قوستاناي وبلىسىنىڭ ءۇش ەلدى مەكەنىندە ورتپەن كۇرەس ءجۇرىپ جاتىر. وبلىس اكىمدىگى توتەنشە جاعجاي جاريالاۋ ماسەلەسىن قاراستىرۋدا، دەپ حابارلايدى Almaty-akshamy.kz Inform.kz-كە سىلتەمە جاساپ.
بۇل تۋرالى ق ر توتەنشە جاعداي مينيسترلىگىنىڭ جەدەل شتابى مالىمەت تاراتتى.
«قوستاناي وبلىسىندا بولعان تابيعي ءورت بويىنشا 4 قىركۇيەك ساعات 11.00-دەگى جاعداي مىناداي. 3 ەلدى مەكەندە، م-36 رەسپۋبليكالىق تراسساسىنىڭ بويىندا، سونداي-اق ورمان ايماعىنىڭ 8 ۋچاسكەسىندە ءورت ءسوندىرۋ جۇمىستارى ءجۇرىپ جاتىر»، -دەلىنگەن رەسمي مالىمەتتە.
ءورتتى سوندىرۋگە 110 تەحنيكا، 3 اۋە كەمەسى، 5 ءورت پويىزى، جەكە قۇرامنىڭ 703 ادامى جۇمىلدىرىلدى: ونىڭ ىشىندە ق ر توتەنشە جاعداي مينيسترلىگىنىڭ - 58 تەحنيكاسى مەن 359 ادامى، اۋەدەن سۋ توگەتىن قۇرىلعىمەن جابدىقتالعان 2 تىكۇشاق (نۇر-سۇلتان ق.، قوستاناي، اقمولا، سولتۇستىك قازاقستان وبلىستارىنان اكەلىندى) تارتىلعان. ال ىشكى ىستەر مينيسترلىگىنىڭ جەكە قۇرامىنان 33 ادام، ۇلتتىق ۇلاننىڭ (№6697 ءا/ءا) 150 ادامى، 14 تەحنيكاسى جۇمىلدىرىلدى. سونداي-اق، قورعانىس مينيسترلىگى جەكە قۇرامىنان 20 ادام؛ ورمان شارۋاشىلىعىنان - 32 تەحنيكا مەن 83 ادام ورمان كۇزەتىنە تارتىلدى. «قازاۆياورمانقورعاۋ» مەكەمەسىنەن 12 ادام، 2 تەحنيكا، 1 اۋە كەمەسى، جەرگىلىكتى اكىمدىكتەن 3 تەحنيكا، 20 ادام. «قتج» اكسيونەرلىك قوعامىنان 5 ءورت سوندىرگىش پويىز (21 ادام)جۇمىس ىستەپ جاتىر.
«امانقاراعاي، لەسنوە، وزەرنوە ەلدى مەكەندەرىندە ءورت ءسوندىرۋ جۇمىستارى جالعاسىپ جاتىر. حالىقتىڭ قاۋىپسىزدىگىن قامتاماسىز ەتۋ ءۇشىن وزەرنوە اۋىلىنان (250 ادام)، امانقاراعاي اۋىلىنىڭ سولتۇستىك بولىگىنەن (1000 ادام)، كالينين اۋىلىنان (228 ادام) جانە لەسنوە اۋىلىنان (363 ادام) جالپى بارلىعى 1841 ادام ەۆاكۋاسيالاندى.
جەرگىلىكتى اتقارۋشى ورگاندار ەۆاكۋاسيالانعانداردى اۋليەكول ورتا مەكتەبى مەن اۋليەكول مەكتەپ-ينتەرناتىنا ورنالاستىرۋدى ۇيىمداستىردى.
تجم جەدەل جەلىسىنە اقپاراتتىق سيپاتتاعى 18 قوڭىراۋ كەلىپ ءتۇستى. قوستاناي وبلىسى توتەنشەجاعدايلار دەپارتامەنتىنىڭ 2 پسيحولوگى اۋليەكول اۋدانىنىڭ ەۆاكوپۋنكتىندە حالىققا شۇعىل پسيحولوگيالىق كومەك كورسەتىپ جاتىر.
نوۆونەجەنكا اۋىلىندا زارداپ شەككەن حالىقتى قابىلدايتىن 9 شاتىر قۇرىلدى.
10 ادام جاراقات الىپ، كۇيىك شالىپ، ۋلانعان. ياعني، تۇرعىندار اراسىندا 5 ادام، ورمان شارۋاشىلىعىنىڭ ءبىر قىزمەتكەرى، 1 اكىمدىك قىزمەتكەرى، توتەنشە جاعداي مينيسترلىگىنىڭ 3 قىزمەتكەرى زارداپ شەككەن. ولاردىڭ تورتەۋى ورتالىق اۋداندىق اۋرۋحانادا ەم الىپ جاتىر. ال 6 ادام تەكسەرۋدەن ءوتىپ، كومەك العاننان كەيىن ۇيىگە جىبەرىلدى. ءورت ءسوندىرۋ كەزىندە قۇتقارۋشىلار 1935 جىلى تۋعان ەر ادامنىڭ ءمايىتىن تاپتى.
قوستاناي وبلىسىنىڭ اكىمدىگى جەرگىلىكتى اۋقىمداعى توتەنشە جاعدايدى جاريالاۋ ماسەلەسىن پىسىقتاۋدا»، -دەپ جازادى جەدەل شتاب.