قاسىم-جومارت توقايەۆ تۇرىكمەنستاندا وتكەن ورتالىق ازيا ەلدەرى باسشىلارىنىڭ كونسۋلتاتيۆتىك كەزدەسۋىنە قاتىستى.
قازاقستان پرەزيدەنتى ورتالىق ازيانى تۇراقتى، ەكونوميكالىق جاعىنان دامىعان، وركەندەگەن وڭىرگە اينالدىرۋعا باعىتتالعان ەكونوميكا، ساۋدا، مادەنيەت سالالارى بويىنشا ءبىرقاتار باستاما كوتەردى، دەپ حابارلايدى Almaty-akshamy.kz.
بۇل تۋرالى پرەزيدەنتتىڭ باسپا ءسوز حاتشىسى بەرىك ءۋالي Facebook-تەگى پاراقشاسىندا جازدى. «مەملەكەت باسشىسى ايماقتىڭ كولىك دالىزدەرىنە ينتەگراسيالانعان تاۋار وتكىزۋدىڭ ءبىرىڭعاي جەلىسىن جانە اقتاۋ ايلاعىنىڭ بازاسىندا «كونتەينەرلىك حاب» اشۋدى ۇسىندى. پرەزيدەنت ءوز سوزىندە ورتالىق ازياداعى كولىك كوممۋنيكاسيالارىن دامىتۋ ەلدەرىمىزدەگى ىشكى جالپى ءونىمدى 15 پايىزعا ارتتىرۋعا مۇمكىندىك بەرەتىنىن اتاپ ءوتتى»، دەلىنگەن حابارلامادا.
قاسىم-جومارت توقايەۆ ايماقتىڭ نەگىزگى ماسەلەلەرىنىڭ ءبىرى رەتىندە – سۋ رەسۋرستارىمەن قامتاماسىز ەتۋ دەپ ەسەپتەيدى. ونىڭ ايتۋىنشا، ماسەلەلەردى سۋدى تەڭ دارەجەدە پايدالانۋ، تاراپتاردىڭ مۇددەلەرىن ەسكەرۋ، ءوزارا مىندەتتەردى ىسكە اسىرۋ قاعيداتىنا سۇيەنە وتىرىپ شەشۋ قاجەت.
«سۋ – ورتالىق ازيا ەلدەرىنىڭ اراسىنا سىنا قاعاتىن ەمەس، كەرىسىنشە، بىرىكتىرەتىن رەسۋرس بولۋى كەرەك»، –دەدى مەملەكەت باسشىسى.
قازاقستان پرەزيدەنتى جۇمىس ساپارى اياسىندا تۇرىكمەنستان باسشىسى گۋربانگۋلى بەردىمۇحامەدوۆپەن كەزدەستى. تاراپتار ەكىجاقتى ستراتەگيالىق ىنتىماقتاستىقتاعى كەڭ اۋقىمدى ماسەلەلەردى تالقىلادى. ساۋدا-ەكونوميكالىق جانە گۋمانيتارلىق ىنتىماقتاستىقتى ودان ءارى تەرەڭدەتۋدىڭ پەرسپەكتيۆالارىن ايقىندادى.