بوكستان توكيو وليمپياداسىنىڭ قولا جۇلدەگەرلەرى قامشىبەك قوڭقابايەۆ پەن ساكەن بيبوسىنوۆ مەملەكەتتەن بولىنگەن 31 ميلليون تەڭگە سىياقىنى مۇقتاج جاندارعا بەرەتىن بولدى، دەپ حابارلايدى almaty-akshamy.kz.
بۇل ويلارىن بوكسشىلار الماتىدا وتكەن قازاقستان بوكس فەدەراسياسىنىڭ سپورتشىلاردى ماراپاتتاۋ راسىمىندە ايتتى. فەدەراسيا تاراپىنان ساكەن بيبوسىنوۆ پەن قامشىبەك قوڭقابايەۆقا جانە ولاردىڭ جەكە باپكەرلەرىنە 50 مىڭ جانە 10 مىڭ اقش دوللارى كولەمىندە اقشالاي سەرتيفيكاتتار تابىستالدى. سونداي-اق قۇرامانىڭ باپكەرلەرى مەن وليمپياداعا قاتىسقان باسقا دا بوكسشىلار نازاردان تىس قالمادى. ولار دا ماراپاتقا يە بولدى. سپورتشىلارىمىز قىسقا مەرزىمدەگى دەمالىستان سوڭ كۇزدە وتەتىن الەم چەمپيوناتىنا دايىندىقتى باستايدى.
- اۋەسقوي بوكستاعى ءاربىر سپورتشىنىڭ ارمانى – وليمپيادا شىڭىن باعىندىرۋ. سوندىقتان بۇل سپورت ەمەس، ءبىز ءۇشىن ءومىر دەسەم، ارتىق ايتقاندىق ەمەس. بۇل جەتىستىك قانشا جىلعى ەڭبەكتىڭ، تەردىڭ، بىرەۋ بىلسە، بىرەۋ بىلمەيدى، سونىڭ جەمىسى دەپ بىلەمىن. كەشە مەملەكەت تاراپىنان بولىنگەن 31 ميلليون (75 مىڭ دوللار) تەڭگەنى قايىرىمدىلىق ماقساتقا جۇمساۋعا شەشىم قابىلدادىم، - دەيدى بوكستان توكيو وليمپياداسىنىڭ قولا جۇلدەگەرى قامشىبەك قوڭقابايەۆ.