جۇڭگو تاراپىمەن كەلىسىم جاسالدى.
«قورعاس» شەكارا ماڭى ىنتىماقتاستىعى ورتالىعى جاقىن ارادا اشىلادى. جەتىسۋ وبلىسىنىڭ الەۋمەتتىك-ەكونوميكالىق دامۋ ماسەلەلەرى قارالعان كەڭەستە پرەمەر-مينيستر ءاليحان سمايىلوۆ دايىندىق جۇمىستارىن جەدەلدەتۋدى تاپسىردى، دەپ حابارلايدى اlmaty-akshamy.kz ۇكىمەتتىڭ رەسمي تەلەگرام كانالىنا سىلتەمە جاساپ.
پرەمەر-مينيستر لوگيستيكانى دامىتۋ وبلىستاعى پەرسپەكتيۆالى باعىتتاردىڭ ءبىرى ەكەنىن اتاپ ءوتتى. ول پاندەميا باستالعاننان بەرى «قورعاس» شەكارا ماڭى ىنتىماقتاستىعى حالىقارالىق ورتالىعى توقتاپ تۇرعانىن، الايدا قازىرگى ۋاقىتتا جۇڭگو تاراپىمەن ونى اشۋ تۋرالى كەلىسىمگە قول جەتكىزىلگەنى تۋرالى ايتتى.
«قورعاس» جاقىن ارادا ءوز جۇمىسىن باستاۋى ءتيىس. ەندى دايىندىق جۇمىستارىن جەدەلدەتىپ، ورتالىق قىزمەتىنە تارتىلعان بارلىق قۇرىلىمداردىڭ ءوزارا ءىس-قيمىلىن قامتاماسىز ەتۋ كەرەك»، - دەدى ۇكىمەت باسشىسى.
سونىمەن قاتار، ءاليحان سمايىلوۆ جوسپارلانىپ وتىرعان ينۆەستيسيالىق جوبالاردى ۋاقتىلى ىسكە قوسۋدىڭ جانە ءوڭىردى قولجەتىمدى باعادا الەۋمەتتىك ماڭىزى بار ازىق-تۇلىك تاۋارلارىمەن قامتاماسىز ەتۋدىڭ ماڭىزىن اتاپ ءوتتى.
ۇكىمەت باسشىسى ۋاكىلەتتى مەملەكەتتىك ورگاندارعا ءبىرقاتار ناقتى تاپسىرما بەردى: ەلدى مەكەندەردە گاز تاراتۋ جەلىلەرىن، «تالدىقورعان - ءۇشارال» ماگيسترالدىق گاز قۇبىرىن سالۋ، تالدىقورعانداعى «باسقۋات» قازاندىعىن جاڭارتۋ جانە تەكەلى قالاسىنىڭ تۇرعىندارىن ساپالى اۋىز سۋمەن قامتاماسىز ەتۋ ماسەلەلەرىن پىسىقتاۋ قاجەت.
سونىمەن قاتار، 6 اۋىلدا سۋمەن جابدىقتاۋ جۇيەلەرىن رەكونسترۋكسيالاۋ مەن سالۋعا، 15 اپاتتىق جاعدايداعى كوپىردى جوندەۋگە، اقسۋ ورتالىق اۋداندىق اۋرۋحاناسىن جوندەۋگە جانە سەيسميكالىق جاعىنان كۇشەيتۋگە قاراجات ءبولۋ ماسەلەلەرىن قاراستىرۋعا، سونداي-اق كەربۇلاق اۋدانىنىڭ اۋرۋحاناسىن جوندەۋگە جانە تالدىقورعاندا 500 ادام قابىلداۋعا ارنالعان ەمحانا سالۋعا قاراجات قاراستىرۋ قاجەتتىگىنە نازار اۋداردى.
ەنەرگەتيكا مينيسترلىگىنە الاكول جاعالاۋىنداعى تۋريستىك نىسانداردى ۇزدىكسىز ەلەكترمەن جابدىقتاۋ ءۇشىن جەلىلەر قۇرىلىسىن كەزەڭ-كەزەڭمەن قارجىلاندىرۋ ماسەلەسىن قاراستىرۋ، ۇلتتىق ەكونوميكا مينيسترلىگىنە ينجەنەرلىك ينفراقۇرىلىم سالۋ جانە بالقاش كولىنىڭ جاعالاۋىن اباتتاندىرۋ جونىندەگى بيۋدجەتتىك باعدارلامالاردىڭ اكىمشىسىن انىقتاۋ تاپسىرىلدى.