قوستاناي وبلىسىنىڭ قۇتقارۋشىلارى وڭىردە سۋ تاسقىنى جاعدايى ۋشىعىپ بارا جاتقانىن ەسكەرتتى. قاردىڭ كۇرت ەرۋى مەن جاۋىن-شاشىنعا بايلانىستى 14 اۋدان ءقاۋىپتى ايماققا ەنگىزىلدى، دەپ حابارلايدى اlmaty-akshamy.kz.
"توتەنشە جاعدايلار دەپارتامەنتى "قازگيدرومەت" رمك مالىمەتى بويىنشا 31 ناۋرىزدان باستاپ قوستاناي وبلىسىنىڭ اۋماعىندا اۋا تەمپەراتۋراسى كۇندىز +20 گرادۋسقا دەيىن كوتەرىلۋى مەن اپتانىڭ ورتاسىندا تۇندە وبلىستىڭ سولتۇستىگى مەن شىعىسىندا جاڭبىر جاۋاتىنىن حابارلايدى. وسىعان بايلانىستى، وبلىستىڭ وڭتۇستىك وڭىرلەرىندە سۋ تاسقىنى جاعدايىنىڭ قايتادان قيىنداۋ ءقاۋپى جوعارى"، - دەلىنگەن حابارلامادا.
ماسەلەن، قاراسۋ، اۋليەكول، ناۋرىزىم، قامىستى، سارىكول، التىنسارين، مەڭدىقارا جانە ۇزىنكول اۋداندارىن سۋ باسۋى مۇمكىن.
بۇعان قوسا، رەسەي فەدەراسياسىنىڭ اۋماعىنان ءىرى وزەندەر ارقىلى سۋ اعىنى ارتۋى مۇمكىن.
ءجىتىقارا، دەنيسوۆ، قوستاناي، قارابالىق، فەدوروۆ اۋداندارى مەن بەيىمبەت مايلين اۋدانى سۋ اعىنىنىڭ ءقاۋىپتى ايماعىندا ورنالاسقان.
ايتا كەتەيىك، قوستاناي وبلىسى سۋ تاسقىنىنا بايلانىستى قيىن جاعدايعا تاپ بولدى.
كۇنى كەشە ارقالىق ماڭىنداعى اۋىلدار سۋ استىندا قالىپ، قوستاناي ىرگەسىندەگى امانگەلدى اۋىلىن دا سۋ باستى.
جانگەلدى، امانگەلدى اۋداندارى مەن ارقالىق قالاسى دا قيىن جاعدايدا. وندا 28 ناۋرىزدا توتەنشە جاعداي جاريالاندى.
ايماق باسشىسى قۇمار اقساقالوۆ سۋ تاسقىنىنان زارداپ شەككەن تۇرعىنداردىڭ شىعىنىن اكىمدىك وتەيتىنىن ايتتى.
كەيىن قوستاناي وبلىسىنىڭ اكىمدىگى كەلتىرىلگەن شىعىننىڭ قالاي ەسەپتەلەتىنىن جانە تولەمنىڭ قالاي جۇزەگە اسىرىلاتىنىن ءتۇسىندىردى.
ءقازىر سۋ باسقان اۋماقتارداعى ەلەكتر قۋاتىن جانە كوممۋنيكاسيالاردى قالپىنا كەلتىرۋ جۇمىستارى جۇرگىزىلىپ جاتىر.
جانگەلدى اۋدانى مەن امانگەلدى اۋدانىنىڭ جارتى ەلدى مەكەندەرىندە ءالى جارىق جوق.
تابيعي اپاتپەن كۇرەسكە ايماق بەلسەندىلەرى دە اتسالىستى.