قازاق مەن وزبەك شەكاراسىندا قۇپيا تۋننەل تابىلدى. جاسىرىن جولمەن جۇرگەن قۇقىق قورعاۋ ورگانى قىزمەتكەرلەرى قۇنى 1 ميلليارد سوم تۇراتىن دارى-دارمەككە تاپ بولعان، - دەپ حابارلايدى اlmaty-akshamy.kz gazeta.uz-عا سىلتەمە جاساپ.
وسىلايشا وزبەكستاندا قازاقستان ارقىلى ءۇندىستاننان ساپاسىز ءىرى كولەمدەگى دارى-دارمەكتەردى جەتكىزۋمەن اينالىسقان ترانسشەكارالىق قىلمىستىق توپتىڭ جولى كەسىلدى. جەدەل شارانى مەملەكەتتىك كۇزەت قىزمەتى شەكارا اسكەرلەرىمەن جانە كەدەن كوميتەتىنىڭ "تاشكەنت-اەرو" مامانداندىرىلعان كەدەن كەشەنىمەن بىرلەسىپ جۇرگىزگەن.
جەدەل ءىس-شارا بارىسىندا دارى-دارمەكتىڭ كەلەسى پارتياسى دەليدەن الماتىعا تاشكەنت ارقىلى ترانزيتپەن جەتكىزىلىپ، ودان كەيىن قازاقستانمەن شەكارالاس تۇركىستان وبلىسى، سارىاعاش اۋدانى، دوستىق اۋىلىنا جەتكىزىلىپ، جاسىرىن تۋننەل ارقىلى ورىكزورعا تاسىمالدانعانى انىقتالدى.
ۇزىندىعى 310 مەتر تۋننەل ورىكزور اۋىلىنداعى 1975 جىلى تۋعان تۇرعىننىڭ ۇيىنەن شىققان. ەڭ قىزىعى، قۇپيا تۋننەل ارنايى جەلدەتۋ جانە جارىقتاندىرۋمەن جابدىقتالعان. ءتىپتى، جۇك تاسىمالداۋعا ارنالعان اربالار مەن ارقاندار بار.
قىلمىستىق توپتىڭ كۇدىكتى مۇشەلەرىنەن ءۇندىستاندا جاسالعان 107 اتاۋداعى 17 048 قاپتاما ەسىرتكى زاتتارى تاركىلەندى. اتاپ ايتقاندا، البۋمين، رەمدەسيۆير، مەروپەنەم سەكىلدى تۇرلەرى بار بولىپ شىقتى. ولاردىڭ جالپى قۇنى 1 ميلليارد سومنان اسادى.
بۇگىنگى تاڭدا وسى ءىس بويىنشا قىلمىستىق ءىس قوزعالىپ، قىلمىستىق توپقا قاتىسى بار دەگەن كۇدىكپەن بىرنەشە ادام ۇستالعان.