىگىن دالەلدەپ ۇلگەردى. 2025 جىلدىڭ ماۋسىم ايىنان باستاپ جوبا اياسىنداعى كەڭەس بەرۋ ورىندارى قالانىڭ ءۇش ساۋدا-ويىن-ساۋىق ورتالىعىندا جۇمىس ىستەيدى. بۇگىن كەزەكتى اكسيا «Dostyk Plaza» ساۋدا ورتالىعىندا ءوتتى. مۇندا ءاربىر قالا تۇرعىنى پروكۋراتۋرا قىزمەتكەرلەرىنەن تەگىن قۇقىقتىق كومەك الا الدى. — ءبىز جوبانى بيىلعى ماۋسىم ايىندا باستادىق، وسى ۋاقىتقا دەيىن مىڭنان استام ءوتىنىش قابىلدادىق، — دەدى الماتى قالاسى پروكۋراتۋراسىنىڭ ءبولىم باستىعى ءادىل قارىمساقوۆ. ونىڭ ايتۋىنشا، ازاماتتار ءتۇرلى ماسەلەلەرمەن جۇگىنەدى. ماسەلەن، اليمەنت تولەۋ مىندەتتەمەلەرى، قىلمىستىق ىستەردىڭ تەرگەلۋى جانە الاياقتىق، اسىرەسە ينتەرنەت ارقىلى جاسالاتىن الاياقتىقتار بويىنشا شاعىمدار كوپ تۇسەدى ەكەن. الاياقتار وزدەرىن بانك نەمەسە مەملەكەتتىك ورگان قىزمەتكەرلەرى رەتىندە تانىستىرىپ، ادامداردى الداپ سوعادى. – ءبىز، اسىرەسە، قارت ازاماتتارعا ءوز دەرەكتەرىن بەرمەس بۇرىن جانە اۋدارىم جاساماس بۇرىن تۋىستارىمەن كەڭەسۋگە كەڭەس بەرەمىز، – دەپ اتاپ ءوتتى ءادىل قارىمساقوۆ. «قۇقىقتىق ءدارىحانا» جوباسى ازاماتتار مەن پروكۋراتۋرا وكىلدەرىنىڭ تىكەلەي بايلانىس الاڭى رەتىندە ۇيىمداستىرىلعان. ءۇش ساعات بويى زاڭگەرلەر سۇراقتارعا جاۋاپ بەرىپ، ارىز جازۋعا كومەكتەسىپ، وتىنىشتەرىن سول جەردە تىركەي الادى. باستى ماقسات – حالىققا جاقىن بولۋ، اسىرەسە مەملەكەتتىك ورگاندارعا سيرەك جۇگىنەتىن جانە قايدا بارۋ كەرەك ەكەنىن بىلمەيتىن ادامدارعا كومەك كورسەتۋ. جول-كولىك وقيعاسىنا قاتىستى ماسەلە بويىنشا كەڭەس العان الماتىلىق سەرافيما زينوۆيەۆا ءوز پىكىرىن بىلاي ءبىلدىردى: – ماعان ءبارىن ەگجەي-تەگجەيلى ءتۇسىندىرىپ بەردى، قانداي قادامدار جاساۋ كەرەگىن ايتتى. ەندى ءوز ازاماتتىق قۇقىقتارىمدى قالاي قورعاۋ كەرەگىن بىلەمىن. بۇعان دەيىن تەك جەكە زاڭگەرلەرگە جۇگىنەتىنمىن، ال پروكۋراتۋرادان تەگىن كەڭەس الىپ، وتە ريزا بولدىم، – دەدى تۇرعىن. تۇرعىننىڭ ايتۋىنشا، مۇنداي باستامالار قوعام ءۇشىن وتە ماڭىزدى. ويتكەنى، كوپتەگەن ادام ءوز قۇقىعىن بىلمەيدى. وسىنداي جوبالار ماسەلەنى شەشۋگە ءۇمىت سىيلاپ قانا قويماي، قۇقىقتىق ساۋاتتىلىقتى ارتتىرادى. الماتى قالاسىنىڭ پروكۋراتۋراسى جوبانى جالعاستىرىپ، اكسيالاردىڭ گەوگرافياسىن كەڭەيتۋدى جوسپارلاپ وتىر. «قۇقىقتىق ءدارىحانا» كوپتەگەن ادامعا قول ۇشىن سوزدى، ال تۇرعىنداردىڭ وتىنىشتەرى كۇن ساناپ ارتىپ كەلەدى. بۇل – قولجەتىمدى قۇقىقتىق كومەكتىڭ قوعامعا اسا ماڭىزدى ەكەنىن دالەلدەيدى.