قتج پويىزدارىنىڭ جولسەرىكتەرى ورازا ۇستاعان جولاۋشىلارعا قۇرما مەن سۋ تاراتتى

كەشە ۇلتتىق تاسىمالداۋشىنىڭ پويىزدارىندا جولاۋشىلار ءۇشىن ورازانىڭ العاشقى كۇنى جايلى ءوتتى.

پويىز جولسەرىكتەرى جولاۋشىلاردى جىلى قارسى الىپ، ولارعا قۇرما مەن سۋ بوتەلكەلەرىن تاراتتى. بۇل اكسيا «جولاۋشىلار تاسىمالى» اق بارلىق پويىزدارىندا وتكىزىلدى، دەپ حابارلايدى اlmaty-akshamy.kz.

ۇلتتىق تاسىمالداۋشى  رامازان ايىندا جولاۋشىلارعا بىر-بىرىنە تۇسىنىستىكپەن قاراپ، اشۋلانباۋدى، وتىرعان ورىندا تازالىقتى ساقتاۋدى، سونداي-اق، دەنساۋلىققا مۇقيات قاراۋعا كەڭەس بەرەدى. ورازا ۇستاعان جاندارعا ساياحات كەزىندە السىزدىك سەزىنبەۋ ءۇشىن ساپار الدىندا دارىگەرگە قارالۋ كەرەكتىگىن ەسكەرتەدى. 

سونىمەن قاتار، رامازان ايىندا پويىزدارداعى ۆاگون-مەيرامحانالار ارنايى جۇمىس كەستەسىنە اۋىسادى.

ۆاگون-مەيرامحانالار كۇندەلىكتى 8:00-دەن 24:00-گە دەيىن جۇمىس ىستەيدى. ورازا تۇتقان جاندارعا ىڭعايلى بولۋ ءۇشىن مەيرامحانالار سارەسى ۋاقىتىندا تاڭعى ساعات 03:30-دان 05:00-گە دەيىن اشىق بولادى.

ۆاگون-مەيرامحانالاردا جولاۋشىلارعا سۋ مەن قۇرما تەگىن بەرىلەدى.

«جولاۋشىلار تاسىمالى» اق بارلىق مۇسىلمانداردى قاسيەتتى رامازان ايىنىڭ باستالۋىمەن شىن جۇرەكتەن قۇتتىقتايدى! ۇستاعان ورازالارىڭىز بەن نيەتتەرىڭىز قابىل بولسىن!