بالالار - مەملەكەتىمىزدىڭ جارقىن بولاشاعى
2022 جىلدى بالالار جىلى دەپ جاريالاۋ كەرەك. بۇل تۋرالى قازاقستاندىقتاردى جاڭا جىلمەن قۇتتىقتاعان ق ر پرەزيدەنتى قاسىم-جومارت توقايەۆ ايتتى، دەپ حابارلايدى Almaty-akshamy.kz قازاقپاراتقا سىلتەمە جاساپ.
«مەن مەملەكەت باسشىسى رەتىندە وسكەلەڭ ۇرپاقتىڭ بولاشاعىنا باسا ءمان بەرەمىن. جاستارعا زور ءۇمىت ارتامىن. جاستارىمىز اتقارىلىپ جاتقان اۋقىمدى جۇمىستىڭ، رەفورمالاردىڭ يگىلىگىن مىندەتتى تۇردە كورەدى. ولاردىڭ اراسىندا كوزى اشىق، كوكىرەگى وياۋ، ويى ۇشقىر ازاماتتار از ەمەس. ءبىز وسكەلەڭ ۇرپاققا جول اشۋ ءۇشىن بارلىق جاعدايدى جاساۋىمىز كەرەك».-دەدى پرەزيدەنت.
وسى رەتتە مەملەكەت باسشىسى بالالارعا ەرەكشە كوڭىل ءبولۋ كەرەكتىگىن جەتكىزدى.
«بالالار - مەملەكەتىمىزدىڭ جارقىن بولاشاعىنىڭ كەپىلى. سوندىقتان دا الداعى جىلدى بالالار جىلى دەپ جاريالاۋ كەرەك دەپ ەسەپتەيمىن. اڭگىمە جالاڭ ۇران مەن مەرەكەلىك شارالار تۋرالى ەمەس. ءبىرىنشى كەزەكتە بيلىك تاراپىنان بالالاردى قورعاۋ ءۇشىن دەنساۋلىق ساقتاۋ، ءبىلىم بەرۋ، الەۋمەتتىك قولداۋ باعىتىندا ناقتى شارالار قولعا الىنۋى كەرەك. وسكەلەڭ ۇرپاقتىڭ ۇيلەسىمدى دامۋى مەن باقىتتى بالالىق شاعى – ءبىزدىڭ جالپىۇلتتىق مىندەتىمىز»،-دەدى قاسىم-جومارت توقايەۆ.
ايتا كەتەيىك، مەملەكەت باسشىسى قاسىم-جومارت توقايەۆ قازاقستاندىقتاردى جاڭا جىلمەن قۇتتىقتادى.