سولتۇستىك قازاقستانعا كوشىرۋ باعدارلاماسى بويىنشا 1 ميللياردتان استام تەڭگە ۇرلانعان
سولتۇستىك قازاقستانعا قونىس اۋدارۋ باعدارلاماسىنىڭ اياسىندا مەملەكەتتەن بولىنگەن قاراجاتتى ۇرلاۋ دەرەكتەرى انىقتالدى، دەپ حابارلايدى aqshamnews.kz
پروكۋراتۋرانىڭ مالىمەتىنشە، باعدارلاماعا جالعان تۇلعالار قاتىسقان، ياعني شىنايى قونىس اۋدارۋشىلاردىڭ ورنىنا ەشقاشان سولتۇستىككە كوشپەگەن ادامداردىڭ ءاتى-جونى تىركەلگەن. سونىمەن قاتار، قۇجاتتار كوبىنەسە تۇرۋعا جارامسىز نەمەسە اپاتتى جاعدايداعى عيماراتتارعا راسىمدەلگەن، ال بۇل عيماراتتار تومەن باعامەن ساتىپ الىنعان.
ەڭ سوراقىسى، كەيبىر ازاماتتار وزدەرىنىڭ قۇجاتتارى بويىنشا رەسمي تۇردە سولتۇستىك وڭىرلەرگە كوشىرىلگەندەرىن بىلمەگەن. بۇل زاڭسىز ارەكەتتەر شىعىس قازاقستان، قاراعاندى، اقمولا، قوستاناي وبلىستارىندا، سونداي-اق اباي جانە ۇلىتاۋ وڭىرلەرىندە انىقتالدى. پروكۋراتۋرا وسىعان بايلانىستى 20-دان استام قىلمىستىق ءىس قوزعاپ، تەرگەۋ امالدارىن باستاپ كەتتى.
بۇل جاعداي قونىس اۋدارۋ باعدارلاماسىنىڭ نەگىزگى ماقساتىنا ۇلكەن سوققى بولىپ وتىر. باعدارلامانىڭ باستى ماقساتى – جۇمىس كۇشى جەتىسپەيتىن سولتۇستىك وڭىرلەرگە حالىقتى ىنتالاندىرۋ ارقىلى ەكونوميكالىق جانە الەۋمەتتىك دامۋدى قامتاماسىز ەتۋ ەدى. الايدا، سىبايلاس جەمقورلىق دەرەكتەرى بۇل باستامانىڭ بەدەلىن ءتۇسىرىپ، مەملەكەت قاراجاتىنىڭ ءتيىمسىز پايدالانىلۋىنا الىپ كەلدى.