ق ر پرەمەر-مينيسترى ءاليحان سمايىلوۆ سوت اكىمشىلىگىنىڭ باسشىسى نايل احمەتزاكيروۆپەن كەزدەسۋ وتكىزدى، ونىڭ بارىسىندا سوت جۇيەسىن رەفورمالاۋ جونىندەگى زاڭنامالىق تۇزەتۋلەردىڭ ەكىنشى بلوگى تالقىلاندى.
بۇعان دەيىن جوعارعى سوت ءتوراعاسى اسلامبەك مەرعالييەۆ مەملەكەت باسشىسىنا ۇسىنىلىپ وتىرعان جاڭاشىلدىقتار تۋرالى حاباردار ەتكەن بولاتىن.
تۇزەتۋلەردى سەنات الاڭىندا ارنايى قۇرىلعان جۇمىس توبى ازىرلەدى. وزگەرىستەر «قازاقستان رەسپۋبليكاسىنىڭ سوت جۇيەسى مەن سۋديالارىنىڭ مارتەبەسى تۋرالى» كونستيتۋسيالىق زاڭعا، پروسەستىك كودەكستەرگە، سونداي-اق ءبىرقاتار ارنايى زاڭدارعا ەنگىزىلەدى.
جوعارعى سوت ءتوراعاسى ۇسىنعان نەگىزگى جاڭاشىلدىقتاردىڭ ءبىرى – قىلمىستىق جانە ازاماتتىق ىستەر بويىنشا كاسساسيالىق ءوتىنىشحاتتاردى الدىن الا قاراۋدى الىپ تاستاۋ.
بۇل رەتتە ەل پرەزيدەنتىنىڭ تاپسىرماسى بويىنشا ءقازىر دەربەس كاسساسيالىق ينستانسيالار قۇرۋ ماسەلەسى پىسىقتالىپ جاتقانىن ايتا كەتۋ كەرەك.
زاڭ جوباسى سونداي-اق سوت القاسىنىڭ جانە سوت تورەلىگى ساپاسى جونىندەگى كوميسسيانىڭ جۇمىسىن جەتىلدىرۋگە، سۋديالاردىڭ تاۋەلسىزدىگىن كۇشەيتۋگە باعىتتالعان.
مەملەكەت باسشىسىنىڭ تاپسىرمالارىن ىسكە اسىرۋ اياسىندا اپەللياسيالىق نەمەسە كاسساسيالىق ساتىداعى سوت اكتىسىندە كورسەتىلگەن ورەسكەل بۇزۋشىلىقتاردىڭ بارلىق فاكتىسى اۆتوماتتى تۇردە سوت القاسىنا بەرىلەتىن جاڭا مەحانيزم ەنگىزىلۋدە.
سونداي-اق باعالاۋ كورسەتكىشتەرىنىڭ سانى وڭتايلانادى، وتستاۆكاداعى سۋديالار ءۇشىن الەۋمەتتىك پاكەت جاقسارادى، مەملەكەتتىك قىزمەتكەر بولىپ تابىلمايتىن زاڭگەرلەر ءۇشىن سوت تورەلىگى اكادەمياسىندا وقۋ قولجەتىمدى بولماق.
ن. احمەتزاكيروۆ زاڭ جوبالارىن ىسكە اسىرۋ بيۋدجەتتەن قوسىمشا قاراجات ءبولۋدى تالاپ ەتپەيتىنىن اتاپ ءوتتى. شىعىندار ەل پرەزيدەنتىنىڭ تاپسىرماسى بويىنشا ەنگىزىلگەن سوت جۇيەسىن (بارلىق مەملەكەتتىك ورگاندار شىعىندارىنىڭ جالپى سوماسىنان كەمىندە 6،5%-ى) قارجىلاندىرۋدىڭ جاڭا مودەلى اياسىندا جۇزەگە اسىرىلادى.
ق ر كونستيتۋسياسىنىڭ 61-بابىنا سايكەس ەنگىزىلگەن تۇزەتۋلەر بويىنشا قابىلدانعان ۇكىمەتتىڭ وڭ قورىتىندىسى ماجىلىستە زاڭ جوبالارىنا ودان ءارى باستاماشىلىق جاساۋ ءۇشىن پارلامەنت دەپۋتاتتارىنا جولدانادى.