تەمەكى جارناماسى باقىلانادى
ق ر دەنساۋلىق ساقتاۋ مينيسترلىگى 2021-2025 جىلدارعا ارنالعان «دەنى ساۋ ۇلت» ۇلتتىق جوباسىنىڭ اياسىندا تەمەكى جارناماسىن باقىلاۋعا الۋدى جوسپارلاپ وتىر، دەپ حابارلايدى Almaty-akshamy.kz قازاقپاراتقا سىلتەمە جاساپ.
بۇل تۋرالى ۆەدومستۆونىڭ باسپا ءسوز قىزمەتى قازاقپارات جولداعان ساۋالعا بەرگەن جاۋابىندا ءمالىم ەتتى. «ۇلتتىق جوبانىڭ 4-باعىتىنداعى «سالاۋاتتى ءومىر سالتىن ۇستاناتىن حالىقتىڭ ۇلەسىن ارتتىرۋ جانە بۇقارالىق سپورتتى دامىتۋ» ءىس-شارالارىن جۇزەگە اسىرۋ ءۇشىن 1 ملرد 561 ملن تەڭگە كولەمىندە قاراجات قاراستىرىلعان»، - دەپ جازىلعان جاۋاپتا. ايتۋلارىنشا، بۇل قاراجات مىناداي 11 باعىت بويىنشا يگەرىلمەك:
1) دۇنيەجۇزىلىك دەنساۋلىق ساقتاۋ ۇيىمىنىڭ «STEPS» ادىستەمەسى بويىنشا ينفەكسيالىق ەمەس اۋرۋلاردىڭ تاۋەكەل فاكتورلارىنىڭ تارالۋىن ايقىندايتىن زەرتتەۋ جۇرگىزۋ، تاۋەكەل فاكتورلارىنىڭ تارالۋىن تالداۋ جانە شارالار قابىلداۋ؛
2) حالىقتىڭ ۇرپاقتى بولۋ دەنساۋلىعى تۋرالى اقپاراتقا قول جەتكىزۋىن كەڭەيتۋ؛
3) «سالاۋاتتى قالالار، وڭىرلەر» جوباسىن ەنگىزۋ؛
4) «دەنساۋلىقتى نىعايتۋعا ىقپال ەتەتىن مەكتەپتەر» جوباسىن ەنگىزۋ؛
5) «سالاۋاتتى ۋنيۆەرسيتەتتەر» جوباسىن ەنگىزۋ؛
6) مەكتەپكە دەيىنگى جانە مەكتەپ جاسىنداعى بالالارعا ارنالعان «سالاماتتى ءمۇسىن»، «سالاماتتى كورۋ» باعدارلامالارىن ازىرلەۋ جانە ەنگىزۋ؛
7) الكوگول جانە ەسىرتكى بويىنشا ەۋروپالىق مەكتەپتىك زەرتتەۋ جوباسىنىڭ ءادىسناماسى بويىنشا جاستار اراسىندا پسيحوبەلسەندى زاتتاردى (پبز) قولدانۋ بويىنشا زەرتتەۋ جۇرگىزۋ، كەيىننەن پبز-عا تاۋەلدى جاستاردى تارتۋ تاۋەكەلدەرىنىڭ الدىن الۋ جانە دياگنوستيكالاۋ باعدارلامالارىن ازىرلەۋ جانە ەنگىزۋ؛
8) سالاۋاتتى ءومىر سالتىنىڭ جاڭا قاعيداتتارىن ىلگەرىلەتۋ ءۇشىن «ە-سوس» ەلەكتروندىق پلاتفورماسىن قۇرۋ؛
9) حالىقتىڭ دەنساۋلىق ماسەلەلەرى بويىنشا ساۋاتتىلىعىن ارتتىرۋ، ونىڭ ىشىندە: ب ا ق پەن الەۋمەتتىك جەلىلەردە سالاۋاتتى ءومىر سالتىن ناسيحاتتاۋ جانە دەنساۋلىقتى قورعاۋ جونىندەگى تەلەجوبالاردى ىسكە اسىرۋ؛
10) ىسكە اسىرىلىپ جاتقان ءىس-شارالاردى باعالاۋ ءۇشىن 13-15 جاستاعى بالالار مەن ەرەسەكتەرگە تەمەكى ونىمدەرىن تۇتىنۋ تۋرالى Global Youth Tobacco Study جانە Global Adult Tobacco Study ستاردارتى بويىنشا جاھاندىق ساۋالناما جۇرگىزۋ؛
11) تەمەكى ونىمدەرىن تۇتىنۋدى قىسقارتۋ جونىندەگى شارالار كەشەنىن ىسكە اسىرۋ.
بۇل باعىت بويىنشا قوعامدا 100% ءتۇتىنسىز ورتانى ەنگىزۋ، جارنامانى باقىلاۋ، قوعامدىق ورىنداردا تەمەكى شەگۋگە تىيىم سالۋ كوزدەلگەن.
«سونىمەن قاتار، اتالعان ءىس-شارالاردى ىسكە اسىرۋ ءۇشىن سالاۋاتتى ءومىر سالتىنىڭ پروفيلاكتيكاسىن دامىتۋدىڭ جول كارتاسى ازىرلەنۋدە. بۇل ءوز كەزەگىندە قازاقستاندىقتاردىڭ ءومىر ءسۇرۋ ۇزاقتىعىنىڭ ارتۋىنا، ينفەكسيالىق ەمەس اۋرۋلاردان سىرقاتتانۋشىلىقتىڭ تومەندەۋىنە، ازاماتتاردىڭ ەڭبەككە قابىلەتتىلىگىنىڭ ارتۋىنا جانە مۇگەدەكتىكتىڭ تومەندەۋىنە ىقپال ەتەدى»، - دەپ جازىلعان ۆەدومستۆونىڭ جاۋابىندا.