جيىن بارىسىندا ەتنوسارالىق قاتىناستار سالاسىنداعى مەملەكەتتىك ساياساتتى قولداۋ باعدارلامالارى ءتۇسىندىرىلدى، - دەپ حابارلايدى Almaty-akshamy.kz.
ءماجىلىس دەپۋتاتتارى يرينا سميرنوۆا، اناتوليي بويچين جانە عازيز قۇلاحمەتوۆ جۇمىس ساپارى اياسىندا جاستار وكىلدەرىمەن (ونىڭ ىشىندە جۇمىسشى جاستار، جاستار اراسىنداعى بەيرەسمي كوشباسشىلار، بەلسەندىلەر)، قوعامدىق پىكىر كوشباسشىلارىمەن، قوعامدىق كەلىسىم كەڭەسى مەن جەرگىلىكتى ءوزىن-وزى باسقارۋ ورگاندارىنىڭ مۇشەلەرىمەن، جالپى ءبىلىم بەرۋ مەكەمەلەرى مەن كوللەدجدەردىڭ باسشىلىعىمەن، وقىتۋشىلار قۇرامىمەن، ۇكىمەتتىك ەمەس ۇيىمداردىڭ وكىلدەرىمەن، ءدىني قىزمەتكەرلەرمەن جانە عيبادات مەكەمەلەرىنىڭ قىزمەتكەرلەرىمەن (يمامدار، ءدىني قىزمەتكەرلەر جانە ت.ب.) كەزدەسۋلەر وتكىزدى.
قازاقستان رەسپۋبليكاسى تاۋەلسىزدىگىنىڭ 30 جىلدىعىن مەرەكەلەۋ اياسىندا ق ر پارلامەنتى ءماجىلىسىنىڭ دەپۋتاتتارى قازاقستان حالقى اسسامبلەياسى جانىنداعى جۋرناليستەر كلۋبىمەن، باسقا دا ب ا ق وكىلدەرىمەن دوڭگەلەك ۇستەلدە جينالدى. وندا ەتنوسارالىق جۋرناليستيكانىڭ دامۋ ماسەلەلەرى، زاماناۋي پاتريوتتىق سەزىمدى تاراتۋ جولدارى قارالدى.
«اقپاراتتىڭ بۇگىنگى قوعامداعى ماڭىزدى ءرولىن، ونداعى جۋرناليستەردىڭ اتقارار ءرولىن ەسكەرسەك، ولارعى جۇكتەلگەن جۇكتىڭ اۋىر ەكەنى ءسوزسىز. قوعامدا وزىندىك كوزقاراسى بار، ءبىلىمى بار، شىعارماشىلىعىن شارىقتاتا بىلگەن جۋرناليستەر از ەمەس. سوناۋ 2000-جىلداردا اقپاراتتىق كەڭىستىكتە قازاق تىلىنە سۇرانىستىڭ ازدىعى سەزىلگەنىمەن، ءومىردىڭ كوشىمەن، لەبىمەن قازاق تىلىنە دەگەن سۇرانىس ۇدايا ارتىپ وتىر. ءالى دە وسى باعىتتا جۇمىس ىستەۋىمىز قاجەت»، - دەدى عازيز زينەل-عابيدەن ۇلى.
ودان بولەك، تۇعىرلى تاۋەلسىزدىك مەرەكەسىن اتاپ ءوتۋ شەڭبەرىندە ەتنوسارالىق قاتىناستار مەن جالپىۇلتتىق بىرلىكتى دامىتۋعا ەلەۋلى ۇلەس قوسقان، ەرەكشە كوزگە تۇسكەن جۇرتشىلىق وكىلدەرىن قازاقستان حالقى اسسامبلەياسىنىڭ العىس گراموتاسىمەن ماراپاتتاۋ ءراسىمى ءوتتى.
ق ر پارلامەنتى ءماجىلىسى دەپۋتاتتارىنىڭ قاتىسۋىمەن وتكەن جوعارىدا اتالعان ءىس-شارالاردىڭ بارلىعى، ەڭ الدىمەن، قازاقستاندىق بىرەگەيلىك پەن جالپىۇلتتىق بىرلىكتى نىعايتۋعا، قازاقستاننىڭ ەتنوستىق توپتارىنىڭ داستۇرلەرىن، تىلدەرىن، مادەنيەتتەرىن ساقتاۋ، ەتنوسارالىق تولەرانتتىلىق پەن قوعامدىق كەلىسىمدى قالىپتاستىرۋ، اسسامبلەيانىڭ ماقساتتارى مەن مىندەتتەرىنە قول جەتكىزۋدە ەتنومادەني بىرلەستىكتەردىڭ كۇش-جىگەرىن بىرىكتىرۋ جونىندەگى ورتاق مىندەتتەردى شەشۋگە باعىتتالعان.