تاكتيكالىق ساباقتا شارتتى جاعداي جايلى مالىمەت بەردى
اتالمىش شارا قۇرلىق اسكەرلەرى باس قولباسشىسىنىڭ باسقارماسى ۇيىمداستىرعان جيىن اياسىندا جالپى اسكەري، ارتيللەريالىق بريگادالار مەن بارلاۋ (تاۋ قورىقشىلارى) پولكتەرىنىڭ كومانديرلەرىنە ارنايى وتكىزىلدى، دەپ حابارلايدى Almaty-akshamy.kz.
قورعانىس ۆەدومستۆوسىنىڭ باسشىسى، گەنەرال-پولكوۆنيك رۋسلان جاقسىلىقوۆ سەنىپ تاپسىرىلعان اسكەري بولىمدەردەگى ىستەردىڭ جاي-كۇيى تۋرالى كومانديرلەردىڭ باياندامالارىن تىڭداپ، اسكەرلەردىڭ جاۋىنگەرلىك ازىرلىگى مەن جاۋىنگەرلىك قابىلەتىن ودان ءارى ارتتىرۋعا باعىتتالعان ءبىرقاتار مىندەتتەر جۇكتەدى. ول اسكەرلەردەگى تاكتيكالىق، تاكتيكالىق-ارنايى جانە اتىس دايىندىعى مەن ءتارتىپتىڭ تيىمدىلىگى كوبىنەسە كومانديرلەردىڭ قۇزىرەتتىلىگىنە، ۇيىمداستىرۋشىلىق قابىلەتتەرىنە جانە ولاردىڭ لاۋازىمدىق مىندەتتەرىنە جاۋاپكەرشىلىكپەن قاراۋىنا بايلانىستى ەكەنىن اتاپ ءوتتى.
جيىن باعدارلاماسى دارىستەر مەن پراكتيكالىق ساباقتاردى، ترەنينگتەر مەن تەستىلەۋدى قامتىدى. تاكتيكالىق ساباقتا شارتتى جاعداي جايلى مالىمەت بەردى. كومانديرلەر ونى باعالاپ، كۇشتەردى، قۇرالداردى ءبولۋ، قوزعالىس جولدارىن انىقتاۋ جانە ۋاقىتتى ەسەپتەۋ ارقىلى جاۋىنگەرلىك تاپسىرمانى ورىنداۋ تۋرالى شەشىم قابىلدادى. ساباقتار تاكتيكالىق جاعدايداعى بارلىق ءىس-قيمىل نۇسقالارىن ەگجەي-تەگجەيلى پىسىقتاي وتىرىپ، جوعارى قارقىنمەن ورىندالدى.
– كوپتەگەن تاجىريبەلىك ساباقتار جيىن وتكىزۋدىڭ پايدالى ەكەنىن كورسەتىپ وتىر. مۇنداي ءساتتى جيناقتالعان ءبىلىم قىزمەتتىك-جاۋىنگەرلىك مىندەتتەردى ورىنداۋ بارىسىندا باعىنىستى بولىمشەلەر مەن جەكە قۇرامدى باسقارۋعا كومەكتەسەدى، – دەپ جيىننىڭ ماڭىزدى ەكەنىن اتاپ ءوتتى 06708 اسكەري ءبولىمىنىڭ كومانديرى، پودپولكوۆنيك جاسۇلان ابەكوۆ.
بريگادالار مەن پولك كومانديرلەرى زاڭناما نورمالارىن، تاكتيكالىق نورماتيۆتەردى، جالپى اسكەري شتابتار قىزمەتى جونىندەگى نۇسقاۋلىقتىڭ ەرەجەلەرىن بىلۋگە تەستىلەۋدەن ءوتتى. مۇنداي جيىن كوماندالىق قۇرامنىڭ كاسىبي دەڭگەيىن ارتتىرۋعا، بولىمشەلەردىڭ كۇندەلىكتى تىنىس-تىرشىلىگىن جانە جاۋىنگەرلىك دايارلىق ءىس-شارالارىن ۇيىمداستىرۋداعى بىلىكتىلىگىن تەكسەرۋگە باعىتتالعان.