قورعانىس ءمينيسترىنىڭ تاربيە جانە يدەولوگيالىق جۇمىس جونىندەگى ورىنباسارى گەنەرال-مايور شايح-حاسان جازىقبايەۆتىڭ باسشىلىعىمەن ينسپەكسيالىق توپ قازاقستاندىق بىتىمگەرلىك كونتينگەنت ورنالاسقان فاۋار بازاسىندا بولدى.
قورعانىس ءمينيسترىنىڭ ورىنباسارى ۇلتتىق كونتينگەنت كومانديرى پودپولكوۆنيك جىگەر ايىپوۆتىڭ بايانداماسىن تىڭدادى. التى اي ىشىندە قازاقستاندىق بىتىمگەرلەر شەكارا ماڭىنداعى اۋدانداردا 168 پاترۋلدەۋ جۇرگىزگەن. 18 رەت بۇۇ پەرسونالىن الىپ جۇرگەن، سونداي-اق 13 رەت جارىلماعان وق-دارىلەردى زالالسىزداندىرۋعا قاتىسقان جانە 30 رەت مەديسينالىق ەۆاكۋاسيا جۇرگىزگەن. سونىمەن قاتار جەدەل ارەكەت ەتۋ توپتارى وقيعا ورنىنا 102 رەت بارعان، دەپ حابارلايدى aqshamnews.kz قورعانىس ينيسترلىگىنە سىلتەمە جاساپ.
ساپار بارىسىندا گەنەرال-مايور شايح-حاسان جازىقبايەۆ ميسسيا قولباسشىسىنىڭ ورىنباسارى بريگادالىق گەنەرال اميتابح دجامەن پىكىر الماستى. قازاقستاندىق كونتينگەنتتىڭ كۇندەلىكتى ءومىرىن ۇيىمداستىرۋ مەن ءتارتىپتى ساقتاۋدا باسقا بولىمشەلەرگە ۇلگى بولاتىنىن اتاپ وتكەن ول قازاقستاندىق بىتىمگەرلەردىڭ كاسىبيلىگىنە جوعارى باعا بەردى.
بازانىڭ ورنالاسقان جەرىندە ينسپەكسيالىق توپ تەحنيكانىڭ، قارۋ-جاراقتىڭ جارامدىلىعىن، قۇرال-جابدىقتاردىڭ جالپى جاي-كۇيىن ەگجەي-تەگجەيلى تەكسەردى. ءمينيستردىڭ ورىنباسارى سونىمەن قاتار تۇرعىن ءۇي-جايلاردى ارالاپ، اسحانادا تاماقتانۋدى ۇيىمداستىرۋ جاعدايىمەن تانىستى. ينسپەكسيا بارىسىندا ول بىتىمگەرلىك بازاسىنىڭ اۋماعىندا ورنالاسقان ويىن الاڭدارى، جابىق سپورت زالى، باسسەينى بار سپورت قالاشىعىن كورىپ شىقتى. وندا قىزمەتتەن بوس ۋاقىتىندا اسكەري قىزمەتشىلەر سپورتپەن شۇعىلدانادى.
ەستەرىڭىزگە سالا كەتەيىك، «بۇۇ كۇشتەرىنىڭ ءبولىنۋىن باقىلاۋ جونىندەگى» ميسسياسى قولباسشىسىنىڭ رەزەرۆ روتاسى 139 اسكەري قىزمەتشىدەن تۇراتىن قازاقستاندىق بىتىمگەرلەر بۇۇ مانداتىنا سايكەس اتىستى توقتاتۋ رەجيمىن قولداۋ جونىندەگى مىندەتتەردى ورىندايدى.