الماتىدا ءبىر تۇنگە ماركوۆ كوشەسىنىڭ ۋچاسكەلەرىنىڭ بىرىندە قوزعالىس شەكتەلەدى
الماتىدا 1983 جىلى پايدالانۋعا ەنگىزىلگەن جىلۋ تراسساسىن اۋىستىرۋ ءۇشىن ماركوۆ كوشەسىنىڭ ءبىر بولىگى ءبىر تۇنگە جابىلادى
27 مامىردىڭ ساعات 21:00 باستاپ 28 مامىردىڭ ساعات 07:00 دەيىن الماتى قالاسى بوستاندىق اۋدانىندا ماركوۆ كوشەسىنىڭ بويىمەن بۇقار جىراۋ جەلەكجولىنان باستاپ پوجارسكيي كوشەسىنە دەيىن ەكى باعىتتا اۆتوكولىكتەر قوزعالىسى شەكتەلەدى.
ۋاقىتشا شەكتەۋلەر كورسەتىلگەن كوشە سەگمەنتىنىڭ جۇرگىن بولىگىنىڭ استىمەن توسەلگەن ماگيسترالدىق قۇبىرجول ۋچاسكەسىن جاڭعىرتۋ بويىنشا جوسپارلانعان جۇمىستاردىڭ قاۋىپسىزدىگىن قامتاماسىز ەتۋ ءۇشىن ەنگىزىلەدى.
ەسكە سالساق، بوستاندىق اۋدانىندا عابدۋللين – حاميت ەرعالييەۆ، جاعالاۋ ماڭى – بۇقار جىراۋ – بايتۇرسىنوۆ كوشەلەرىنىڭ كونتۋرىندا ورنالاسقان، جالپى ۇزاقتىعى 2،7 كيلومەتردى قۇرايتىن، 1983 جىلى پايدالانۋعا بەرىلگەن قۇبىرجولدى جاڭعىرتۋ جوسپارلانىپ وتىر. جاڭعىرتۋ جۇمىستارىن جۇرگىزۋ مەرزىمىنىڭ ىشىندە تۇتىنۋشىلارعا ىستىق سۋ بەرۋ ۇزىلمەيدى.
اتالعان جىلۋ تراسساسى 128 كوپپاتەرلى تۇرعى ءۇيدىڭ، 25 جەكە ءۇيدىڭ تۇرعىندارى، 2 بالاباقشا، 1 مەكتەپ، 1 مەديسينا مەكەمەسى جانە 65 باسقا دا وبەكتىلەر ءۇشىن جىلۋ ەنەرگياسىن بەرۋدى جانە ىستىق سۋمەن جابدىقتاۋدى قامتاماسىز ەتەدى.
جالپى العاندا، اعىمداعى جىلى قالا بويىنشا 39 كم جىلۋ تراسساسىن جاڭعىرتۋ جوسپارلانعان. بۇل توزۋ دەڭگەيىن 54% دەيىن ازايتۋعا مۇمكىندىك بەرەدى.
ەسكەرتەمىز، قوزعالىستاردى شەكتەۋگە قاتىستى بارلىق اقپارات Almaty.kz سايتىندا، @AlmatyJoly Telegram-ارناسىندا، اۋداندىق اكىمدىكتەر مەن باسقارمالاردىڭ الەۋمەتتىك جەلىلەرىندە، سونداي-اق «2GIS» جانە «ياندەكس كارتالار» سەرۆيستەرىندە ورنالاستىرىلعان.
ۋاقىتشا قولايسىزدىقتارعا تۇسىنىستىكپەن قاراۋلارىڭىزدى سۇرايمىز.
«الماتى جىلۋ جۇيەسى» ج ش س