الماتى فيليالىنىڭ ديرەكتورى قازاقستان رەسپۋبليكاسى پرەزيدەنتىنىڭ جانىنداعى اكادەمياعا ءتۇسۋ ەرەجەلەرىنە توقتالىپ، ءتۇسىندىردى.
قازاقستان رەسپۋبليكاسى پرەزيدەنتىنىڭ جانىنداعى مەملەكەتتىك باسقارۋ اكادەمياسى ماگيستراتۋرا مەن دوكتورانتۋراعا قۇجاتتاردى قابىلداۋدى باستادى. بۇل تۋرالى جانە وقۋ مۇمكىندىكتەرى تۋرالى وڭىرلىك كوممۋنيكاسيالار قىزمەتىندە وتكەن بريفينگتە اكادەميانىڭ الماتى قالاسى فيليالىنىڭ ديرەكتورى ايگەرىم ءابىلوۆا تولىعىراق بايانداپ بەردى، دەپ حابارلايدى almaty-akshamy.kz
قۇجاتتاردى قابىلداۋ 3 ساۋىردە باستالىپ، اعىمداعى جىلدىڭ 29 ماۋسىمىنا دەيىن جالعاسادى
«ءبىز مەملەكەتتىك قىزمەتشىلەردى، كۆازيمەملەكەتتىك جانە جەكە سەكتور قىزمەتكەرلەرىن كونكۋرسقا قاتىسۋعا جانە اكادەميانىڭ ءبىر مۇشەسى بولۋعا شاقىرامىز. بيىل 6 ماگيستراتۋرا، 3 دوكتورانتۋرا جانە 2 مودۋلدىك باعدارلاما بويىنشا ۇمىتكەرلەر قابىلدانادى، سوعان سايكەس، جۇمىس ورنىندا ۇزبەي وقۋعا مۇمكىندىك بولادى»، - دەدى ا.ءابىلوۆا.
سپيكەردىڭ ايتۋىنشا، مەملەكەتتىك ءبىلىم بەرۋ تاپسىرىسى بويىنشا تالاپكەرلەرگە قويىلاتىن مىندەتتى تالاپ مەملەكەتتىك ورگان باسشىسى قول قويعان جولداما بولىپ تابىلادى.
شەتەلدىك ازاماتتاردى قوسپاعاندا، تاعى ءبىر تالاپ – مەملەكەتتىك ءتىلدى مەڭگەرۋدىڭ قاجەتتى دەڭگەيىن راستاۋ.
اكادەميادا قازاق ءتىلىن مەڭگەرۋ دەڭگەيىن انىقتاۋعا ارنالعان ونلاين سەرۆيس ازىرلەندى جانە QRT تەستىن تاپسىرعىسى كەلەتىندەر ءۇشىن ارنايى كۋرستار قاراستىرىلعان.
«اكادەميانىڭ قازاق تىلىندەگى ءبىلىمىن باعالاۋدىڭ وزىندىك QAZAQ RESMI TEST جۇيەسى بار، ونىڭ ناتيجەلەرى قازتەستپەن بىرگە اكادەمياعا قۇجات تاپسىرۋ كەزىندە قابىلدانادى. ءتىلدى مەڭگەرۋ دەڭگەيىن باعالاۋدىڭ ءداستۇرلى ادىستەرىنەن ايىرماشىلىعى، تەستىلەۋدى ونلاين رەجيمىندە، كومپيۋتەردەن، كەز كەلگەن ۋاقىتتا، ىڭعايلى جاعدايدا تاپسىرۋعا بولادى»، - دەپ ءتۇسىندىردى سپيكەر.
نەگىزگى وزگەرىستەرگە كەلەتىن بولساق، مەملەكەتتىك قىزمەتشى – اكادەميا تۇلەگىن وقۋعا جىبەرگەن مەملەكەتتىك ورگاندا جۇمىس ىستەۋ مىندەتىنەن الىنىپ تاستالادى.
ەندى مەملەكەتتىك قىزمەتشىلەرگە بەس جىل ەمەس، مەملەكەتتىك قىزمەتتە ءۇش جىل عانا جۇمىس ىستەۋ كەرەك.
سونىمەن قاتار سپيكەر اكادەميا ەرەجەلەرىندەگى باسقا دا وزگەرىستەرمەن ءبولىستى:
– سىرتقى ساياساتتى جۇزەگە اسىرۋ، حالىقارالىق ىنتىماقتاستىق جانە شەت تىلدەرىن مەڭگەرۋ ءۇشىن كادرلاردى دايارلاۋدى كۇشەيتۋ ماقساتىندا «حالىقارالىق قاتىناستار» باعدارلاماسى بويىنشا وقۋ مەرزىمى 1 جىلدان 2 جىلعا دەيىن ۇزارتىلدى.
- PhD باعدارلامالارى بويىنشا جۇمىس ءوتىلى 3 جىلدان 5 جىلعا دەيىن ۇلعايتىلدى.
- ەگەر وتكەن جىلى مەملەكەتتىك ورگان باسشىسىنىڭ قولى قويىلعان جولداما الدىنالا وقۋعا ءتۇسۋ كەزىندە بەرىلۋى مۇمكىن بولسا، بيىلعى جىلى تالاپكەرلەر قۇجاتتاردى قابىلداۋ اياقتالعانعا دەيىن جولدامانى تاپسىرۋى ءتيىس، ياعني اعىمداعى جىلدىڭ 29 ماۋسىمىن قوسا العاندا.
– بيىلعى مودۋلدىك ماگيستراتۋرا باعدارلاماسى تەك مەملەكەتتىك قىزمەتشى ەمەستەرگە ارنالعان
سونداي-اق سپيكەر 1-30 قاراشا ارالىعىندا مودۋلدىك ماگيستراتۋراعا قۇجاتتاردى قوسىمشا قابىلداۋ جۇرگىزىلەتىنىن اشىق ايتتى. قۇجاتتار ەكى كەزەڭدە قابىلدانادى جانە اكادەميانىڭ admission.apa.kz اقپاراتتىق پلاتفورماسىندا ونلاين رەجيمىندە جۇزەگە اسىرىلاتىنىن بريفينگتە تولىققاندى جەتكىزدى.